DCAD – (Dili, 10-09-2025) – Biban missa Ação de Graça nian iha Explanada Tasi-Tolu Dili Timor-Leste ne’e Sua Eminência Dom Virgília Cardeal do Carmo da Silva hateten, Presença histórica Maktoban Papa Francisco nian iha ita rain sai nu’udar bênção ida ba ita nia nação no Nia presença iha ita nia le’et, hametin liu tan ita nia fiar, hafoun fila fali ita nia experança no nia husik hela marca ida nebe labele hasai hosi ita hotu nia fuan.
Lider Igreja local ne’e hateten iha ninia reflexão katak “Ohin, ita halibur iha Esplanada Tasi-Tolu dala ida tan, ita reconhece katak iha fatin ida ne’e sai evento histórico bo’ot rua nebé la’os de’it hatudu ema Timor nia fiar, maibe coloca rai Timor iha mapa mundo. Evento históriko ba dahuluk visita maktoban Sua Santidade Papa João Paulo II nian iha iha fatin ida ne’e iha tinan 1989, hodi hatudu ba mundo katak povo Timor fiar nain, povo unido nebé hatene luta hamutuk, ba nia autodeterminação. Ba daruak nian, mak maktoban Papa Francisco ninia visita mai rai Timor iha loron 9-11 setembro 2024, sai nu’udar bênção ida ba ita nia nação no Nia presença iha ita nia le’et, hametin liu tan ita nia fiar, hafoun fila fali ita nia experança no nia husik hela marca ida nebe labele hasai hosi ita hotu nia fuan”. Dehan Dom Virgílio Cardeal.
Hodi hanoin hikas tinan ida presença maktoban Sua Santidade Papa Francisco iha Creda Timor Dom Virgílio Cardeal haktuir katak, Ohin, ita hamutuk nudar população kiik ida husi povo Maromak nian iha rai Timor, hamutuk nudar Creda ida hodi hasa’e ba Maromak Santa Missa Ação de Graça ida hodi hanoin hikas primeiro aniversário visita Papa Fransisco nian nebé hatudu duni katak Maromak hanoin no haraik bênção mai ita liu husi presença Papa Francisco nian. Presença maktoban Papa Francisco nian iha tinan kotuk hodi fortifica povo Timor nia fiar no hametin cultura hodi valoriza valores Evangelho nudar ema fiar nain. Papa Francisco hare hetan roman ida ne’e iha timoroan sira nia fuan, iha labarik sira, iha ferik no katuas sira, roman Evangelho ida ne’e sei fó roman ba ita nia cultura no ita-nia toman sira hodi nune’e valor sira Evangelho nian bele moris no hola isin iha ita timoroan nia fuan hodi transforma ita iha fiar ida de’it.
Entretanto Missa Ação de Graça primeiro visita Maktoban Sua Santidade Papa Francisco nian iha Explanada Tasi-Tolu ne’e preside direta Sua Eminência Dom Virgílio Cardeal do Carmo da Silva hamutuk ho Bispo de Baucau Dom Leandro Maria Alves no Mons. Marcel Smejkal Encaregado dos negócios Santa Sé nian iha Timor Leste, Nailulik sira diocesanos e religiosos. Hola parte iha santa missa ne’e menbro do Governo, madres husi congregação sira hotu, frater diocesano e religiosos, Autoridades civil e militar sarani sira hotu husi Arquidiocese de Dili e Diocese Baucau no Maliana.
