DCAD (05/03/2025) Arcebispo Metropolita de Dili Dom Virgilio Cardeal do Carmo da Silva haktuir lia hirak nee iha reflexão Quarta-Feira Sinzas ninian iha Paróquia de Nossa Imaculada Conceição Catedral Dili.
“Quaresma tempo atu ita hetan fila fali rota, ita hetan fali direção, rumo moris ninian. Buat nebé vale liu mai ita oinsa ita preocupa atu la lakon ita nia meta moris ninian, ita nia finalidade moris ninian. Tan ne’e Jesus dehan FILA MAI HA’U (Cristo, Maromak) Nia mak tem que ser sai ita nia meta, ita nia finalidade, ita nia objetivo moris nian, ita nia rota rumo moris nian tem que lori ita ba Na’i Maromak denan Arcebispo de Dili”.
Liga ba iha quarta feira cinzas Arcebispo esplica katak, simu ahi kdesan nebé sei kose iha ita nia rentos ne’e sinal ida fo hanoin fila fali mai ita kona ba atu revela mai ita verdade ida.
“Verdade ne’e mak dala barak ita halai tuir buat barak husi dader to’o kalan maibe ikus mai folin laek hanesan ahi kdesan, hanesan rai rahun nebe anin hu’u lakon tiha de’it, buat hirak ne’e hotu pasageiro, provisório. Poder ohin o iha, aban liu, ohin o sucesso aban nia bele naben tan ne’e mak dehan poder passa sucesso naben. Tanba ne’e iha tempo quaresma ne’e convida ita atu descobre fila fali katak ita la’os ahi kdesan maibe ahi nebe lakan nunka mate, lakan nafatin atu lori duni, Maromak la halo ita atu fila fali ba rai, ahi kdesan fo hanoin mai ita, nia halo ita ba eternidade, ita la’os ida nebe rai ninian maibe ita lalehan ninian, ita sai ema livre nia oan, liberdade ida, ita la’os atan, dehan Arcebispo Dom Virgilio Cardeal”.
Iha Dom Virgílio Cardeal nia reflexão acentua mos pontos sira nebé necessariamente sarani ida precisa halao iha tempo quaresma nia laran. Katak Quaresma bolu ita atu fila fali ba buat nebé essensial, buat nebé importante iha ita nia moris. Oração katak ita mai husi Maromak, esmola katak ita iha mos maun alin iha ita nia sorin-sorin, jezum abstinência atu ita bele hatene lolos kona ba ita nia an, Maromak no maun alin sira, ida ne’e mak realidade ida nebe ita precisa tinan-tinan ko’alia nafatin atu ita ida-idak atu loke ita nia neon ba realidade ida ne’e.
“Oração no esmola ne’e convida ita atu hatene hateke ba sorin-sorin, hateke ba ita nia vizinho, hateke ba ita nia maun alin sira, lolo liman ba ita nia maun alin sira tanba dala barak ita ema nia vaidade, ita ema ninia hanoin an de’it, dala barak ita la hare hetan ema seluk no wainhira ita koko atu controla ita nia hahan, ne’e duni quarta feira cinzas loron atu abstinência no jezum ne’e ba sarani hotu ida ne’e ita nia obrigação. Tanba ne’e quaresma ne’e precisa tau iha ita nia neon kona ba Jesus nebe iha Cruz. Jesus nebe iha Cruz mak we matan moris fo nafatin dalan ba ita. Wainhira ita hare kona ba Jesus iha cruz ita hare ai nebe Nia hedi ba, ai ida ne’e simbolu Maromak nebe Nia kbiit hotu maibe Nia halo An simples, kiak la’os hodi osan mean osan mutin mak hedi Nia an maibe ai ida”, tenik Dom Virgilio Cardeal.
Dom Virgilio Cardeal reconhece katak ita hotu hatene la’os facil, ita hotu koko tinan-tinan ita moris nu’udar ema la’os fácil, maibe Jesus husu duni ba ita sarani buat nebé la’os fácil liu tan atu halo masque Nia hatene katak ida ne’e la fácil ida ne’e mak hanoin finalidade, meta, objetivo moris sarani ida ninian tanba susar ne’e mak ohin ita mai hamutuk hahu ita nia quaresma, hahu hodi kose ahi kdesan ba ita nia rentos atu fo hanoin ba ita katak ita hotu iha ita nia fraqueza, ita hotu iha ita nia miséria maibe páscoa kalan termina ho naroman kalan páscoa nian”.
Ikus liu Dom Virgílio Cardeal hatutan tan dehan Ha’u halo moris ida ne’e atu halo fali moris ne’e sai moris ida nakonu ho domin, halo fali moris ida ne’e sai moris ida nebé la’os mohu maibe moris ida nebe hela nafatin iha Maromak ninia domin, ne’e duni maluk doben sira mai ita lori ita nia preocupação ne’e hotu ba ida ita hakbesik mai ohin hodi simu cinzas no ita lori hanoin hirak ne’e ita reza atu ahi kdesan hirak ne’e la sai de’it buat formal de’it nebe ita halo tinan-tinan maibe ahi kdesan nebe iha rein toos ne’e convida nafatin ita atu fo liu tan masque ahi kdesan maibe oinsa ita tane aas ahi kdesan ida ne’e hanesan buat nebe Na’i Maromak husik iha ita ne’e sinal Maromak nia domin atu ahi kdesan ne’e ita reconhece nafatin Maromak ninia grandeza iha ita ida-idak masque sabraut la soi maibe Maromak hadomi ita.
