História Arquidiocese de Dili

Iha loron 4 fulan Setembro, Arquidiocese Dili halo tinan moris ka ereção nian. De facto, iha loron 4 Setembro 1940, Amo Papa Pio XII dehan ho surat ka bula Solemnibus Conventionibus, harí iha Colónia Portugués Timor, Diocese ida. Iha documento nebá, Amo Papa Pio XII hakerek: “Ikus liu, iha ilha Timor, iha região nebé depende ba República Portuguesa, to’o agora jurisdição diocese Macau nian, ami haketak housi Macau no foti hanesan diocese nebé sei bolu Díli no ami constitui nia sufragánea housi Igreja Metropolitana Goa nian no ami sujeita bispo sira pro tempore ba direito Metropolitano Arcebispo Goa, Damão no Diu”.

Ho surat, Amo Papa Pio XII foti Bispo ba Diocese foun, Vigário Geral no Superior das Missões de Timor, padre Jaime Garcia Goulart, ema housi Açores; nebé iha loron 18 fulan Janeiro tinan 1941, sai Administrador Apostólico ho dignidade Monsenhor nian.

Iha tinan 1940, Diocese Díli halaran (abranje) rai Timor Loro sa’e tomak. Missão ka paróquia iha tinan ne’ebá: Paróquia de Díli, Missão de Manatuto, Missão de Soibada, Missão de Oe-Cusse, Missão de Baucau, Missão de Ossú, Missão de Hatolia, Missão de Suro (Ainaro), Missão de Alas.

Amu-lulik sira Iha Díli: Monsenhor Jaime Garcia Goulart, Administrador Apostólico; padre Artur Basilio de Sá, ecónomo, padre Jacinto António de Campos; Iha paróquia Díli: padre Porfírio Francisco Campos no padre Alberto da Ressurreição Gonçalves; Missão Manatuto: padre Diogo José d’Almeida no padre Ezequiel Enes Pascoal; Missão Soibada: padre Januário Coelho da Silva no padre Jorge Barros Duarte no padre Manuel Luís; Missão Oe-Cusse: padre Francisco Durão Quintão; Missão Baucau: padre Francisco dos Santos Afonso no padre Manuel António Serra; Missão Ossú: padre Norberto Parada; Missão Hatolia: padre Francisco Madeira, no padre Carlos da Rocha Perira, Missão Suro (Ainaro): padre Norberto Amaral no padre António Pires; Missão Alas: padre António Grebaldo Fernandes.

La kleur de’it funu japonés hahú: Tan ba situação susar, Mgr. Jaime Garcia Goulart ho amu-lulik balu no madre Canossiana sira sees tiha hodi ba hela iha Australia, to’o fulan Desembro 1945. Iha fulan Outubro, Mgr. Jaime simu ordenação episcopal iha Sydney. Nia mak Bispo Dili nian ba dala uluk. Dom Jaime ukun Diocese Dili to’o tinan 1967.Troca nian, amu Bispo Dom José Joaquim Robeiro. Iha tinan 1975, hahú invazão Indonesia. Tanba situação política, iha loron 1(1) 1976, amo Papa Paulo VI halo dekretu ida hodi submete Diocese Dili ba Santa Sé (Vatikanu). Iha tempu okupação. La iha Bispo residencial, maibé Administrador Apostólico ad nutum Sanctae Sedis. ukun Diocese Dili Administrador Apostólico Monsenhor Martinho da Costa Lopes(1978-1983) no Monsenhor Carlos Filipe Ximenes Belo,SDB (1983-2002).

Iha tinan 1996, Diocese Dili fahe ba rua: Diocese Dili no Diocese Baucau (Bispo Dom Basílio do Nascimento). Bispo Carlos Filipe resigna tiha, ukun Diocese Díli hanesan Administrador Apostólico, Dom Basilio do Nascimento, Bispo Baucau nian. Iha tinan 2004, tan ba situação normal fali ona, Santa Sé foti Dom Alberto Ricardo ba Bispo de Dili. Tan ba Dom Alberto mate, Vaticano foti tan Dom Basílio hanesan Administadór Apostólico.

Iha tinan 2010, Diocese Dili fahe tan dala Ida: Diocese Díli no Diocese Maliana (Bispo Dom Norberto Amaral).

Iha tinan 2014, Santa Sé hili Pe. Virgílio do Carmo da Silva, S.D.B. ba Bispo Diocese Díli, no iha loron 11 fulan Setembro 2019, Amo Papa Francisco harii Província Eclesiástica iha Timor-Leste, no foti Dom Virgílio ba Arcebispo.

Bispo sira ne’ebé ukun Diocese Díli, no ikus ne’e Arquidiocese Metropolitana:

D. Jaime Garcia Goulart (Administrador Apostólico: 1941-1945; Bispo: 1945-1967)

D. José Joaquim Ribeiro (Bispo Coadjutor: 1965-1966; Bispo: 1967-1977)

Mgr. Martinho da Costa Lopes (Administrador Apostólico: 1977-1983)

D. Carlos Filipe Ximenes Belo, S.D.B. (Administrador Apostólico: 1983-1988; Bispo: 1988-2002)

D. Basílio do Nascimento (Administrador Apostólico: 2002-2004)

D. Alberto Ricardo da Silva (Bispo: 2004-2015)

D. Basílio do Nascimento (Administrador Apostólico: 2015-2016)

D. Virgílio do Carmo da Silva, S.D.B. (Arcebispo: 2016- …)

Parabéns ba Arquidiocese Dili, Parabéns ba Amo Arcebispo, amu-lulik sira, madre ka irmã sira, irmão religioso sira, catequista sira, seminarista sira no sarani no povu tomak. PARABÉNS!

Lisboa, 3 de Setembro de 2020 Dom Carlos Filipe Ximenes Belo,SDB