CET- DILI (Quarta-Feira, 11/09/2024) Peregrino Luis Fernandes husi município Ermera expressa ninia sentimento ksolok relaciona ho visita Santo Padre Francisco nian iha rai doben Timor Lorosae. Luis hateten nu’udar sarani sente orgulho no contente teb-tebes tanba iha tinan 1989 wainhira Papa João Paulo II mai iha ita nia rain, ha’u la hare direta ho matan maibe iha tinan 2024 ne’e agradece teb-tebes tanba ha’u bele hare Papa Francisco diretamente ho ha’u nia matan rasik.
“Masque loron manas maibe ami la sente kolen tanba ita nia Papa nebé mak hiit an mai iha rai doben ida ne’e ami sarani sente orgulho no contente teb-tebes tanba ne’e mak ha’u mai desde dadersan ho ha’u nia oan feto hamriik metin iha ne’e hodi hein Papa Francisco atu liu hodi fila fali ona”, tenik Luis Fernandes iha rotunda Nicolau Lobato Comoro.
Ho Esperança nebé profundo tebes Luis Fernandes haktuir katak ba sarani sira nebe mak la marca presença iha Papa nia visita ida ne’e tanto ferik ho katuas no labarik kiik sira, espera katak novidades histórico visita Santo Padre nian ne’e, ami sei haktuir hikas ba ami nia oan no beioan sira.
“Tanba ne’e mensagem nebé Papa hato’o ba sarani sira iha dia 9 to’o dia 10 ne’e maka aifuan ida tem que rega bebeik maka nia sei buras nafatin”, sublinha Luis Fernandes husi Municipio Ermera ne’e.
Iha fatin nebé hanesan Flavio Soares seminarista Seminário Interdiciosano Fatumeta Dili conta tuir katak ita hetan privilégio tanba Papa mai visita ita nia rain, ida ne’e uluk nanain hanesan sarani, hanesan cidadão ita sente contente teb-tebes.
“wainhira ita ko’alia kona ba sentimento dala ruma ne’e ita labele expressa facilmente ho ita nia liafuan ba evento sira hanesan visita ida ne’e, nune’e pessoalmente hanesan sarani Timor, ita hot-hotu iha sentimento hodi expressa ba ita nia lider máximo ne’e ita sente contente, ita sente terharu ho situação ida ne’e.
Seminarista ne’e sente motivado ho Santo Padre Francisco ninia liafuan nebe iha homilia iha tasi tolu nebe dehan “nação nebé iha jovem significa nação nebé iha futuro”, ne’e significa katak Papa nia confiança ba jovem sira maka’as teb-tebes no Papa hakarak teb-tebes atu jovem sira ne’e tem que sai alvo, tem que sai protagonista, tem que sai autor ba iha desenvolvimento tanto Creda nomos nação.
“ha’u hanesan jovem ha’u nia lia menon ba ha’u nia belun jovem sira hotu iha Timor nebe participa direta nomos participa liu husi media iha visitação ida ne’e katak ita hotu-hotu iha espirito hanesan sarani, espírito hanesan joven atu ita nafatin contribui ba ita nia creda nomos ita nia nação tanba mensagem nebé ita rona iha tasi tolu ne’e hatudu ona sinal ida katak confiança autoridades tanto igreja no nação ida ne’e confiança ba jovem sira ne’e maka’as teb-tebes tanba ne’e mak ha’u hanoin ita hot-hotu tem que banati tuir ida ne’e”.
Tuir observação iha terreno nota katak sarani sira haksolok tebes hodi hein no simu Sua Santidade nia presença iha ita nia nação ida ne’e tan ne’e durante iha loron tolu nia laran ne’e sarani sira firme nafatin iha fatin sira nebe Papa Francisco atu visita ne’e, sarani sira começa hein kedas ona iha dalan sira nebe Papa atu liu. Participação iha visitação papal nian ne’e mai husi ferik-katuas, inclui inan isin rua sira, jovem no labarik sira.
