DCAD (DILI, 19.11.2024) : Legião de Maria hanesan associação leigo católico sira-nian ne’ebé dedica an ba evangelização, iha Na’in Feto nia proteção hodi contribui ba missão evangelizadora Kreda nian, liu husi oração no servisu apostólico. Legionário sira dedicado atu tulun ema sira ne’ebé precisa, hanesan ema moras sira, katuas-ferik sira, jovem sira ne’ebé precisa, entre sira seluk.
Iha sexta foin lalais ne’e (15/11/2024) Legio Maria iha Timor-Leste composto hosi diocese 3 Arquidiocese Dili, Baucau no Maliana hola iniciativa hodi realiza congresso dahuluk Legio Maria nian iha Timor-Leste iha nebé loke ho missa nebé preside hosi Arcebispo de Dili Dom Virgílio Cardeal iha Capela Seminário Ano Propedêutico Maloa Ailok Laran Dili.
Iha homilia Arcebispo de Dili Dom Virgílio Cardeal Ohin husu ba legionário sira atu aproveita didiak iha congress dahuluk nee basá Congresso ida ne’e hanesan momento histórico, momento graça, opurtunidade, momento renovação, momento ida atu fila fali ba moris legio Maria ninian ninian ba iha Legio Maria Timor-Leste.
“Ita hotu mai iha ne’e atu participa iha congresso dahuluk Legio Maria nian iha Timor-Leste nebé sai hanesan momento ida Legio Maria Timor-Leste nian bele hasoru malu. Nee duni saida mak ita hein hosi congresso ida ne’e no congresso ida ne’e sei lori los saida ba Legio Maria iha Timor-Leste no sei contribui saida ba ita nia creda, ba ita nia rain, ba ita nia família, ba ita nia foinsae sira no ba ita nia oan sira. Tanba ne’e Congresso ida ne’e hanesan momento histórico, momento graça, opurtunidade, momento renovação, momento ida atu fila fali ba moris legio Maria ninian ninian ba iha Legio Maria Timor-Leste”.
Arcebispo de Dili Dom Virgílio Cardeal nafatin fanun Legionário sira katak, Congresso la to’o deit atu cria documento ida, maibe congresso lori cada legionário ba iha conversão ida, ba iha encontro ida ho Na’i Maromak.
“Congresso dahuluk Legio Maria nian iha Timor-Leste sai hanesan momento ida graça nian katak momento ida nebé Legio Maria moris iha Timor besik tinan 10 resin ona, iha momento pausa ituan atu hotu-hotu hare fila fali ba legio Maria nia moris, ninia charisma no nia fidelidade. Nune’e mos hanesan momento ida atu hotu hotu husik Maromak nia espírito atu koalia duni ba ita boot sira atu bele hare cada encontro sira lori duni legionário sira atu iha encontro ida ho Maromak. Amo Papa iha ninia documento ida nebe koalia kona ba ‘Ksolok sarani sira nian mak Maromak nia liafuan’. Tanba ne’e Maromak nia liafuan mak sai we matan ksolok nian ba ita sarani sira. Tanba ne’e Maromak nia liafuan mak sai hanesan sasukat ba ita boot sira nia avaliação hodi guia imi”.
Atu remata Arcebispo de Dili Dom Virgílio Cardeal nia reflexão, nia parte nafatin encoraza legionário sira atu aproveita didiak opurtunidade ne’e basá Congresso nee hanesan momento ksolok nian ida hodi halibur ita, no tempo único ida.
“Tanba ne’e mak hakarak dehan ba ita katak atividade durante loron rua nian ne’e tulun mos atu legionário ida-idak bele hola conciência ida katak cada minuto, cada oras no loron, cada semana, fulan no tinan nebe Maromak tau iha ita nia disposição momento nee momento osan mean ida. Hosi ne’e oinsa mak ita preenche ita nia tempo hanesan momento ksolok nian ba ita nia maluk sira basá tempo nee dinâmico laos estático”.
Participa iha celebração eucarística abertura congresso dahuluk Legio Maria nian nee, Arcebispo de Dili Dom Virgílio Cardeal, Presidente Legio Maria iha Timor-Leste Pe. Paulus Maya, Presidente Legio Maria Sessante Pe. Ludgério Martins da Silva, Diretor Espiritual Seminário Ano Propedêutico Maloa Pe. Adriano Ximenes no Legianário sira.
