DCAD-DILI,12/10/2024 – Lia hirak ne’e hato’o husi Elisabeth Maria do Rosário Guterres de Oliveira wainhira participa iha procissão Na’in Feto do Rosário de Fátima nian husi Paróquia Santo António Motael ba to’o iha Monumentum Na’in Feto Lecidere.
Iha dada lian ne’e Elisabeth M. do R. G. Oliveira hateten ami nia grupo leigo Maria hanesan soldado Na’in Feto nian, ami iha devoção boot tebes ba Maria tanba ne’e ho intenção atu celebra ka festeza mês de Maria ami hakarak hola parte iha procissão ida ne’e hatudu ami nia domin ba inan Maria, hatudu ami nu’udar ema católica no hatudu mos ami nu’udar soldado Maria nian.
“Inan Maria mak inan ida ba ema hotu, inan ba sarani hotu, inan nebe kmook liu feto hot-hotu iha mundo ida ne’e, inan nebe saran nia an hodi halo tuir de’it Maromak nia hakarak hodi kous Jesus nune’e liu husi Jesus salvação mosu iha mundo”, sublinha Elisabeth Maria do Rosário Guterres de Oliveira iha Igreja Motael.
Elisabeth nebe hanesan grupo Leigo Maria dehan ho intenção sira ne’e mak precisa iha devoção nebe klean ba inan Maria tanba ita hanoin katak liu husi inan Maria de’it mak ita nia oração sira sei to’o ba iha Jesus.
Liu tan ne’e Elisabeth dehan “Ha’u koko halo terço iha ha’u nia moris nebe nu’udar leigo de Maria tanba ami nia força nebe atu hasoru babeur mundo nian maka força ho terço de’it no Na’in Feto rasik mosu iha rai Fátima husu ita atu oinsa reza terço bebeik tanba terço ne’e hanesan kilat ida ba ita atu hasoru babeur mundo nian ita precisa reza terço lor-loron no iha mistério sira ne’e mak ita bele hanoin hikas kona ba Na’in Feto liu-liu kona ba Jesus”.
Husi reza terço lor-loron nian mak ita sei manan buat hotu tanba wainhira hetan problemas, susar ruma ne’e precisa hakesi an nafatin ho Na’in Feto liu husi reza terço. Nune’e nu’udar inan, lori mos kna’ar inan nian nomos hakna’ar an ona iha igreja dala barak hasoru dificuldade nebe boot tebes tanba ita mos tem que luta ba Maria nia bandeira hun no ita tem que husik ita nia familia hodi ba hala’o ita nia kna’ar sira.
“Tanba ne’e dala barak ha’u koko ho terço de’it bele manan buat hot-hotu katak wainhira karik ha’u hasoru dificuldade ruma ha’u hanoin ona katak ha’u nia atividade ohin lubuk ida iha uma mos ha’u seidauk halo maibe hakarak atu servi de’it Na’in Feto ha’u koko atu halo ha’u nia terço ho fuan ho ha’u nia laran tomak, iha neba ha’u fiar katak milagre sei mosu masque ha’u isin ida maibe ho espírito ida nebe Na’in Feto iha, ha’u consege halo buat barak iha ha’u nia moris ida ne’e”, esplica senhora Elisabeth de Oliveira.
Ikus liu Elisabeth de Oliveira hanesan mos grupo categorial leigo de Maria Santo António de Motael husu ema hotu atu reza nafatin terço iha ita nia moris lor-loron nian tanba liu husi Na’in Feto de’it mak bele to’o ba Jesus tanba ita nia devoção ida ne’e atu hatudu los ba Na’in Feto.
“Labele haluha katak reza terço loron-loron la’os iha fulan rosário de’it maibe iha ita nia moris tomak, se ita hakarak hakbesik an ba Maromak ita tem que ser liu husi Na’in Feto tanba ne’e labele haluha terço ita nian nu’udar sarani ida”, tenik Elisabeth Maria do Rosário Guterres de Oliveira.
