DCAD (16.03.2025) Sala de imprensa Santa Sé divulga hikas imagem pontífice halo hela oração, hafoin concelebra tiha eucaristia dader nian. Ida nee hanesan imagem dahuluk desde kedas nia internamento iha hospital iha loron 14 fevereiro. Papa Francisco nia condição saúde iha oras nee estável nafatin, no inclui tratamento sira fisioterapia no motora continua nafatin.
Hafoin remata tiha santa missa, Santo padre Tur iha cadeira roda ho túnica no estola, nia hateke ba cruxifixo iha altar capela ninian hodi halo nia oração, iha nebé desde ninia condição hahu melhoria.
Nee mak imagem dahuluk Papa Francisco nian, liu tiha nia internamento iha policlínico Gemelli desde loron 14 fevereiro liu ba. Imagem refere fo sai husi sala de imprensa santa Sé nian iha domingo kalan loron 16 março.
Loron ba loron, cada jornalistas no ema wain husu kona ba imagem Pontífice nian. Basá imagem sira Santo Padre nian fo sai ikus wainhira nia hasoru malu ho Fundação Espanhola Gaudium Et Spes iha casa de Santa Marta molok nia internamento. Hahu kedas nia internamento laiha ema seluk atu visita selae médico nebe responsável ba nia tratamento no nia colaborador sira nebé besik liu mak hetan opurtunidade bele visita.
Ohin mosu sinal foun ida (presença) Papa Francisco nian iha momento ida nebé íntimo liu: oração. Sala de imprensa Santa Sé nian nafatin informa katak dader nee Santo Padre nia condição estável nafatin, nia mos concelebrante iha missa dominical nian iha capela nebé besik iha nia sala tratamento nian.
Santo Padre nafatin continua halo tratamento sira nebe prescreve ona, inclui terapia respiratória no motora. Papa Francisco la simu visitante sira, basá nia hakonu tempo tomak ba oração, hafoin descansa.
