Homilia
Arcebispo de Dili, Dom Virgílio Cardeal do Carmo da silva
CELEBRAÇÃO EXISTÊNCIA XXXIX ANIVERSÁRIO DA EXISTÊNCIA DO SANTUÁRIO DA VIRGEM PEREGRINA FATUBESSI E ORDENAÇÃO
Sarani doben sira, vocação ne’e graça ida kmanek liu nebé Maromak haraik mai ita ema! Mistério ida klean liu nebé Maromak hatudu mai ita ema no história domin nebé Maromak halo ho ita ema. Graça ne’e mak transforma ema nia moris no história husi ida nebé bai-bain ba extraordinário. Husi ida nebé ema la fihir, maibe iha folin boot iha Maromak nia matan; husi ida nebé ema hewai maibe Maromak hili atu hatudu Maromak nia domin nebé boot ba nia humanidade.
Domin Maromak nian mak transforma fragilidade, fraqueza ba força; incapacidade ba comfiança; infidelidade ba conversão; husi sala nain ba misericórdia. Sira hotu nebé Maromak bolu koko ida ne’e iha sira nia moris vocação nian.
Vocação ne’e mistério ida tan dala barak ema labele comprende Maromak nia plano no nia escolha. Força husi esquema comum ita ema nian maibe ita bele hetan de’it ho fiar no obidiência. Maromak la hili tuir mérito pessoal ruma ka baseia ba ema nia capacidade força matenek, maibe nia bolu sira nebé nia fihir, Nia hadomi moris nudar nia oan belun no atan sira nia estatus social. Maromak bolu sira atu hola parte iha nia missão, sira ema bai-bain maibe wainhira Maromak tama iha sira nia moris, comunica nia vontade- iha neba mak Nia transforma ema husi laran hodi halo sira tama iha experiência fiar nian nebé klean. Sira lao iha dalan nebé Maromak mak conduz, sira husik sira nia moris toman no tuan hodi hahu moris foun. Hatan ba iniciativa Maromak nian ne’e, Maromak husu ema nia resposta nebé nakonu ho fiar, domin, humildade, obidiência, hatene sacrifica nia an.
Ita bele hare experiência sira hanesan ne’e iha Bíblia hanesan figura Abrão, Moises, David, José, Zacarias no Maria, sira nia vocação hatudu mai ita katak iniciativa primordial Maromak nian Nia mak bolu, hili sira hodi haraik ba sira missão ida atu lori iha sira nia moris. Ema bai-bain maibe Maromak transforma, Maromak mak muda ema nia história sai extraordinário.
Hanoin fali saudoso Papa Francisco iha nia discurso tinan rua liu bai ha Catedral, iha frase ida nebé interassante nebé nia koalia kona ba periferia, maibe Jesus bolu sira no ikus mai sai protagonista Esperança nian. Papa fó emfase katak sira nebe iha periferia mak centro Evangelho Ninian no dala barak iha experiência Maromak fihir ida nebé iha periferia, mundo la hare, la sura no la concidera. Nemak atu hatur iha centro hodi foti no fó dignidade ba nia no halo nia moris sai exemplo ba ema barak.
Ohin tur iha ita nia oin, ita nia maun-alin ida narak Zacarias lakleur sei simu ordenação Amululik nia mai husi suco Manusae. Husi rai kikoan ida ne’e mak Maromak bolu Manusae nia oan ida atu sai nailulik. Iha ema nia matan Manusae ema la fihir karik, maibe Maromak fihir nia hodi sai centro Maromak nian.
Iha liafuan malae sira nian dehan Nomem est Homem katak o nia naran mak ó nia destino. Naran Zacarias nebe ita nia maunalin ne’e lori mai husi lian Hebraico Zacaraia “senhor se lembrou” Na’I hanoin hetan fali hodi fihir no hili nia husi rai ida nebé ohin ita dehan ne’e atu hatur nia iha centro ba Maromak nia domin, nia atenção no nia providência.
Diácono mos hili nia lema “Deus providienciará” hatudu moris ida nebé Entrega de’it ba Maromak ida ne’e mak Zacarias nia vocação.
Nune’e Maromak nia liafuan nebé hakarak transmite mai ita iha loron ohin mak ne’e Keta tauk! Tan Maromak rasik mak sei halo Nia roman nabilan iha ó. Iha Isaías ita hare lia Esperança kona ba roman nian.
Carta iha Segunda leitura ba hebreu sira hanorin ita katak roman husi Maromak nabilan ba fatin hotu hodi apresente sacerdote nudar ida nebé sai fonte entre Maromak ho ema. Nailulik nia missão mak atu sai fonte hodi liga ema ho Maromak, ema ho ema no ema ho criatura.
Jesus mak nailulik boot nebé moris hodi halo tuir de’it Aman Maromak nia hakarak. Nailulik boot nebé iha laran sadia ba sira nebé moris iha ignorância sala laran hodi halo nia hatais fragilidade. Ida ne’e sai nudar mensagem ida nebé forte mai ita ema fiar nain sira katak Maromak la husu ita atu hatudu an katak ita forte no dook husi sala sira. Ita hirak ne’e sente salanain maki ta mai baku ain to’o iha fatubessi tamba ita nia devoção.
Cristo hatene todan husi ita nia matawen sira, ita nia halerik iha oração sira iha momento prova nian. Ita nia Diácono Zacarias ba ministério nebé ohin atu simu la hatur iha ita ema nia perfeição, maibe hatur liu-liu iha Maromak ninia misericordia.
Iha memória rainha nebé ohin ita celebra iha Virgem Santuário Fatubessi lori ita ba contempla grandeza husi figura Nain Feto Ninian. Iha momento nebé nia concidera nuda ratan, nia coroa mak nia disponibilidade hodi hatan ba Anjo Ha’u mak ne’e. no nia regalidade mak iha nia obidiência total ba Maromak nia plano. Nudar ema nia tau buat hotu iha nia fuan hodi halo tuir deit.
Rai buat hotu iha fuan mak modelo moris sacerdócio nian. Ida ne’e mak halo ema nebé Maromak bolu be lao dook no dia iha nia missão hodi tau nafatin comfiaça no Esperança iha Maromak katak Maromak mak sei aprecia, Maromak mak sei tau matan.
Caro diácono! Wainhira dúvidas, kole, desafio sira mai tuku ita boot nia odamatan ita boot nia lema “Deus Providiênciará mak sei inspira moris nailulik nian, fo força hodi continua lao iha missão lulik ida ne’e. no fiar nafatin katak Maromak la husik hela ida nebé Nia bolu iha dalan klaran, Nia sei lori to’o rohan buat nebé hahu ona iha ó.
Ita husu graça Maromak nian, atu liu husi Eucaristia ida ne’e bele transforma ita nia moris, atu ita hotu hamutuk ho diácono Zacarias bele sai sasin visível damen, domin, providência no misericordia Maromak nian bai ta nia maun-alin sira.
