PARÓQUIA SÃO FRANCISCO XAVIER HATOLIA

HISTÓRIA:

Paróquia São Francisco Xavier Hatulia ne’e hari iha tinan 1992. Preimeiro Pároco Pe. Luis Goveia Leite. Desde 1927 paróquia ne’e hanesan missionário ida halo visitador de’it la hetan assistência ida ne’ebe klean to’o 1930, começa ona  hari capelinha oan ida. Iha 1936 maka foin halo implementação uituan kona ba pastoral, maibe pastoral ida ne’ebe la adequado ka liu hela de’it.

Bainhira Hatulia sidauk sai paróquia, missionário sira halo visita mai Hatulia iha fulan ida dala rua de’it, maibe quando sai ona paróquia ami la hein ona amululik sira mai housi fatin seluk tanba ami bele tuir missa domingo-domingo no bele simu sacramento confessa ho tan sacramento sira hanesan casamento, primeira comunhão no baptismo iha ami nia paróquia rasik.

Pároco primeiro mak Pe. Luis Goveia Leite, segundo Pe. Adriano Ximenes e terceiro Pe. Natalino da Costa Soares to’o agora. Antes atu sai paróquia Pe. Carlos Rocha no Pe. Mário do Carmo Lemos Belo iha mos Pe. António José Barbosa sira hanesan visitador iha paróquia ida ne’e, maibe semanal de’it no amo sira ne’e mai housi centro paróquia Ermera.

VISÃO :

“paróquia hari atu aprofunda comunidade sarani nia fiar no oinsa atu lori comunidade sarani ida ne’e hakbesik liu tan ba Maromak”

MISSÃO :

“cada sarani tem que consciente katak, nia mak agente ou discípulo Cristo ninian atu continua haklaken Maromak nia liafuan”.

TOTAL POPULAÇÃO:

“Total dados estatística ba 2017 nian hamutuk 25.575 pessoas, por volta de 150 ba suco 8 ne’e hotu”.

PASTORAL:

“sistema Pastoral Categorial (Pastoral da Escola) no sistema Pastoral Paroquial (Eucaristia, Catequese ba sarani sira no ida seluk forma grupo categorial)

SACRAMENTOS:   

Matrimónio, baptismo no primeira comunhão no Crisma”     

ESTAÇÃO MISSIONÁRIO:

Paróquia São Francisco Xavier Hatulia iha estação missionário 3: “Estação São Bento Saré, Estação Missionário Nossa Senhora do Rosário de Fátima Manufahe no Nossa Senhora de Lourdes Manlete.

CAPELAS:

“Capela iha 16. No aumenta Capela ikus liu iha tolu; Santa Madalena de Canossa, Capela Nossa Senhora do Carmo no Capela Sao João Paulo II Lakeama. No iha 17 comunidade base centro iha paroquia ida ne’e”.

GRUPOS CATEGORIAIS:           

Paróquia São Francisco Xavier Hatulia iha13 grupos categoriais”

DEVOÇÃO:  

“Paróquia São Francisco Xavier Hatulia devoção ba iha adoração Santíssimo Eucaristia no devoção ba  ita Na’in Feto”

RELIGIÃO:

“Paróquia São Francisco Xavier Hatulia Maioria Católica”

GENTIO:

“Paróquia São Francisco Xavier Hatulia gentio Minoria”

Pároco Paróquia São Francisco Xavier Hatulia

Pe. Natalino da Costa Soares,

Ha’u simu pasta pároco iha Paróquia São Francisco Xavier Hatulia iha dia 06 de Janeiro 2013. Paróquia ida ne’e ninia visão, “paróquia hari atu aprofunda comunidade sarani nia fiar no oinsa atu lori comunidade sarani ida ne’e hakbesik liu tan ba Maromak”. No nia missão katak, “cada sarani tem que consciente katak, nia mak agente ou discípulo Cristo ninian atu continua haklaken Maromak nia liafuan”.

Iha paróquia ida ne’e, ha’u iha sistema rua mak hanesan’ ‘sistema Pastoral Categorial no sistema Pastoral Paroquial’. Sistema Pastoral Categorial fahe mos ba rua hanesan; Pastoral da Escola katak, paróquia mak loke escola hahu husi ensino primária, ensino básica no ensino secundária ne’ebe hanaran Colégio São Francisco Xavier iha nebe hetan acreditação ou aprovado housi ministério da Educação hanesan colégio iha tinan 2016.

Sistema pastoral paroquial mak hanesan; Eucaristia iha estação no capela sira, Catequese ba sarani sira no ida seluk forma grupo categorial ne’ebe pertence ba iha paróquia ida ne’e, hamutuk 13 grupos categoriais ne’ebe paróquia estabelece atu oinsa hodi bele atinge metas ida katak sai sarani ida laos naran, maibe sarani ida iha nia fiar iha nia vida.

Sacramento sira, iha ha’u nia paróquia ha’u estabelece tuir cada festa padroeira capela ka estação nian. Então cada festa padroeira sempre realiza sacramento tolu: matrimónio, baptismo no primeira comunhão. Hau nia mandato durante tinan 5 iha paróquia nee, hau fahe hanesan tuir mai ne’e; iha tinan primeiro no segundo nian oinsa atu hamoris paróquia ne’e hodi forma grupo categorial sira no halo cataquese tama bairro sai bairro. Iha terceiro ano to’o quinto ano, hau começa halo visita ativa estação ho capela sira hotu.

Tinan 2016, 2017, ha’u começa halo ona ba estação sira dominical ne’e domingo–domingo obrigatório hetan missa no capela sira ne’ebe dook fulan 1 hetan dala 2, iha capela hot-hotu ida-idak hetan ninia jata.

Buat ne’ebe fácil quando ita estabelece organização, ema hot-hotu iha nia kna’ar, ba ha’u facil tamba primeiro ha’u forma conselho paroquial no cada paroquial iha nia serviço oinsa atu bele hala’o nia kna’ar ida-idak. Administracão paroquial, ha’u hakarak dehan de’it katak, iha ha’u nia paróquia laos dehan diak liu, maibe atu dehan katak ha’u nunca atu kaer osan iha ha’u nia liman. Administracão hot-hotu financeiramente iha tesoreira nia liman. Ha’u so controla kada menssal oinsa gastos no tama, oinsa bele utiliza buat sira ne’e hotu. Tan ne’e ba ha’u iha ne’e la dificil mai ha’u mesmo serviço barak, maibe ha’u sente ladun preocupa tanba cartório ida–idak iha ninia finanças, e ha’u halo ha’u nia kna’ar hanesan amululik ne’ebe sai hanesan ulun ida para controla buat hot-hotu e ao mesmo tempo halao ha’u nia knar ida principal celebra Eucaristia no guarda, protege ba documentos Igreja ninian atu bele sai Igreja ne’ebe digno nafatin iha mundo ne’e.

Cada paróquia ida iha ninia Estação. Estação tem que iha Capela, depois iha comunidade de base. Então iha ha’u nia organização sai hanesan amo pároco iha ne’e Estação uluk iha kedas, iha Amo Luis nia tempo iha tolu; Estação São Bento Saré, Estação Missionário Nossa Senhora do Rosário de Fátima Manufahe no Nossa Senhora de Lourdes Manlete. No Capela iha 16. No aumenta Capela ikus liu iha tolu; Santa Madalena de Canossa, Capela Nossa Senhora do Carmo no Capela Sao João Paulo II Lakeama. No 17 comunidade base centro iha paroquia ida ne’e. Total dados estatística ba 2017 nian hamutuk 25.575 pessoas, por volta de 150 ba suco 8 ne’e hotu.

Gentio quer dizer que katuas sira ne’ebe tuir mambae nia lisan ka hein uma ne’e atu mate mak sarani, ida ne’e laos mambae de’it, maibe kemak mos hanesan talvez quando atu mate mak sira bolu amo mai sarani depois aban sira mate ona. Laos dehan katak pastoral ami la hakbesik an, ami sempre hakbesik hodi koalia ho sira, maibe sira la sente katak buat todan iha hela depois atu mate mak amululik ba fo bensa ne’ebe sempre hakbesik an no infantes sempre iha aviso atu fo baptismo ba labarik ki’ik sira.

Ba ha’u atu dehan katak desafio ne’e iha oin 2; desafio primeiro mak sarani sira ita bele dehan katak naran sarani, moris la hanesan sarani de’it mos desafio tiha ona katak balu sarani de’it maibe la hatene ninia obrigação, ninia dever, ida ne’e sai desafio ba paróquia ida ne’e nian. No desafio segundo ba ami mak buat ida factores externa ba ami laiha tanba buat sectes sira ne’e ha’u sempre dehan ba sarani sira katak, se mak tauk ba seitas ne’e hatudu katak nia la prepara nia an tanba se o hatene katak o sarani, prepara an ba tauk buat ida mai husi liur ne’e atu halo saida! Se tauk significa buat ruma la los, o nia an la pronto hanesan ema sarani ida tanba ne’e factor externa ba ha’u ladun problema.

Ba ha’u interna ne’e mak sarani nia moris, ita bele dehan katak ibun sarani, maibe hahalok gentio. Desafio boot ida ba Ermera tomak no especial ba Hatulia, ema  mate sarani, maibe foti liu ba estilo gentio. Então concepto dualismo ba nia compreenção kona ba Maromak ida ne’e oinsa nia atu compreende. Ida ne’e mak sai desafio ba ami no sai mos targeto ba ami oinsa iha ami nia pastoral atu bele esplica klean liu tan Jesus Cristo nia Aman Maromak ida ne’ebe liu fali maromak ida ne’ebe katuas ho avo sira ne’ebe tau hela iha uma lisan tuir sira nia concepto.

Iha ha’u nia tempo, buat ne’ebe passado mak ida ne’e devoção ba  ita Na’in Feto. Ne’e ha’u hanoin katak sarani Timor tomak laos Hatulia de’it, no ha’u kuda ba sira kona ba devoção ba adoração Santíssimo iha cada domingo no mos cada mensal iha primeira quinta-feira sempre iha adoração Santíssimo ba grupo categorial hot-hotu. Mesmo dehan katak participação dala ruma máximo no dala ruma menos, maibe koko hela haklean tanba Eucaristia mak sai centro. Então atu lori sira fila fali, labele dehan to’o de’it iha Na’in Feto, maibe ho ita Na’in Feto tem qui ba to’o iha Jesus.  Então ami promove devoção ba iha adoração Santíssimo Eucaristia.

            Dala barak ha’u sempre dehan, ha’u iha mehi ida liga ho São Francisco Xavier nia lema dehan “folin saida ó manan mundo tomak, maibe lakon ó nia klamar”. Ha’u nia mehi ida atu dehan katak, molok sai housi fatin ida ne’e ha’u hakarak comunidade sarani ida ne’ebe maduro iha ninia fiar, la dependente ba amululik, la dependente ba ema ida, maibe nia tem que hamrik mesak iha nia fiar para assume cargo sira ne’e hotu. Buat ne’ebe nia halao laos dependente ba amululik, maibe nia mos tem que hatene sarani ninia kna’ar. Segundo katak atu forma sarani ida ne’ebe sai sarani participação ativa, hatene nia dever, hatene nia obrigação, hatene nia direito hanesan sarani ne’e saida.

Ida ikus liu ne’ebe uluk amo bispo matebian fo hela ba ha’u katak, koko atu lori Hatulia nia naran sai missão antiga ida ne’ebe morin. Uluk nia sai dalan fahe Cristãos ba município Ermera, agora nia tem que sai mos hanesan dalan foun ida. Tanba ne’e mak ha’u loke hela colégio masculino ida hodi transforma ema, husi ema nia mentalidade, ema nia fiar no liu housi educacão atu aban bainrua nia sai mos la bele haluhan Hatulia. Tanba ne’e mak ha’u nia luta ida katak molok ha’u sai, ha’u tem que husik hela colégio ida ne’ebe mais perfeita, iha ninia facilidade no bele garantia katak housi colégio ne’e bele fo mos naroman ba ema katak Hatulia hola parte housi produz qualidade humana ba desenvolvimento nação no Igreja.

Ha’u nia mensagem ba sarani sira tomak katak, housi ha’u nia lema ba nação ne’ebe ha’u dehan katak “tanba nia domin apela ba sarani sira katak halo buat hot-hotu ne’e ho domin labele halo buat hotu ho intenção, maibe hanesan ema sarani halo buat hotu ho domin laos ho intenção atu ema gava ita, laos ho intenção atu ema hahi ita, maibe o halo tanba ho domin, halo ho fuan, mesmo ki’ik, maibe nia mais vale duque ó halo buat boot tanba ho intenção folin laiha”. Tanba ne’e mak ha’u nia lema ordenação nian mak “Tanba Nia domin ha’u koko atu hanorin sarani sira atu halo buat hotu ho domin ba Maromak”.

Grupo Acólitos

Esmeralda dos Reis Gonçalves,

Grupo Acólitos hahu nia existência iha Paróquia São Francisco Xavier Hatulia iha tinan 1991. Grupo Acólitos ninia moto mak ‘Serbi atu haboot Maromak nia glória’. Objetivo housi grupo ne’e rasik iha parte haat; ‘prontu atu serbi, la hein atu simu kolen, la buka intenção liu housi ajuda missa no acolitos cumpri hodi haboot Na’i Maromak Nia glória boot liu tan’. Grupo Acólitos serbisu hamutuk ho Amo Pároco wainhira halao pastoral ba iha capela ho estação sira ami nu’udar Acólitos ami prepara sasan missa nian ne’ebe presija iha liturgia.

Atividade Espiritual iha grupo Acólitos nian mak reza terço hamutuk iha paróquia, cada vez iha gruta sira, tuir formação ne’ebe fo housi madre, frater no mos housi amo pároco rasik. Tanba nee, Atividade fundamental liu iha grupo acólitos ne’e rasik mak “servi Na’i iha altar no servi maun-alin sira”. Oras ne’e dadaun membro total grupo Acólitos iha Paróquia São Francisco Xavier Hatulia nian hamutuk 150 pessoas.

Chefe da família

José de Araujo,

Amo pároco hili ha’u sai hanesan chefe da família hodi hala’o kona ba knar família pastoral iha paróquia ida ne’e, grupo ida ne’e hari iha tinan 2015. Amo pároco haruka ha’u ba tuir formação kona ba família pastoral iha Maloa hamutuk ho amululik sira, ohin loron lori hikas mai fali iha paróquia São Francisco Xavier Hatulia hodi halao ba oin.

Grupo família pastoral nia lema maka “Folin sa lerek manan mundo ikus mai lakon duni ona” no objetivo principal iha família pastoral nian maka “família sai hanesan viveiros ne’ebe kari fini ou semeador Maromak nia Futar Liafuan”.

Grupo ida ne’e nia serviço maka tulun amululik sira hodi halao formação iha comunidade base no capela iha suco-suco hodi ko’alia kona ba formação oinsa mak família bele moris tuir moral no espiritual Maromak nian. Espiritual katak atu fo formação kona ba fiar no moral hodi shering hamutuk Bíblia iha família pastoral, iha capela no mos iha comunidade hodi reza hamutuk atu mantein sira nia fiar iha ida-idak nia família.

Ko’alia kona ba social ne’e ami mos fo formação kona ba educação cívica para inan-aman sira bele mantein nafatin sira nia oan atu labele lakon fiar no labele lakon moral iha família laran no mos hodi hadook-an housi sexu livre, hadook-an housi violência doméstica no poupa economia hodi dudu oan sira ba escola e ikus mai fo mos moral kona ba hametin cultura Timor nian.

Ami serviço hamutuk ho amo pároco atu fo formação ba iha capela, iha paróquia no mos iha comunidade basé. Atividade anual maka tempo natal no tempo quaresma ou páscoa ne’e ami tem que tun hamutuk ho amo hodi hala’o shering no reza hamutuk ho comunidade sira hodi fo hanoin nafatin ba sira kona ba fiar.

Obstáculo ou desafio ne’ebe mak ha’u hasoru iha comunidade base ou iha capela maka ita hare era globalização agora, família uluk la hanesan família agora tanba família sira agora ne’e iha desafio oin-oin, dala barak sira kaben tiha bele sés-an tiha housi sira nia kaben e bele husik sira nia oan.

Chefe grupo vocacional

Estefania Francisca,

Grupo vocacional ne’e hahu hari’i iha fulan Janeiro 2013. Vocacional ne’e hanesan grupo ida ne’ebe hari’i atu jovem sira bele hatene hili dalan lolos nian ba futuro. Vocacional ne’e mai husi lian Latin mak vocare katak bolu. Ida ne’ebe bolu mak Na’i Jesus Cristo no ida ne’ebe hatan mak ita sira ne’ebe envolve an iha grupo vocacional ne’e.

Grupo ne’e rasik nia lema principal no fundamental liu sidauk hatene tanba grupo  ne’e rasik nia estrutura sidauk claro, maibe iha ami nia formação sira, ami sempre foti liafuan ida ne’ebe hetan iha Evangelho São João 1:39, iha momento ne’eba Jesus hatete liafuan ida ba nia escolante sira dehan; “Mai hodi haré” katak mai hodi haré Jesus nia moris ne’e oinsa no aprende hahalok diak sira hodi aplica tuir iha ita nia moris.

Grupo ne’e serviço hamutuk ho amo pároco tanba atividade sira ne’ebe grupo ida ne’e hala’o sempre hetan aceitação housi amo pároco, atu nune’e atividade sira bele lao ho sucesso. Ami nia atividade fundamental liu mak coro. Ho razão tanba sarani paróquia Hatulia nian ne’e sempre iha toman ida gosta husu missa urgente. Tanba ne’e mak ami dedica ami nia an tomak hodi hatan ba sira nia necessidade.

Iha desafio uitoan quando iha atividades membro balu participa no balu la participa. Então quando iha ensaio balu ne’ebe que hatene ona canta no balu fali la ensaio depois mai tuir ida ne’e mak estraga uitoan. Ponto positivo ne’ebe ami hetan iha grupo ida ne’e mak formação ne’ebe diak no halo ami hatene ami nia an no ami bele simu ami nia an iha saida de’it no ami mos hatene oinsa moris lolos iha comunidade no hatudu hahalok ne’ebe diak iha comunidade nia leet.

Ami simu formação housi ami nia responsável irmã Santina rasik mak fo mai ami depois dala ruma amo sira no frater sira iha tempo sira mos fo formação ba ami. Espritualmente ami hetan formação hanesan retiro, adoração, confessa tempo forte, missa Eucaristia no mos ami sempre celebra hamutuk domingo bom pastor nu’udar loron especial ba ami. Depois socialmente ami sempre ba visita família sira hodi reza terço hamutuk ho sira iha tempo forte fulan Maria nian hanesan fulan Maio no mos fulan Outubro.

chefe Juventude Carmelitas

Lorença Oliveira Santos,

Grupo juventude Carmelitas hahu hari’i iha paróquia ne’e iha tinan 2013. Iha momento ne’e Pe. Natalino da Costa mak sai hanesan amo pároco. Grupo ne’e rasik nia lema principal ne’e sidauk iha tanba laiha estrutura rasik, tanba ne’e ami foti housi profeta Elias nian ne’ebe dehan serviço maka’as hodi fo sasin kona ba lialos.

Objetivo principal housi grupo ne’e tanba ami nu’udar juventude Carmelitas hamahan an iha ordem Carmelitas nian, ami nia objetivo mak oinsa atu sai jovem ne’ebe diak iha família, sociedade no mos iha Creda.

Ami serviço hamutuk ho amo pároco mak hanesan dala ruma amo pároco sai ba hala’o pastoral iha paróquia dala ruma urgente ami sai hanesan coro. Dala ruma ita sai nu’udar lider iha liafuan barak ne’ebe mai housi ita nia colega sira hodi halo protesto, crítica, maibe ami sei la lakon confiança katak dala ruma ita monu, maibe sempre hamriik fali no ida ne’e sai hanesan força ida ba ami oinsa mak atu bele haburas liu tan grupo ne’e.

Bai-bain iha paróquia, espiritualmente ne’ebe ami halo mak iha tempo forte sira ami tuir retiro, confessa, iha primeira quinta fulan ida nian iha mos adoração Santíssimo. Iha parte social nian dala ruma ami ho irmã sira ba visita família sira hodi reza terço hamutuk, no rona sira nia problema sira ne’ebe mak sira enfrenta. Uluk ha’u seidauk envolve an iha grupo, ha’u la missa, la respeita ema seluk, maibe wanhira ha’u tama iha grupo ida ne’e ha’u hatene descobre Jesus no oinsa ha’u atu sai exemplo ba colega sira seluk.

Kabenain ba Cristo

Eurico Borjes Soares,

Grupo Kaben Na’in Ba Cristo KBK existe iha paróquia Hatulia iha dia 5 de Abril 2016. Iha parseiro na’in 10 mak sai hanesan etapa primeiro no agora ho Na’i Maromak Nia kbiit ami hetan tan maluk sira na’in 10. Ha’u sente iha progresso ka iha mudança boot tebes mai ha’u nia an, tanba uluk ha’u ladun acesso ba iha Bíblia no ha’u la hatene liafuan saida mak iha Bíblia, maibe liu housi grupo ida ne’e sai hanesan motivação diak ida, sai hanesan dalan diak ida no meios diak ida mai ha’u hamutuk ho ha’u nia kaben, ami na’in 2 mos la sente porsento atu bele asseso ba iha lê biblia maibe ami na’in 2 começa ona hatene hodi asseso lê biblia hodi hatene lolos kona ba Na’i  Maromak Nia Liafuan sira ne’ebe iha Bíblia hodi hala’o tuir iha ita nia moris.

Dala barak ami hasoru malu iha fatin serviço nian, iha mercado ou dala ruma iha tempo domingo ami hasoru malu iha Igreja ami sempre conversa ligado ho buat ne’ebe mak ami hetan iha grupo kona ba Na’i Maromak Nia liafuan no mos kona ba progresso ne’ebe mak ami hetan liu housi grupo ida ne’e rasik kona ba ami nia fiar.

Iha problema barak ne’ebe dala ruma ami enfrenta iha ami nia família, depois de tempo ami shering hamutuk ho ami nia maun ou mana boot sira ne’ebe mai housi diocese, ami tur hamutuk hodi koalia no hato’o ba malu kona ba ami nia problema sira, atu nune’e ami bele iha hanoin hodi fo solução ba malu kona ba problema sira ne’ebe mak dala ruma ami enfrenta iha ami nia família.

Ami nia grupo ida ne’e bainhira atu hasoru malu, ami housi báse mak bele halo relatório hodi hato’o ba iha boot sira, maibe iha paróquia ami bele cordena hamutuk ho ami nia padre pároco atu nune’e bele cria atividade ruma mai ami, atu ami bele halo hodi  bele sai hanesan cooperação ida entre ami nia grupo KBK hamutuk ho ami nia amo pároco. Fofoun grupo ne’e foin hari, ami hasouru malu fulan ida ami hasoru malu dala 4, maibe oras ne’e dau-daun tanba atividade serviço, então ami nia hasoru malu ne’e muda fali ba fulan ida dala 1. Colaboração entre grupo KBK ho amo pároco diak tebes tanba ami hamutuk ho amo pároco tun ba capela no estação sira hodi fo formação atu nune’e ami mos bele hetan hetan fini foun iha capela, estação no comunidade sira sel-seluk hodi bele sai nu’udar membro grupo KBK nian. Iha parte social nian, ami grupo KBK coopera hamutuk ho ami nia padre pároco hodi hala’o atividade física ba iha comunidade sira hanesan hadia ka halo rehabilitação ba inan feto faluk  sira nia uma. Desafio ne’ebe ami infrenta iha ami nia grupo rasik hanesan dala ruma iha tempo ne’ebe ami atu halo sorumutu ne’e dala ruma balu mai no balu la mai, depois iha mos parte balu hanesan  atributo grupo nian.

Ha’u hanesan ema foinsa’e ida nebe hola parte iha grupo KBK, ha’u espera katak ba oin  grupo ida ne’e sei sai grupo ida ne’ebe diak no buras. Ami orgulho ho ami nia padre pároco tanba ho esforço amo nian iha paróquia ida ne’e hamosu grupo barak. No liu-liu mai ami grupo KBK mak oras ne’e membrosei menos, maibe agora daudaun ne’e coopera diak tebes ho padre atu nune’e ami bele esforço nafatin buka tan, haburas no  haboot liu tan grupo KBK iha paróquia ida ne’e.

Conselho Pastoral

Plásido Borromeo,

Paróquia ne’e hari iha tinan 1992. Primeiro pároco Pe. Luis Goveia Leite. Desde 1927 paróquia ne’e hanesan missionário ida halo visitador de’it la hetan assistênsia ida ne’ebe klean to’o 1930, começa ona  hari capelinha oan ida. Iha 1936 maka foin halo implementação uituan kona ba pastoral, maibe pastoral ida ne’ebe la adequado ka liu hela de’it.

Inicia sai paróquia ida ho nia pároco primeiro mak Pe. Luis Goveia  Leite, segundo Pe. Adriano Ximenes e terceiro Pe. Natalino da Costa Soares to’o agora. Antes atu sai paróquia Pe. Carlos Rocha no Pe. Mário do Carmo Lemos Belo iha mos Pe. António José Barbosa sira hanesan visitador iha paróquia ida ne’e, maibe semanal de’it no amo sira ne’e mai housi centro paróquia Ermera. Amo Bispo mai visita iha paróquia ida ne’e começa housi Amo Bispo Dom Carlos mai to’o Dom. Alberto Ricardo da Silva mai to’o ita nia Bispo foun hamutuk dala ruanulu resin hitu ona. 

Bainhira Hatulia sidauk sai paróquia, missionário sira halo visita mai ami iha Hatulia iha fulan ida dala rua de’it, maibe quando sai ona paróquia ami la hein ona amululik sira mai housi fatin seluk tanba ami bele tuir missa domingo-domingo no bele simu sacramento confessa ho tan sacramento sira hanesan casamento, primeira comunhão no baptismo iha ami nia paróquia rasik.

Sarani sira começa hatoman an iha dader-dader mai missa no mos bele dehan katak ema sira neébe hetan moras todan ou sira ne’ebe hetan dificuldades bar-barak liu-liu kona ba fiar nian bele hetan assistência housi nailulik ne’ebe mak atualmente iha ne’e. Ida ne’e mak sai hanesan vantagem boot ida ba ami. Ita buka atu colabora no buka atu halo integração ida ne’ebe bele hamutuk atu bele lao ba oin no atu bele lori liafuan catequese ou pastoral ba sarani hot-hotu atu nune’e sarani sira bele conhece klean liu tan kona ba sé mak ita Na’i Jesus Cristo.

Chefe Juventude

Maria de Jesus,

Grupojuventude Paróquia São Francisco Xavier Hatulia hari iha dia 3 de Dezembro de 2002 primeiro chefe juventude iha paróquia São Francisco Xavier Hatulia mak Sr. Francisco Marco de Araujo no mos iha tempo amo Luis Goveia Leite nian. Agora daudaun ha’u lori cargo hanesan chefe juventude hahu housi tinan 2004-2008. Depois de 2008-2016 estrutura juventude nian parado tiha. Tuir fali mai Pe. Natalino da Costa Soares nia tempo eleito fali chefe juventude foun ho naran Ismael Babo. E ha’u mos tama iha estrutura paróquia, maibe ha’u laos chefe juventude atualmente, maibe ha’u hanesan secção liturgia ne’ebe participa iha atividade juventude nian tanba ida ne’e maka juventude mos sai hanesan esperança ba Igreja no mos nação ninian.

Ami grupo juventude paróquia São Francisco Xavier Hatulia, ami nia lema principal foti housi ami nia mahein maka “folin sa lerek manan mundo tomak, maibe se lakon o nia klamar”. relação ho lema ida ne’e, ami mos apár ho lema geral juventude diocese Dili nian maka”Jovem Apóstolo ba Jovem” liu housi ida ne’e ami mos haré fali ba mensagem amo Papa nian ne’ebe fo ba juventude timoroan tomak  iha 1989 dehan katak “Jovem mak Masin Rai nian no Naroman Mundo nian”. housi lema rua ne’e, ami paróquia Hatulia mos foti ami nia lema relação ho ami nia mahein paróquia ninian. Atu dehan katak ho situação ohin loron, ami jovem preocupa liu ba moris mundo nian no la haré ba klamar nian. Tanba ne’e mak ami foti lema ida ne’e atu dada jovem sira bele participa liu-liu atu  preocupa ba sira nia klamar hanesan mos mahein ninia lema.

Principalmente programa ne’ebe ami traça primeiro maka haklaken no fahe experiência moris liu-liu ba jovem sira ne’ebe maka drogado, liu housi formação bele dada sira nia an mai Igreja hodi ba fahe tutan fila fali ba maluk jovem sira seluk no ohin loron ami mos sai hanesan motor ba Igreja ida ne’e hodi dada jovem sira participa ba atividades Igreja nian. Programa ne’ebe principal atu dada jovem sira mak vida espiritual no mos programa vida humanitária ka social nian. Iha vida espiritual ami ba fahe experiência moris no relação ho Bíblia no mos reza hamutuk. Iha ne’eba iha formação kona ba oinsa muda mentalidade juventude nian liu housi drogado sira bele fila fali ba hahalok moral nian. Atividades social ne’ebe mak ami hala’o primeiro iha jogos entre paróquia, estação no capela, segundo halibur jovem sira hamutuk no rona sira nia preocupação no ami mos halo tuir sira nia hakarak tanba jovem ohin loron sira nia característica la hanesan. Iha jovem balu ne’ebe brutalismo no iha balu ne’ebe mak compreende.

Juventude sira iha ne’e cada tinan celebra bei-beik cruz jovem. Ida ne’e sai hanesan juventude sira nia dalan fiar nian nune’e lori nafatin iha sira nia moris lor-loron. liu housi cruz jovem ne’e atu hanourin juventude sira bele hatene no conhece didiak Cristo iha sira nia moris no lori Cristo ba iha belun juventude sira seluk.

Ha’u foti parte espiritual ne’ebe relaciona ho tinan ida ne’e, hanesan tinan BÍblia ne’ebe mak diocese dili fo ba iha paróquia hot-hotu ne’ebe dehan “Bíblia mak We Matan Moris no Mata Dalan Familia nian”. Tanba ne’e iha parte espiritual ami juventude participa hodi simu formação kona Bíblia nian no mos ami participa iha vida espiritual hodi shering Bíblia iha família no halo meditação. Iha atividade parte social nian ami visita família sira ne’ebe mak oan kiak, feto faluk no mos sira ne’ebe kbiit laek. Ami nia plano anual ne’ebe apár ho programa amo pároco nian, wainhira amo pároco cada fulan, cada semanal tun iha capela ou estação, ami juventude sempre pronto para tuir hodi hala’o ami nia atividade.

Vice conselho paroquial

Tóbias de Jesus Martins Gama,

Tema central ne’ebe paróquia foti, baseia ba diocese nian, ne’ebe  tinan ida ne’e dedica liu ba “Bíblia mak we matan moris no roman ba família”. Antes atu tun ba base, primeiro hamutuk ho amo pároco, amo vigário ho grupo categoriais sira hotu hodi halo sorumuto ida atu nune’e oinsa bele prepara atividades pastoral sira.

Atividades ne’ebe Conselho paroquial halo maka: formação housi amo pároco ba grupo hot-hotu atu nune’e entrega programa no atividades tomak ba conselho paroquial ho ninia equipa hodi tun ba base hodi hatutan formação no shering Bíblia ba sarani sira iha estação, iha Capela, iha comunidade basé no mos iha Escola sira.

Plano ne’ebe halo ne’e mak hanesan plano mensal, katak atu haré mos ba plano amo pároco nian tanba amo pároco ninian dala ruma bele urgente nune’e bele fo hela programa ruma atu nune’e  grupo pastoral bele tun ba base ho maneira tun direitamente ba sarani sira atu socializa liu-liu hanesan shering Bíblia, cataquese ho sira seluk tan. Pastoral fahe ba categoria rua ne’e mak urgente no naton. Urgente ne’e ita haré katak dala ruma cerimónia ordenação diacon ka nailulik sira nian no mos ba irmã ka madre sira nian. Naton mak hanesan atu ba fo formação ba comunidade base sira ka sarani sira.

Ita haré situação ida agora ne’e, situação ida ne’ebe fila ba ema ida-idak ninia fiar katak ne’e conciência tanba sarani ida agora ne’e, sarani ida ita dehan katak sarani mate moris tanba dala ruma rona aviso ou programa ruma sira bele participa e dala ruma mos sira la participa tanba liu-liu liga ba fiar. Iha ne’e mos ami esforço an ona tun ba base atu bele haforça no hametin liu tan kona ba Bíblia hodi nune’e sarani sira bele besik liu tan ba Igreja. Ha’u hanoin ho programa no atividades sira hanesan ne’e atu bele haforça no hametin atu bele dada sarani sira besik liu ba Maromak e liu-liu ba paróquia ida ne’e. Kna’ar conselho paroquial ne’e atu haforça no hakbiit plano ka programa amo pároco nian no mos fo tulun ba madre sira hodi nune’e bele alcança objetivo ka mehi paráquia nian hodi hetan sucesso ne’ebe diak.

Tuir ami nia observação, ami haré katak iha Timor iha religião lubuk ida maka tama mai, maibe  paróquia Hatulia religião seluk sidauk tama ami sempre buka no detecta tuir, sé karik religião seluk tama ami sei halo acção ruma hasoru religião sira ne’ebe mak atu mai prega sira ninia doutrina ka sira ninia evangelho iha paróquia ida ne’e.

Família Pastoral ba Vocação

Jose de Araujo

Grupo vocacional hahu hari iha paróquia ida ne’e iha 2004 to’o ohin loron ho nia lema katak “folin sa lerek manan mundo ikus mai lakon o nia klamar”. Objetivo principal housi grupo ida ne’e katak vocação ne’e chamamento ida housi Maromak nian atu kaer kna’ar ida. Tanba ne’e mak iha grupo ida ne’e hili mos chefe da família ida atu controla labarik sira nia inan-aman ne’ebe mak oras ne’e sira nia oan iha seminário no mos iha convento.

Desafio ne’ebe ami hetan mak dala ruma inan-aman lakon sira nia fiar no moral. Então ami hamutuk ho amo pároco tun ba base ou capela sira hodi ba fo formação atu fo hanoin nafatin ba sira atu labele lakon confiança no mos bele dudu inan-aman sira atu mantein nafatin sira nia economia ho fiar no moral. Formação fundamental sira mak hanesan reza hamutuk, shering hamutuk hodi conhece liu no haklean liu tan Maromak Nia futar liafuan. Grupo ida ne’e hari, família sira ne’ebe nia oan ba ona iha seminário ka convento ne’e hamutuk ema na’in 57 ona.  Esperança ba futuro katak vocação ne’e laos ita mak obriga, maibe depende bainhira Maromak bolu ita iha inan ninia knotak ne’e Nia fihir kedas ona no bolu barak, maibe ikus mai hili ida de’it ida ne’e ita labele obriga.

Luciana de Araujo

Joven Ba Cristo (JBC)

Grupo JBC hari’i iha paróquia ida ne’e iha loron 13 fulan Outubro tinan 2017 no ami nia grupo hamriik iha paróquia ida ne’e sidauk to’o tinan. Grupo JBC iha ninia visão mak “Jovem sira sai hanesan Cristo no lori Cristo iha ne’ebe de’it mak sira iha” no ninia missão mak “Hari creda uma nian no creda ki’ik iha kiak sira leet”.

Iha grupo JBC nian buat ne’ebe sai hanesan base fundamental ne’e mak grupo uma kain ne’ebe hari ho ninia objetivo atu reza ba malu entre lider ho ninia membro sira, atu nune’e bele continua sira ninia vida espiritual iha sira nia moris tanba jovem agora ne’e la hanesan jovem uluk nian tan ne’e mak grupo JBC cria grupo uma kain atu bele tulun malu liu husi reza.

Liu housi buat sira hanesan ne’e mak jovem sira sente hanesan buat nebe interesante los iha sira nia vida lor-loron tanba husi grupo ne’e foin lalais iha ema na’in 40 tuir camp nebe composto husi jovem sira nebe diferente iha paróquia refere então liu husi formação ida ne’e sira ida-idak transforma sira nia an. Por ezemplo joven sira dala barak atu ba missa ne’e hein deit to’o natal no pascoa mak ba missa dala ida maibe liu husi formação nebe ami hato’o ba sira então iha mudança katak iha domingo-domingo nebe la mai missa ne’e começa mai missa fali, no sira gosta teb-tebes hakbesik an ba igreja. Ami mos iha estrutura atu bele hala’o ida-idak nia kna’ar  tuir maneira ka estrategia ida-idak nian atu bele atrai joven sira mai iha igreja liu husi grupo categorial nebe mak iha ona.

Iha ita nia moris ne’e sempre iha desafio la’os dehan atu hili de’it, maibe ha’u lakohi atu koalia dehan ha’u tenki hasoru desafio iha momente nebe ha’u lidera joven sira tanba joven sira mai husi caracter nebe diferente então ita sai hanesan lider ida ba joven sira, ita mak tenki uza consencia maka’as ba ita nia membro sira no oinsa mak bele  ukun sira tanba caracteristica sira nian ne’e mais diferente tebes maibe ita tenki controla sira iha momento atividade saida deit tuir situação no condição ema ida-idak ninian nebe mak infrenta iha vida.

Nu’udar jovem, ita haré fila fali ba liafuan amo Papa ninian ne’ebe dehan katak, jovem sira mak sai hanesan Masin no Naroman mundo nian. Então hanesan jovem hakarak atu dezenvolve ita ninia comunidade, ita nia sociedade, ita nia Igreja no ita nia nação. Ha’u espera katak, ha’u mesak de’it labele haburas programa sira iha paróquia ida no iha nação, maibe hamutuk ho ha’u nia belun sira ho ita nia força ho físico sei labele maibe ho Maromak buat hotu sei bele.

Membro grupo Carismático

Albino Soares,

Carismático mak hanesan dalan fiar ida ba Cristo no moris  hamutuk iha dalan Cristo nia lialos. Grupo Carismático hahu tama iha Timor iha tinan 1993, iha tempo Dom Carlos Filipe Ximenes Belo nian. Depois de funu no hahu continua fali iha tinan 2001 no tama mai iha paróquia Hatulia ne’e iha tinan 2016. Momento ne’eba ema ne’ebe lidera grupo carismático iha paróquia Hatulia mak Sr. Amadeo housi paróquia Catedral Dili. Nia mak sai hanesan chefe ou coordenador ba grupo carismática nian.

Grupo carismático nia lema maka “Moris foun iha vida Espírito Santo” no ami nia atividade fundamental mak haklaken Evangelho ka hafoun hikas hanoin no converte an ba Na’i Maromak. Grupo carismático serviço hamutuk ho amo pároco mak hanesan ajuda Igreja ou serviço hamutuk iha Igreja tuir dalan Igreja nian no hakru’uk ba hirarkia Igreja Católica nian.

Grupo carismático nia atividade espiritual mak reza hamutuk iha cada loron quinta-feira hodi husu Na’i Maromak Nia tulun ba ema sira ne’ebe mak hetan moras, hodi cura sira nia moras liu housi dalan ne’ebe Na’i Jesus hanesan Aman ba carismático ne’ebe hanorin mai ita. No ami nia atividade social nian mak hanesan ajuda aihan ka ajuda sasan ou bonus ne’ebe housi diocese catedral mai hamutuk ho paróquia Hatulia hodi fo ajuda ba ema ne’ebe kbiit laek iha comunidade paróquia Hatulia nian.

Wanhira atu reza ba ema moras sira ne’e dirige housi chefe do grupo hodi tula liman ba ema ne’ebe moras, atu nune’e salva nia. Tula liman ne’e la significa katak força ka tulun ne’e housi chefe do grupo ne’e rasik, maibe força no tulun ne’e hatutan husi Na’i Jesus tanba Jesus mak doutor housi doutor hotu-hotu nian.

Tuir ha’u nia sentimento wainhira envolve an iha grupo ne’e nia laran katak, mesmo grupo ne’e ita bele dehan conhecido entre grupo sira seluk iha diocese, maibe tuir ha’u nia sentimento no observação iha paróquia Hatulia katak grupo ne’e ema menos, ha’u hanesan oan ida housi inan aman ne’ebe carismático, la’os hadau direito inan-aman nian, maibe hakarak reforça ka hadian liu tan grupo ne’e atu nune’e sai grupo ne’ebe mais conhecido iha paróquia Hatulia nian.

Ha’u nia mensagem ba maluk sira hotu katak ha’u la’os permanente iha paróquia Hatulia, maibe ha’u mos hanesan estudante ne’ebe buka experiência housi fatin seluk mesmo iha tempo ruma ita bele hamutuk reforça grupo ne’e iha Hatulia. Ha’u nia esperança ba oin katak hakarak grupo ne’e ema aumenta tan mesmo que dificuldade oi-oin tanba haré ba realidade dificuldade ne’ebe grupo ne’e hasoru mak wanhira tempo ne’ebe rame, hot-hotu hamutuk, maibe tempo ne’ebe diocese catedral sira la mai então ne’e ema la mosu. Quando to’o tempo fahe sasan ne’e ema barak no quando to’o tempo atu reza iha quinta ne’e ema menos. Ida ne’e ha’u labele obriga ema atu tama tuir dalan Maromak nian, maibe precisa hatene katak Maromak bolu ita la’os tan sasan, Maromak bolu ita la’os tan rame, maibe oferece ita nia fuan no laran tomak ba Maromak, ida ne’e mak princípio importante liu.

II Vice Escuteiro

Manuel Ximenes

Grupo Escuteiro tama iha paróquia ida ne’e hahu iha 1995, ne’ebe lidera housi ha’u nia belun ida naran José de Araujo. Tuir fali mai ha’u ata rasik mos inclui ona iha grupo ne’e, hamutuk ho colega sira seluk hanesan, colega ida matebian ona ne’ebe uluk sai hanesan chefe segurança, tuir colega Sebastião Mota de Araujo, maibe agora la ativo ona, no tuir colega Francisco Brites ne’ebe agora sai hanesan professor iha escola 20 de Setembro Hatulia.

Lema escuteiro nian mak “escuta foti oin nafatin hodi bele hala’o iha nia moris tomak” no escuta ninia princípio mak fo ninia sentido ba Creda no tau segurança iha evento boot sira hanesan visita amo bispo nian no iha loron boot sira hanesan Natal ho Páscoa. Grupo escutismo sempre iha relação diak ho amo pároco tanba amo pároco sai hanesan dirigente boot religioso nian. Ne’e duni coperação entre escuta ho amo pároco ne’e diak teb-tebes.

Atividade fundamental grupo escutismo nian mak ami tem que halo segurança ba iha visita amo bispo nian ne’ebe hala’o iha fatin-fatin no ami tem que to’o uluk iha fatin ne’ebe amo bispo sira atu hala’o visita ba. Ami tem que hala’o atividades conforme housi ami nia amo pároco. Karik grupo escutismo hakarak halo atividade ruma iha Igreja hanesan kuda ai-oan ou atividade sira seluk ne’e ami sempre pronto atu hala’o.

Ha’u nia esperança ba oin katak, iha ami nia tempo ne’e colega barak mak serviço no ha’u mos ba serviço tiha, então grupo ne’e começa mihis ba daudaun. Foin mak iha 2017 ne’e amo pároco halo atividades ne’ebe forte hodi dada escuta liu housi estudante sira iha escola nune’e ikus mai grupo escutismo ne’e aumenta ba ema na’in 75 ne’ebe mak agora ativo hela iha paróquia ida ne’e hodi sai forte tanba foin daudaun ne’e sira ba tuir acampamento iha nivel nacional nian no agora ba oin ami buka meios atu grupo ne’e bele aumenta sai diak liu tan.

Grupo movimento JP II

Julio Mesquita Soares

Total membro grupo movimento João Paulo II ne’e hamutuk 30 pessoas. Ami nia grupo ne’e sempre odamatan nakloke ba jovem sira só que jovem sira mak lakohi iclui iha ami nia grupo ne’e. No agora daudaun ne’e maioria kabenain sira mak tama iha grupo ne’e, maibe tuir lolos kabenain sira tama iha grupo Kaben Na’i ba Cristo, maibe tanba grupo ida ne’e hari uluk no grupo Kabenain ba Cristo sidauk tama iha paróquia ida ne’e, então amo pároco haruka tama ba grupo movimento João Paulo II.

Grupo movimento João Paulo II hari’i iha dia 8 de Fevereiro 2015 wanhira Ilas Na’in Feto ho Cruz Jovem mai visita paróquia Hatulia. No iha tempo ne’eba ami hamutuk ema na’in 25 de’it, maibe depois balu mai tan hodi aumenta to’o ema 30 no sai lolos agente pastorais iha paróquia ida ne’e iha dia 16 de Abril 2015 iha páscoa-domingo resureição ne’ebe ho ninia lema katak “Imi mak masin rai nian no naroman mundo nian” nebe hakerek iha Bíblia Mt. 5:13-14.

Iha buat rua ne’ebe importante iha amo Papa nia homilia wanhira mai visita Timor iha tasi tolu, katak masin conserva hahan no fo sabór mos ba hahan, maibe iha Evangelho amo Papa rasik hateten masin katak atu ita labele monu ba tahu dodok, labele monu ba sala foer no lori ita ba pecado, maibe atu lori ita ba dalan ne’ebe los no dalan ida ne’ebe diak. No naroman laos atu ko’alia kona ba revelação lia los Maromak ninian, maibe atu koalia mos kona ba matenek nian atu muda mentalidade sarani nian liu housi vida espiritual atu nune’e ita bele tuir dalan naroman nian.

Objetivo principal grupo ida ne’e nian mak atu serviço ka ajuda amo pároco sira iha diocese ka iha Igreja kona ba atividade sira. Tanba ne’e mak amo pároco loke grupo ida ne’e atu ami bele envolve iha laran. Hanesan grupo ne’ebe existe iha paróquia, ami tem que obedece ba amo pároco tanba amo pároco hanesan superior ba grupos categorias hot-hotu nebe mak existe iha paróquia ida ne’e no ami serviço hamutuk ho amo pároco, amo vigário ou conselho pastoral sira haruka.

Atividade principal ne’ebe hahu housi 2015 to’o ohin loron mak ami hanesan segurança iha Igreja no colabora ho escuteiro sira hodi acompanha iha tempo missa boot ruma ou quando amo bispo mai visita ami nia paróquia ne’e ami sempre acompanha no mos dala ruma amo pároco ba iha capela, estação ou iha paróquia sira seluk amo sempre husu ami nia apoio atu acompanha ba fatin-fatin sira. Grupo ida ne’e quando iha plano atu hala’o buat ruma ne’e la lao mesak tem que colabora ho amo pároco, maibe ida ne’e mos haré ba ema ida-idak tanba dala ruma balu concorda no balu la concorda. Então ida ne’e mak sai hanesan obstáculo ida ba ami tanba balu mai no balu la mai, maibe ami iha plano nafatin atu bele hadia grupo ida ne’e sai hanesan lalenok ba ema seluk.

Espiritualmente grupo ida ne’e liga fila fali ba liafuan ne’ebe bainhira Santo Padre sei moris ne’ebe tatoli hela ba foinsa’e sira, sarani sira iha mundo katak hakbesik an ba Cristo iha Eucaristia, iha confessa no mos iha atividade espiritual sira iha Igreja atu bele hadia ita nia klamar. No ami mos sempre halo ação social nian hanesan caridade ida katak bainhira iha família ida ne’ebe mate, ami grupo ida ne’e pronto atu ajuda to’o mate isin hakoi no ami la husu kolen, no ajuda inan faluk sira ne’ebe precisa atu halo sira nia uma ami sempre pronto maske ami nia apoio mak ami nia força de’it tanba ami iha ne’e maioria laos funcionário.

Ami nia esperança ba oin katak sé bele cada grupo sira ne’e,  diocese ou amo sira bele iha hanoin atu bele cria estatuto ida atu grupo ne’e labele mate tem que iha continuação nafatin atu nune’e maluk sira ne’ebe tuir fali mai ne’e bele continua nafatin buat ne’ebe iha ona. Se buat ne’ebe la diak soe tiha, maibe buat ne’ebe diak tem que hala’o nafatin.

Grupo leigos Maria

Aquelina Martins

Grupo leigos Maria hahu hari iha paróquia São Francisco Xavier Hatulia iha loron 12 fulan Abril tinan 2015. Iha momento ne’eba iha história badak ida katak ami nia amo pároco fo responsabilidade ba ami atu toma conta missa iha domingo ramos no iha momento ne’eba mak amo iha iniciativa ida hodi forma grupo ida ne’e ho naran grupo Leigo Maria.

Ami nia grupo ho nia lema katak “Labele hahu atu para no labele para atu hahu”. Atu dehan de’it katak, bainhira hari grupo ida labele hari ohin aban para no labele para tiha depois hahu hari fali. Objetivo principal housi grupo ne’e mak atu servi ba Creda ho neon ho laran tomak. Ami nia grupo serviço ho amo pároco iha parte vida espiritual no mos iha parte social. Iha vida espiritual hanesan iha tempo Advento ou Quaresma ami fo retiro ba comunidade sira, ba capela ou estação sira, ba estudante sira. Ami tuir bebeik formação kona ba vida espiritual nian, ami halo atividade iha Igreja hanesan limpeza iha cada semana, simu mos visitante ruma housi fatin seluk ne’ebe mai paróquia ida ne’e, no ami colabora hamutuk ho amo atu bele tulun amo sira iha programa saida de’it ne’ebe mak estabelece iha paróquia ida ne’e.

Ami nia grupo Leigo Maria hahu hari’i ho membro total hamutuk ema 72 no ami hanoin katak membro ne’e fixo ona, maibe to’o ikus mai iha membro balu iha assunto la hanesan, iha preocupação família no buat seluk tan, então housi ami nia regra rasik mos decide katak grupo ne’e iha membro ativo no membro auxiliar. Membro ativo ne’e katak nia halo pastoral no participa ativamente iha qualquer atividades ne’ebe realiza iha grupo. No membro auxiliar ne’e atu dehan katak nia la participa ativo iha pastoral sira iha atividades semana-semana, maibe ninia kna’ar ne’e atu halo oração de’it iha uma hodi tulun fali membro ativo sira hodi hala’o sira nia pastoral.

Desafio sempre hasoru tanba atu dehan katak grupo ne’ebe ho voluntariamente servi ba Creda iha dificuldade bar-barak ne’ebe mak ami hasoru. Dala barak programa ne’ebe mak fixo ona tuir manual ne’ebe mak iha ona pedoman leigo Maria nian, dala barak ami hala’o no dala barak mos ami enfrenta problema hanesan iha desentendimento iha grupo laran, dala ruma participa pastoral ne’e ladun ativo tanba mai housi ami ida-idak ninia hanoin ne’ebe mak dala ruma mos desentedimento iha ami nia grupo kona ba programa sira. Ba ha’u nia an rasik ha’u sente tama grupo ne’e iha buat positivo barak ne’ebe iha vantagem boot ba ha’u mak bainhira tama iha grupo ne’e ami halo devoção ba Na’in Feto semana-semana to’o ami ida-idak tuir retiro ho amo pároco ba fatin-fatin hodi fanu fali ami nia vida espiritual haklean fali ami nia fiar kona ba ami nia programa sira no lori ami ba hakbesik liu tan ba Nai Maromak. Sidauk tama ba grupo ne’e dala ruma ha’u rasik falta missa barak, dala barak ha’u mai missa ne’e só tuir iha loron boot deit, maibe depois inclui iha grupo ne’e ha’u sente katak buat ne’ebe lori ha’u hakbesik liu tan ba Maromak.

Cordenador Apostolado oração.

Blásido Boromeu

Paróquia ida ne’e hari’i iha 1998 ho nia lema “Se mak tuir ha’u tem que husik buat hot-hotu” no objetivo principal housi grupo apostolado oração maka iha fulan ida dala ida tem que halo Adoração ho missa devoção no atividades pastoral ne’ebe mak iha ona. Grupo ida ne’e ita bele dehan katak ajuda amo sira hodi halo netik hanesan culturação, plantação ou bele iha serviço ruma ne’ebe mak necessário ba paróquia ninia própria atividades apoltulado sira envolve iha laran.

Iha fulan Agosto nia laran ne’e iha atividades kona ba apostulado oração ninian maka atu haré liu ba ema moras sira iha hospital no haré mos ba sira ne’ebe mak mate. Presença apostolado oração nian hodi hamutuk ho sira ba hakoi ou se moras karik tem que lori ba hospital ou se iha dificuldades ruma karik ita fo liafuan ruma atu sira bele sente hakmatek hodi simu buat ne’ebe mak sira hasouru. Começa housi hari’i grupo apostolado oraçao to’o mai agora ne’e hamutuk lolos ne’e ema 722, maibe tanba balu mate no balu mos sés tiha fali ba fatin seluk, nune’e menus tiha fali ba 586. Iha mos membro foun tama ba grupo ne’e hodi taka ba maluk balu ne’ebe mak mate ona. Iha mos critéria ba sira ne’ebe hakarak tama ba grupo apostolado oração katak ema tem que disponível no ema mos tem que decide lolos katak nia hakarak tama iha organização ida ne’e e. Nunue’e mos hanesan ema gelador sira tem que ba hato’o saida mak apostoldo oração ninia caracter serviço e oinsa mak ema bele tama no compreende buat ruma ona mak bele tama ba grupo ne’e.

Apostolado oração ninia atividades fundamental mak fulan ida dala ida iha Sexta-Feita tem que missa no tuir adoração Santíssimo Eucaristia. Iha mos formação ho tan atividades extra ne’ebe maka paróquia iha ona. Atividade social ne’ebe grupo ne’e halo maka dala ruma membro balu mate, sira tem que halo contribuição uitoan kona ba hahan ba necessário atu hader iha mate uma to’o hakoi, ida ne’e desde grupo ne’e hari’i  hala’o nafatin to’o ohin loron.

Desafio ne’e iha ne’ebe deit sempre iha, maibe ita la bele haré ba desafio ne’ebe mosu mai, ita tem que buka meios atu bele hases an housi desafio ne’ebe mosu mai. Se desafio ne’e mosu mai mak ladiak ita precisa hadia ou se desafio ne’ebe mak ita haré boot liu, ita tem que colaborado ho pároco atu bele intervenção imidiata atu nune’e desafio sira ne’e ita mantein nafatin hodi la’o nafatin ba oin. Esperança ha’u nian maka ne’e, buka meios tem que halo esforço ida hamutuk nafatin ho Creda no hamutuk nafatin ho pároco atu saida de’it maka precisa ita hamutuk hodi lao nafatin ba oin to’o Maromak bolu ita.