DCAD (DILI, 22 JULHO 2024) Lia hirak ne’e haktuir hosi Representante superiora Comunidade Alma Dili Timor-Leste Me. Eduarda Martha dos Santos wainhira dadalia ho jornalista Arquidiocese Dili nian iha Comunidade Alma Praia do Coqueros Dili.
Iha dadalia ne’e Me. Eduarda Martha dos Santos haktuir katak Labarik ho necessidade Especial sira sente contente no orgulho teb-tebes wainhira rona novidades katak Sua Santidade Papa Francisco sei mai visita Congregação Alma.
“Ami Comunidade Alma hamutuk ho Labarik ho necessidade Especial sira ne’e sente contente no orgulho teb-tebes Sua Santidade Papa Francisco nebé mak sei mai visita ami nia Congregação Alma. Liu-liu ba labarik ho nececidade especial sira nebé mak hakarak hetan bênção especial hosi Santo Padre. Labarik sira ne’e ho nececidade especial mesak bonita no bonito de’it no sira único tebes mai ita. Sira nebé daudaun hela hamutuk ho madre sira iha comunidade ne’e hamutuk nain 18 nomos sira nebé mak hela iha uma hamutuk ho inan aman sira hamutuk 45. Tanba ne’e total labarik sira nebe ami hamatan ba hamutuk 50 resin” tenik Me. Martha dos Santos.
Me. Eduarda Martha dos Santos fundamenta tan katak,wainhira rona novidades Sua Santidade Papa atu visita Congregação Alma sira hamutuk ho labarik ho nececidade especial sente contente no orgulho tebes.
“Fofoun ami rona novidades nee ami sente orgulho teb-tebes hanesan iha lian malaio nian karik dehan “Hanya yang mengalami yang dapat merasakan” tanba ema barak hein hela atu Santo Padre ba visita sira nia fatin maibe la hetan opurtunidade. Tanba ne’e mai ami hanesan graça especial ida mai ami Comunidade Alma. Tanba ne’e hakarak agradece especial ba parte Uma Creda no Estado nebé fó biban kamenk ida ne’e atu Santo Padre bele mai visita direta Labarik ho necessidade especial iha Comunidade Alma”.
Koalia kona ba preparação sira iha comunidade Alma nian rasik Me. Eduarda Martha dos Santos conta tuir katak, sira nia preparação iha parte rua hanesan vida Espiritual no parte físico nian.
“Ami nia preparação sira iha ami nia comunidade Alma nebe mak tau matan ba labarik ho nececidade especial sira. Uluk nanain ami prepara ami nia vida Espiritual rasik. Iha ami nia vida Espiritual nian ami hamutuk ho labarik especial sira ami reza ba Santo Padre atu iha saúde nebé diak nafatin atu nune’e bele mai visita ita nia rain. Além de mos iha ami nia oração sira lahaluha ami reza mos ba ita nia nai ulun nação ne’e nian, nai ulun sira Igreja nian atu serviço sira liu-liu ba preparação sira bele fó liman ba malu diak liu tan atu serviço bele la’o ho diak tuir Na’i Maromak nia hakarak, maske hasoru dificuldade oi-oin maibe ami fiar katak ho ami nia oração liu-liu labarik ho nececidade especial nia oração hodi tulun ita la’o tuir Na’i Maromak nia hakarak. Ba parte físico nian dadaun ne’e iha ami nia comunidade Alma ne’e rasik ho tulun hosi parte governo nian iha hela fase rehabilitação nia laran no dadaun ne’e atinje ona 85% falta de’it 15% hodi completa”.
Iha parte ikus comunidade Alma iha Timor-Leste nebé hamatan ba labarik ho necessidade especial sira expressa sira esperansa iha Sua Santidade Papa Francisco nia visita iha Timor-Leste katak “Ami nia esperansa ba Santo Padre nia visita mai ita nia rai doben ida ne’e atu bele fó motivação mai ita hotu iha rai Timor-Leste hodi tau matan ba labarik sira nebé precisa teb-tebes ita nia tulun, liu-liu ba labarik sira ho nececidade especial tanba ita hotu iha Maromak nia oin hanesan; laiha ida boot no laiha ida kiik”.
