DCAD (Qurta-feira, 05/03/2025) Lia hirak ne’e hato’o husi Arcebispo Arquidiocese Metropolitana de Dili Dom Virgílio Cardeal do Carmo da Silva SDB ba jornalista sira wainhira remata tiha Santa missa quarta feira cinzas ninian iha paróquia Nossa Senhora Imaculada Conseição Catedral Dili.
Arcebispo fó hanoin kona ba sentido Quaresma katak santa igreja convida ita atu prepara ita an hodi celebra festa boot santa pascóa.
“iha quaresma ka 40 dias nia laran bolu ita atu fila fali ba Na’i Maromak, atu la’o iha dalan nebé loos tanba dala ruma iha ita nia moris iha tinan tomak ida, ita sibuk ho buat barak hodi la fo importância ba buat nebé essensial katak buat nebé mak folin liu iha moris ne’e katak Maromak”, dehan Dom Virgílio Cardeal do Carmo da Silva, Arcebispo de Dili ne’e.
Ulun boot Creda Arquidiocese Dili ne’e dehan tan katak, dala ruma ita preocupa liu ba serviço, ba ita nia saúde, los duni katak buat hotu importante maibe ida neb’e aas liu ida ne’e hotu mak oinsa se ita moris duni tuir Maromak nia hakarak ka lae? Nune’e 40 dias bolu ita atu liu husi ahi kdesan ne’e fo hanoin fila fali mai ita ba buat barak nebé ita halo ona ne’e, maibe ikus mai hanesan ahi kdesan nebé folin laek.
Nune’e atu hametin liu tan ita ema nia relacão ho Maromak maka iha tempo quaresma ne’e Arcebispo Arquidiocese Dili ne’e fo hanoin nafatin ba ninia emar sira atu la’o tuir dalan Maromak ninian. Ho nune’e iha tempo quaresma ne’e precisa halo buat tolu ne’e iha moris, ne’e mak oração, jezum no esmola.
“Oração katak iha quaresma nia laran ita buka atu reza, katak oinsa lori ita atu hanoin fila fali kona ba ita ne’e mai husi Maromak, ita hatene agradece katak moris ne’e mai husi Maromak iha buat hotu neb’e ita halo ne’e tem que liga nafatin ho Maromak”, esplica Dom Virgílio Cardeal.
Liu tan ne’e Arcebispo Dom Virgilio Cardeal dehan halo caridade ba maluk sira nebe mak precisa ita nia tulun liu husi esmola. Esmola katak halo caridade, halo di’ak ba ema seluk.
“Atu ita ba to’o iha Maromak, ita labele taka matan ba ita nia maun alin sira, ita moris iha sociedade ida, ita moris ho maun alin sira nebe ita precisa mos tau matan nune’e ita hatene mos loke matan atu ita bele la’o to’o ba leten. loke matan hare ba ita nia relação ho maun alin sira no atu ita loke duni matan hare hetan ita nia maun alin sira, ita hare mos Maromak ne’e mak dehan Jezun no Abstinência”, tenik Dom Virgílio Cardeal do Carmo da Silva SDB.
Wainhira iha duni coragem atu hatene hateke ba ita nia laran, hateke ita nia an, hateke ba ita nia moris tanba ita nia moris ne’e dala barak mak sai obstaclo nebe labele hare didi’ak maun alin sira, tan ne’e mak iha quaresma ne’e acto, acção, hahalok tolu ne’e santa kreda bolu ita atu liu husi hahalok tolu ne’e atu hametin liu relacão ho Maromak ho maluk sira no ho ita nia an rasik.
Dom Virgílio Cardeal sublinha mos tan katak moris ne’e presente ida husi Maromak nebé Maromak fo no ita hatene atu oinsa halo duni moris ne’e hanesan presente ida wainhira ita hatene tau buat tolu ne’e; ita nia an nu’udar presente Maromak ninian, iha ita nia maun alin sira buat hotu ita lori ba Maromak, ida ne’e mak quaresma, 40 dias fo hanoin mai ita masque todan tanba ita hanoin kona ba ita nia fraquesa, ita nia salan sira maibe ita la hotu iha ne’e de’it, quaresma hahu ninia rohan mak pascóa.
Ikus liu Arcebispo Metropolita de Dili dehan tan iha pascóa dehan katak masque ita iha fraquesa ne’e hotu maibe Maromak fo nafatin esperança ba hirak nebé fiar no haka’as an nia sei hetan fali esperança ida ne’e iha loron ida nia sei bele masque ho nia fraquesa hotu maibe haksolok nafatin ho Maromak iha nia reino.
