DCAD (Dili,13 julho 2024) – Presidente da República de Timor-Leste Sua Excelência Dr. José Ramos Horta sábado ohin tuku 9:30 dader otl hasoru malu ho Coordenador Geral parte igreja nian ba visita Santo Padre mai Timor-Leste Sua Eminência Dom Virgílio Cardeal do Carmo da Silva,SDB hamutuk ho Representante Santo Padre iha Timor-Leste Mons. Marco Sprizzi iha Câmara Eclesiástica Arquidiocese Metropolitana Lecidere Dili, hodi ko’alia kona ba preparação sira ba iha visita Sua Santidade Papa Francisco nian mai Timor Leste. Encontro ne’e hala’o ho nia duração oras 2 nia laran iha Sala de Encontro Câmara Eclesiástica Lecidere Dili.
Remata tiha encontro, Coordenador Geral parte igreja nian ba visita Sua Santidade Papa Francisco mai Timor-Leste relata resultado husi encontro ne’e katak, Visita Sua Excelência Presidente da República nian ne’e hakarak hatene oituan kona ba oinsa preparativo sira parte Igreja nian ba iha visita Sua Santidade Papa Francisco mai Timor-Leste.
“Motivo principal iha encontro Sua Excelência Presidente da República ho parte Uma Kreda nian ne’e atu atualiza ba malu kona ba programa no progresso serviço sira ba preparação visita Santo Papa nian mai Timor-Leste. Tuir líder Igreja local ne’e katak, buat hotu nebe durante ne’e ami ko’alia no discute ida ne’e mak sai hanesan mos matéria ba ami nia discussão hodi rona oituan serviço hotu nebe hala’o desde início mai to’o iha momento ida ne’e, liu-liu hare husi parte uma kreda ninian”.
Iha biban hanesan Sua Excelência Presidente da República Dr José Ramos Horta relata mos katak iniciativa hasoru malu ho parte Uma Kreda nian hodi buka hatene progresso sira kona ba preparação Uma Kreda nian ba visita Santo Padre mai Timor-Leste.
“Ha’u mak hakarak duni encontro ho Sua Eminência no mos Amo Papa nia representante pessoal iha Timor-Leste hodi ko’alia kona ba Papa Francisco nia visita husi parte Santa Sé nian no husi parte Igreja Timor nian tanba presidência buka liu-liu maka atu colabora ho governo, igreja ho Santa Sé atu tane ita hotu-hotu nia esforço ba Papa nia visita ne’e sai duni sucesso completo ba Timor-Leste”, tenik Presidente da Republica Dr. José Ramos Horta.
Liu tan ne’e Presidente Ramos Horta mos dehan visita ne’e visita Pastoral Amo Papa nian, maibe Amo Papa nia visita ne’e mos hatete hanesan evento diplomático nebe boot liu iha ita nia história mak Amo Papa nia visita ne’e.
“Ne’e duni Presidência tane 100% ba buat hot-hotu nebé governo, uma kreda no Santa Sé halo ona, tan ne’e mak ha’u mai rona nessecidade ruma iha karik presidencia bele halo, ida ne’e mak ami ko’alia”, informa Presidente da República Timor-Leste ne’e.
Participa iha encontro ne’e Presidente da República de Timor-Leste Dr. José Ramos Horta, Sua Eminência Dom Virgílio Cardeal do Carmo da Silva, SDB, Representante Santo Padre nian iha Timor-Leste Mons. Marco Sprizzi no Chefe Casa Civil Jesuina Gomes.
