Maluk peregrino sira esperança nian,
Nu’udar ita moris iha Tinan Jubileu Esperança nian ida-ne’e, tempo ida reflexão no renovação nian nebé kle’an, ha’u convida ita-boot atu hamutuk ho ha’u hodi hakuak espírito esperança nian nebé tenke hale’u ita-nia an rasik no comunidade sira.
Iha mundo ida nebé dala barak estraga ho nakukun no desespero, particularmente bainhira ita hetan afetado hosi dezastre natural sira no conflito família nian loron ba loron, esperança sai hanesan ita-nia naroman orientador, naroman esperança nian nebé fó naroman ba dalan atu continua la ho rende emvez de hakat ba futuro ida nebé nabilan liu. Ida-ne’e maka virtude ida nebé fó kbi’it ba ita atu ultrapassa desafio sira, atu persevera liu hosi adversidade no atu haka’as-an ba sociedade ida nebé justo liu, compaixão no resiliente liu.
Tinan Jubileu ida-ne’e oferece mai ita oportunidade único ida atu hamoris fali ahi-lakan esperança nian iha ita-nia laran no atu fahe ida-ne’e ho mundo. Ida-ne’e maka tempo ida atu examina ita-nia moris rasik, atu reconhece ita-nia falta sira, no atu compromete ba transformação pessoal. Ida-ne’e mos tempo ida atu hakbesik ba ema seluk, atu oferece apoio no solidariedade, no atu serbisu hamutuk hodi hari mundo ida nebé justo no equitativo liu. Laiha ema ida iha mundo ne’e mak bele dehan ha’u kiak tebes katak ha’u laiha buat ida atu fahe nem ema riku ida labele reclama: ha’u riku tebes katak ha’u la precisa buat ida husi ema seluk. Esperança hanorin ita atu alcança ema seluk iha ita-nia capacidade rasik no iha ita-nia limitação rasik. Esperança convida ita atu moris iha espírito solidariedade no fraternidade nian. Ida-ne’e de’it maka bele transforma ita-nia mundo ba comunidade ida nebé nakonu ho esperança ho domin no unidade.
Bainhira ita hahu viagem esperança nian ida-ne’e, mai ita hanoin Amo Papa Francisco nia liafuan sira: “Esperança hakonu ita-nia loron sira!” Mai ita hakuak mensagem ida-ne’e hanesan bolu ida ba ação, desafio ida atu sai agente sira mudança nian iha ita-nia comunidade sira no liutan hanoin hikas nia mensagem ba ita iha nia visita iha fulan Setembro, 9-11, 2024: “No imi, jovem sira imi maka sira. Maioria população rai ne’e nian no sira nia presença hakonu rai ne’e ho moris, esperança no futuro. Keta lakon entusiazmo fiar nian no keta para atu hamnasa, tanba ó-nia hamnasa mak sinál Esperança nian.” Papa Francisco.
Mai ita haka’as-an atu sai hanesan naroman esperança nian, nebé fó sai domin, compaixão no compreensão. Mai ita kuda cultura esperança nian, iha nebé ema hotu-hotu sente valorizado no respeitado. No mai ita serbisu maka’as atu cria mundo ida iha nebé esperança la’ós mehi de’it, maibé realidade tangível ba ema hotu.
Iha Tinan Jubileu ida-ne’e, mai ita hakuak esperança, hakiak esperança no fahe esperança ho mundo. Tanba iha esperança, ita hetan força atu ultrapassa obstáculo ruma, coragem atu hasoru desafio ruma no fiar metin iha ita-nia Maromak Di’ak no Domin nebé la’o hamutuk ho ita, nunca abandona ita hodi lori ita ba mundo ida nebé di’ak liu no ksolok liu atu moris ba.
Iha Maromak de’it mak ita nia Esperança, Iha Maromak de’it mak ita nia kbi’it, ita nia Ksolok, Domin no Dame!
Obrigada Wain!
Sr. Sonia Sangel, FdCC
