DCAD (DILI, 15/03/2025) Leigo Maria iha Timor-Leste nebé composto housi Arquidiocese Dili, Diocese Baucau no Maliana sábado foin lalais ne’e liburan hamutuk hodi halo renovaçã promessas nian iha Salão Arquidiocese Lecidere Dili. Renovação nee ho objetivo atu legionário sira moris tuir sira nia promessa hodi hala’o kna’ar legionário nian ho sinceridade, responsabilidade no confiança tomak.
Pe. Paulus Maya nuda presidente Legio Maria nian iha Timor-Leste iha biban nee reflete liafuan Na’in Feto nian nebe dehan “Ne’e sa Na’i atan oan mak ne’e halo tuir Ita liafuan ba”
“Liafuan ne’e nu’udar conclusão husi diálogo entre Virgem Maria ho Anjo nian. Maria iha nia reação durante Anjo ida nebe Maromak haruka nia ba hasoru Maria ne’e Maria hatudu ninia dúvida, no dúvida ida nebé ikus mai hetan ninia resposta nebe claro teb-tebes husi Anjo kona ba mistério Maromak nian nebe
Maromak hakarak envolve ema iha mistério salvífico Maromak nian. Maromak hakarak ema ninia colaboração, Maromak hakarak ema nia participação, Maromak hakarak ema nia envolvimento iha mistério salvifico Maromak nian ba ita ema. Tan ne’e conclusão ida husi Maromak ninia delegado Anjo Gabriel ba Maria ne’e mak, ba ita ema impossivel maibe ba Maromak buat hotu bele de’it”, dehan Padre Paulus Maya iha ninia reflexão.
Nune’e ba legionário/a sira Padre Paulus hateten, ita hotu nebe halibur an iha fatin ida ne’e tanba ita hakarak saran ita nia an ba Virgem Maria no nia Oan Jesus.
“Hanesan ohin iha ita nia promessa nebe dehan saran ita nia an ba Maria ho Jesus, ne’e duni quando ita saran ona ita nia an iha Maria ho Jesus katak buat hot-hotu ne’e iha Maria no Jesus ninia plano, iha Maria no Jesus ninia hakarak tan ne’e labele dúvida tan, labele tauk tan, labele preucupa saida mak ita tem que halo no saida mak sei acontece ba ha’u maibe ita hala’o de’it tanba Maromak iha ona hakarak ba ita, Maromak iha ona plano ba ita”.
Iha Pe. Paulus nia recomendação ba legio Maria sira hotu katak, Sai legionário/a tanba Maromak hakarak ema ida-idak hala’o Na’i nia missão, Maromak hakarak ema atu halo parte iha Ninia obra salvifico.
“Maromak hakarak ema halo parte iha missão ida evangelho nian, missão ida haklaken, missão ida lori ba ema hot-hotu Maromak nia lia foun, missão ida atu lori Jesus ba ema hotu. Tanba ne’e ita boot sira orgulho oituan tanba bele halo parte iha movimento ida ne’e nebe sai soldado pronto, sai soldado ida nebe continua obra salvifica Maromak nian nebe Maromak halo ba ita nune’e ho ita nia acto de consagração hodi halo renovação ba promessa ne’e katak ita bele halo
ida ne’e ho sinceridade, ho ita nia responsabilidade no ho ita nia confiança tomak. Sinceridade katak ha’u mai atu saran ha’u nia an ohin no ba nafatin. Hanesan liafuan nebe ita hateten wainhira ita halo promessa nebe dehan ha’u ne’e Ita nian ne’e katak fo ho total sem rezerva, fo tomak tanba ne’e ita dehan sincerio total ho confiança. Confiança ne’e katak ita iha esperança katak ha’u fila fali ba haklaken ne’e ha’u la mesak tanba iha Na’in Feto no Jesus acompanha ha’u”.
Padre pároco Paróquia Imaculada Conceição ne’e ba legionário/a sira atu hatene agradece ba diak hotu nebé simu housi Na’i.
Agradece Maromak tanba masque ita aat karik ba, masque iha ita nia fatin nebe ema hare la folin karik ba maibe ita soi duni hodi Maromak bolu imi, Maromak halo imi soi hodi sai Ninia manu ain hodi haklaken. Ida ne’e oportunidade di’ak ida nebe dala ruma la folin iha ema nia matan maibe ba Maromak sempre folin tanba wainhira halo buat di’ak ba ema sira seluk, di’ak nebe ita halo ne’e mak sei determina ita nia moris maibe di’ak ita halo ohin aban ita halo aat no ida aat ne’e mak sei determina ita nia moris.
