DCAD 16.01.2026 – Relaciona ho Dom Virgílio Cardeal do Carmo da Silva, SDB ninia visita oficial pastoral no diplomático iha Portugal, ho objetivo principal hala’o encontro importante sira ho Patriarca Lisboa nian, Arcebispo Évora no Bispo Açores nian no Engenheiro José Manuel Noites (senhor ne’ebe oferece ninia campa ba Diocese Évora hodi haloot Dom José Joaquim nia isin mate, molok halo trasladação ba iha Panteão dos Arcebispos Évora nian).
Agenda principal ida iha visita ne’e mos mak trata assunto kona-ba lori fila restos mortais husi Bispo nain rua ne’ebe origem husi Portugal, ne’ebe lidera Igreja Diocese Dili iha momentu início Diocese hamriik iha Timor-Leste. Além de ne’e, iha mos Monsenhor Martinho Lopes, Timor oan ida ne’ebe sai husi Timor tan situação política husi invasão no ocupação Indonésia nian iha Timor-Leste.
Durante iha Portugal, Dom Virgílio Cardeal hasoru malu ho Patriarca Lisboa nian, Dom Rui Valério hodi koalia kona ba repatriação Monsenhor Martinho nia resto mortais. Hasoru mos Arcebispo Évora nian, Dom Francisco hodi koalia kona ba restos mortais Bispo Dom Jose Joaquim nian no hasoru malu mos ho Dom Armando, Bispo Açores nian liu hosi google meet hodi koalia kona ba restos mortais husi Dom Jaime Garcia Goulart nian. Encontro ne’e lao kapas tebes iha âmbito maun alin Creda nian ne’ebe nakonu ho respeito histórico naruk relação Igreja Portugal no Igreja Timor-Leste.
Tuir informação ne’ebe iha, Bispo nain tolu Portugal nian sira simu diak tebes Igreja Timor-Leste (CET) nia hakarak atu lori fila restos mortais nai-ulun sira creda nian ne’ebe dedica-an ba moris fiar no povo Timor nian iha tempo ne’eba. Processo ne’e precisa hetan colaboração máximo ho Igreja Portugal, coordenação administrativa, colaboração ho família sira iha Portugal no mos iha Timor-Leste molok no durante halo trasladação resto mortais Bispo nain rua no monsenhor Martinho nian.
Dom Virgilio Cardeal nia visita ne’e mos hakarak reforça liutan relação ne’ebe metin entre Igreja Portugal no Igreja Timor-Leste, ao mesmo tempo loke etapa foun iha conserva memória bibi atan sira ne’ebe husik hela ona herança fiar ba geração Católica Timor oan sira.
Iha biban ne’e mos Dom Virgílio Cardeal hasoru malu ho Seminaristas Timor-oan nain-neen hosi Arquidiocese Díli nian, nebé hala’o sira nia estudo iha Évora-Portugal nian.
