DCAD (03.09.2026) – Dom Leandro Maria Alves Bispo da Diocese de Baucau haktuir liafuan hirak ne’e, liu husi ninia homilia iha missa ba presença Urna Monsenhor Martinho da Costa Lopes nian iha Paróquia de Santo António Manatuto Diocese de Baucau.
Dom Leandro hateten, Monsenhor nuudar Manatuto oan ida no sai figura importante iha povo no Cristão Timoroan sira nia história. Presença Urna Monsenhor Martinho da Costa Lopes nian ne’e nuudar mos momento reencontro ida no sai mos nudar momento de reflexão nian atu relembra fali hahalok, ação diak sira hotu no missão pastoral sira nebé mak sai legado Monsenhor Martinho da Costa Lopes nian.
Baseia ba Monsenhor Martinho da Costa Lopes ninia kna’ar nudar administrador apostólico Diocese Dili nian, Dom Leandro afirma katak, “bainhira Monsenhor hanesan administrador apostólico nia halao nia knaar atu bali ninia povo, bali ninia bibi sira, cuidado ninia bibi sira ho nia domin tomak hanesan Nia bali timoroan sira hotu durante moris iha terus no susar nia laran.
Dom Leandro mos conciente katak, Monsenhor nia presença lori esperança mai ita hotu, basá hanesan iha São Paulo nia carta ba sarani sira iha Roma dehan ; esperança halo ita laran la nakraik, esperança la bosok ita. Nunee, Monsenhor mosu iha ita nia leet atu fo esperança mai ita, fo esperança ba timoroan sira, esperança ida nebé atu tau confiança iha Na’i Maromak, Nia la lori esperança nebé sem Na’i Maromak, maibe buka atu hatur metin iha Na’i Maromak.
Atu conclui ninia reflexão bibia atan ne’e hateten, Sacrificio barak mak Monsenhor halo ona ba povo Timor. Agora ita iha liberdade ona, ita moris iha democracia nia laran, maibe keta haluha ita nia fiar iha Na’i Maromak, hametin nafatin ita nia fiar iha Na’i Maromak hodi bele desenvolve ita nia nação nebé mak Monsenhor hadomi no ita mos hadomi.
