DCAD(Fatuberliu,13.01.2025) Arcebispo de Dili Dom Virgílio Cardeal do Carmo da Silva, segunda foin lalais nee (13.1) Inaugura uma formação ba novício Ordem Frades Menores (OFM) iha Suco Clacuc, Posto Administrativo Fatuberliu, Manufahi.
Remata tiha bênção no inauguração ba Uma Formação nian ne’e, Arcebispo de Dili Dom Virgílio Cardeal celebra missa Ação de Graça nian ba Ordem Franciscano hamutuk ho sarani sira iha fatin refere. Iha nia homilia Dom Virgílio hateten, wainhira religioso ida simu ona forma consagrada husi Aman Maromak no sira mos simu ona missão evangelização nian nebé exige preparação ida nebé diak.
“ Iha formação, uluk nanain sira husik sira nia an hodi lao tuir Jesus Nia dalan moris. Tanba nee uma noviciado ne’e atu prepara futuro Franciscano (OFM) atu oinsa hotu-hotu sai evangelizador. Koalia kona ba evangelizador ne’e la’os de’it Padre sira nia serviço maibe irmão, bruder no ema hotu” dehan Dom Virgílio
Primeiro Cardeal ba Timor-Leste ne’e fundamenta tan katak, noviciado ba religioso ida maka escola da vida, laos atu hetan diploma, maibe escola moris ninian. Ho razão ida ne’e precisa ambiente nebé diak.
“ Ambiente maka sai fator fundamental iha formação, atu ema bele compreende ambiente nebé saudável no hakmatek importante tebes ba fatin formação sira” Dehan Cardeal.
Iha fatin hanesan, Provincial Ordem Menores Frades (OFM) ba Indonesia no Timor-Leste Frei Mikael Peruhe OFM, hato’o nia profunda agradecimento ba parte hotu nia contribuição ikus bele finaliza uma forma noviciado ne’e.
“Lori Ordem Frades Menores (OFM) Provincia São Miguel Arcanjo Indonesia no Timor-Leste hakarak hato’o agradece ba parte hotu nebe contribui to’o ikus ohin bele inaugura uma noviciado ne’e, especial ba Dom Virgilio Cardeal do Carmo da Silva. Hau rona bebeik husi Frei sira iha Timor-Leste katak Cardeal sempre suporta Ordem Frades Menores (OFM) ba nia missão iha Timor-Leste” dehan Frei Mikael.
Construção ba obra ne’e rasik responsabiliza husi companha Bintang Fajar Timur ho duração tempo quase tinan ida ho total orçamento US$ 400.000.
