DCAD (Railaco, 13-04-2025) Domingo Ramos domingo ikus tempo Jezum nian nebé lori ita tama ona iha Semana Santa no Domingo Ramos fó hanoin mai ita oinsa Jesus tama iha cidade Jerusalem. Mensagem refletivo ne’e haktuir husi Pe. Nelinho Alves SJ, iha nia homilia ba sarani sira iha Capela Santo António de Pádua, Tokoluli, Paróquia Railaco.
“Domingo Ramos nudar momento ida atu ema hare Jesus Nia paixão, Jesus tama ba Jerusalem no convida sarani sira hotu atu hamutuk ho Jesus tama ba Jerusalem. Jerusalem ida ne’e maka iha ita nia Capela, ita nia suco, ita nia aldeia no ita nia uma. Jerusalem ida ne lori ita hanoin fila fali, oinsa Oan Mane Maksoin ho hakraik an simu Aman Maromak nia haruka, hodi mai hamutuk ho ita iha mundo, moris no terus hanesan ita, ikus mai nia mate no Nia lori fila ita ba Aman Maromak” Dehan Pe. Nelinho
Nailulik Jesuita ne’e fundamenta tan katak, Leitura no evangelho Domingo Ramos nian atu lori ema atu iha compaixão ba malu.
“ Evangelho ohin nian (Domingo Ramos) lori ita ba tipo compaixão tolu. Tipo primeiro nebé hatudu husi Feto Jerusalem. Dalabarak ita hare ita nia inan feton sira wainhira hare ema triste no terus sira hanoin lalais no dalabarak ho tanis, maibe ba Feto Jerusalem sira Jesus dehan, labele tanis mai Ha’u maibe tanis ba imi nia an rasik. Compaixao segundo maka wainhira Jesus lori Cruz iha dalan, hasoru Simão Sireneu nebé ajuda Jesus lori Cruz, laos tanba nia hakarak maibe tanba obrigatório no compaixão ida seluk maka wainhira Verónica hare Jesus ho fuan moras hakat ba hamo’os Jesus nia kosar. Se ita hare compaixão sira ne’e, ida ne’e maka compaixão nebé mai husi fuan” tenik Pe. Nelinho.
Tuir Padre Nelino, husi compaixão nebe verónica hatudu, hanorin ba ema hotu katak fuan ne maka hatudu lolos ema ne se no ita nia hahalok sira iha moris loron-loron no exemplo lolos no oinsa Jesus nebe ho fuan nebe lolos mate tanba ema nia sala.
“Dalabrak ita haluha katak ita maka oho Jesus ho ita nia hahalok loron sira, husi ita nia bosok, ita nia kan sira ho osan, poder no seluk tan” Dehan Padre Nelinho.
