DCAD (29/06/2026) Iha segunda-feira ne’e (29/06) Santa Creda Celebra Solenidade Festa São Pedro e São Paulo nian. Seminário Maior Interdiocesano Fatumeta Dili nebé hamahan an iha Santo boot rua ne’e completa ninia aniversário existência ninian ba dala 26. Celebração Eucarística hodi comemora Festa São Pedro no São Paulo ninian ne’e preside Dom Leandro Maria Alves, Bispo Diocese Baucau.
Iha nia homilia, Dom Leandro toca liu kona ba Santo boot rua “São Pedro no São Paulo nudar airin ka coluna boot rua Igreja ka Creda nian;
Ohin Santa Creda Celebra Solenidade Festa São Pedro e São Paulo nian, parabens ba Seminário Maior Interdiocesano Fatumeta Dili, santo boot rua nudar airin Creda nian. Jesus bolu sira nain rua ho dalan nebé lahanesan; São Pedro rona Na’i Maromak nia bolu iha tasi ibun. Nia kail hela no Jesus liu no bolu nia. No São Paulo hasoru malu ho Jesus iha dalan ba Damasco ninian wainhira nia ba buka sarani sira atu kaer.
Dom Leandro reforça tan oinsa Jesus identifica nia An ho sarani sira; ema sira nebé fiar iha Jesus laran metin iha Jesus, tau comfiança iha Jesus, Jesus identifica nia An ho sira:
“Sira rua mai husi fatin nebé lahanesan; ida-idak mai ho ninia profissão, sira rua laconhece malu, maibe sira nain rua to’o ikus sai belun boot ida de’it iha ita Nain Jesus Cristo. Nain Jesus Cristo mak centro nebé halo ema hamutuk, dada ema atu conhece malu iha ita nain Jesus Cristo, Nain Jesus Cristo sai hanesan ponto de encontro ida entre ema sira e sira nain rua sai belun. Cristo bolu sira atu lao hamutuk ho Cristo”.
Dom Leandro mos haktuir Santo boot rua ninia lalaok; São Pedro tuir ita hatene lao hamutuk ho Cristo wainhira Cristo sei moris iha mundo ne’e; São Paulo fali lae conhece Cristo depois de ressurreição ne’e mak ita nain Jesus Cristo bolu nia.
“Mesmo nune’e hanesan ohin dehan sira rua sai ida de’it iha ita nain Jesus Cristo. Sira rua hamutuk ho finalidade ida mesak mak atu haklaken fiar iha Cristo no ba ema seluk. Jesus bolu sira no haruka sira atu continua obra Na’in Jesus nian iha mundo. Jesus bolu no comfia
iha sira. Ida ne’e mak ita hare oinsa mak Maromak hatama ita ema iha obra salvação ninian. Maromak bolu ita ema ho buat hotu nebé ita ema iha fraqueza sira ho buat nebé ita iha Maromak bolu ita nia ne’e total la bolu tamba ita matenek, labolu tamba ita bonito liu lae! Maromak bolu ita hanesan ita iha ne’e hodi Na’i Maromak haruka ita ba. Jesus bolu sira no haruka sira atu continua obra Nain Jesus Cristo nian rasik e sira rua halo buat hotu tan Cristo no entrega an ba mate tamba Nain Jesus Cristo. Tamba ne’e mak ita hare Creda hahi sira tamba ita nai Jesus Cristo mak halo sira sai hanesan ne’e. tan ne’e mak Igreja dehan dehan sira nain rua sai hanesan coluna boot Igreja ka Creda nian” tenik Dom Leandro.
