DCAD (Aituturina,14/07/2024) lia hirak ne’e hato’o hosi Arcebispo Arquidiocese de Dili Sua Eminência Dom Virgílio Cardeal do Carmo da Silva SDB, domingo horiseik wainhira halao ninia visita pastoral ba estação missionário Sagrado Coração de Jesus Aituturina Hatobuilico.
Iha homilia Domingo XV tempo baibain nian ne’e Arcebispo Arquidiocese de Dili Sua Eminência Dom Virgílio Cardeal do Carmo da Silva SDB fundamenta liu kona ba tema visita Santo Padre nian; que a vossa fé seja a vossa cultura katak (atu imi nia fiar bele sai imi nia cultura, imi nia fiar bele sai imi nia identidade ne’e katak sai ema adulto mak ida ne’e, ita nia moris sarani ne’e la’os de’it iha igreja wainhira ita ba missa maibe ita nia cultura mak toman.
“Que a vossa fé seja a vossa cultura katak (atu imi nia fiar bele sai imi nia cultura, imi nia fiar bele sai imi nia identidade ne’e katak sai ema adulto mak ida ne’e, ita nia moris sarani ne’e la’os de’it iha igreja wainhira ita ba missa, maibe ita nia cultura mak toman ida. Ita nia toman atu ba missa, toman atu reza, toman atu respeita malu, toman atu haraik an ba malu, toman atu perdua malu katak, ita nia fiar ne’e labele hela de’it iha ulun, maibe ita nia fiar ne’e tem que sai ona ita nia toman ida iha ita nia cultura katak, iha família laran, família tem que aprende respeita malu, domin hahu kuda iha família, kuda iha ita ida-idak ninia comunidade, hakiak domin mak buras tanba domin ne’e mai husi Maromak. Tanba ne’e, mak buka hahu haboot domin ne’e”, sublinha Arcebispo Arquidiocese Metropolitana de Dili.
Dom Virgílio Cardeal conciencializa nafatin foinsae atus rua resin nebé preparaan hodi simu Sacramento Crisma iha Estação Missionário Sagrado Coração de Jesus Aituturina Paróquia Hatobuilico ne’e katak, simu sacramento crisma atu hatudu kona ba imi nia maturidade;
“Imi sira nebé atu crisma primeiro tau iha imi nia neon katak imi crisma iha 2024 no imi mos tem que sente orgulho tanba tinan 2024 ne’e tinan ida iha nebé amo Papa sei mai visita Timor-Leste. Ne’e duni, momento histórico ida ba imi mos katak tinan ida ne’e tinan especial no ida ne’e sai momento graça ida ba imi. Ha’u dehan simu sacramento crisma atu hatudu kona ba imi nia maturidade, los duni katak Espírito Santo iha loron baptismo ninian imi hotu simu tiha ona maibe ita hotu la hatene tuir maibe ohin loron crisma ninian imi ida-idak sei hatan rasik kona ba hakribi no fiar ninian tanba fiar ida ne’e la’os de’it iha igreja laran mak ita ko’alia tanba ita crisma, maibe iha ita nia moris lor-loron tem que buka nafatin atu hametin nafatin fiar ne’e no fiar ida ne’e atu buras precisa cuida ho sacramento sira”.
Remata tiha Eucaristia Santa Sua Eminência Dom Virgilio Cardeal mos fo bença ba cartório no inaugura salão SACROJES Aitururina nian. Participa iha celebração ne’e mak Padres Congregações Canossianos nebe halo hela assistente ba estação Sagrado Coração de Jesus Aituturina, Administrador Posto Ainaro, Administrador Posto Hatobuilico, Autoridades locais, sarani no crismantes sira.
