DCAD, 11.02.2025 Liburan hamutuk comunidade sarani be pertence ba Paróquia Ermera hodi comemora festa mahein Paróquia Nossa Senhora de Lourdes Ermera ho missa agradecimento be preside housi Chanceler Arquidiocese de Dili nian Rev. Pe. Paulus Maya.
Festa mahein Paróquia Ermera nian be inicia ho celebração Eucaristia Chanceler Arquidiocese Metrpolitana de Dili, Padre Paulus Maya iha nia reflexão acentua liu Nain Feto nuudar mediadora hodi hatutan ita ema nia Ema problema ba nia Oan Jesus Cristo.
“Nain Feto Maria maka ema nebe besik ba ema, Nia besik hanesan Inan. Hanesan Inan Nain Feto hatene no sente nia oan sira nia situação, Nia oan sira nia problema, Nia oan sira nia susar, ema nia problema. Tanba sente oan sira nia situação, problema no susar, nune’e halo Nain Feto comunica kedas ba Nia Oan Jesus ita ema nia situação no problema sira. Ida ne’e ita bele rona husi Evangelho ohin “Sira nia tua hotu ona”. Tua hotu iha festa ida nia laran, claro que situação ne’e difícil ba festa nain tanba problema boot dignidade festa nain nian ba convidado sira no Nain Feto comunica kedan ba Jesus hodi dehan “Sira nia tua hotu ona”. Dehan atual Pároco Paróquia Imaculada Conceição Catedral Dili ne’e.
Amo Paulus hatutan, resultado husi comunicação nebe Nain Feto halo ho Jesus, Nain Feto hato’o ba Jesus kona ba situação nebe festa nain hasoru, maka laos ida Jesus halo milagre ne’e maibe ida nebe’e Nain Feto dehan ba ema sira. “imi halo tuir buat nebe Nia haruka”, katak Nain Feto hatene no fiar katak sei rona no halo tuir nia no ida seluk katak Jesus sei halo ação ruma hodi salva ema nia situação.
Remata tiha missa agadecimento hodi celebra festa mahein Paróquia Ermera nian ne’e, Pároco da Paróquia de Nossa Senhora de Lourdes Ermera, Padre Patrocinio da Cunha aproveita tempo ne’e hato’o agradecimento ba Padre Paulus Maya nebé representa Arcebispo Arquidiocese Metroplitana de Dili, Dom Virgílio Cardeal do Carmo da Silva hodi celebra missa hamutuk ho sarani paroquiano Ermera. Nune’e mos ba Padre sira husi vigararia Ermera, padre convidado sira be presente no contribuição ba festa solinidade Nain Feto Maria de Lourdes. Além ne’e Pároco mos agradece liu-liu ba Suco Legimea nebe simu responsabilidade durante tinan tomak hodi halo preparação ba to mai festa solenidade Paróquia nian ne’e.
Tuir programa annual paróquia nian katak, suco nebé sei toma conta ba atividade Festa mahein Paróquia Ermera nian iha tinan oin mak Suco Mau-Udo.
Missa refere participa máximo tebes housi Paroquiano de Paróquia ermera nian, Autoridade Município no local, autoridade segurança, líder comunitário, madre, frater sira.
