DCAD (24-27.02.2025) Comissão Juventude Católica Arquidiocese Metropolitana de Dili (COJUCAD), durante loron tolu nia laran hahu housi loron 24-27 fevereiro tinan ne’e, hala’o atividade formação ba juventude católica husi nível vigararia nian hanesan vigararia Ermera (Paróquia Nossa Senhora de Lourdes Ermera, Paróquia Francisco Xavier Hatulia, Paróquia São José Atsabe, Paróquia Nossa Senhora do Carmo Letefoho no Paróquia Nossa
Senhora da Graça Gleno); Vigararia Aileu (Paróquia São Pedro e São Paulo Aileu (la marca presença), Paróquia São José Operário Remexio, Paróquia Nossa Senhora do Carmo Lequidoe no Paróquia São Francisco Xavier Dare ‘la marca presença’); no vigararia Oe-cusse (Paróquia Nossa Senhora do Rosário Numbei-Oecusse.
Formação sira ba loron dahuluk nian concentra iha tema; ‘LITURGIA’ ho nia orador Padre Justino Tanéc. Liu tiha ne’e continuação formação ho nia tema DOGMÁTICO’ ho nia orador Padre António Quencer to’o remata. Hafoin tama ba formação loron daruak nian ho tema, ‘EUCARISTIA’ nebé partilha husi Senhor Marçal Evaristo; hafoin continua hikas ho tema “Dilexit Nos (Nia nebe hadomi ita) ho ninia orador Padre Francisco da Costa to’o remata. Ba loron ikus formação nian ho nia orador Madre Julia Marça, FMA ho tema Spes non confundit (Esperança la bosok),
continua mos ho formação ‘Administração Paroquial’ nebé partilha housi Padre Mariano Maia no ‘Maneira Congresso Hari’i Estrutura nebé hato’o husi Irmão Andre Paulo. Remata tiha formação refere encera atividade sira hotu ho missa agradecimento be preside housi Padre Cirilo Maia dos Santos.
Entretanto iha homilia Padre Cirilo Maia dos Santos nafatin husu ba foinsa’e sira nebé tuir formação atu agradeçe ba Maromak ba biban graça nian nebé hetan liu housi formação sira basá sei iha foinsa’e barak maka seidauk hetan oportunidade kmook sira hanesan ne’e.
Atual capelão Universidade Católica Timorense (UCT) ne’e mos husu ba jovem hirak nebe participa ona iha formação atu labele kolen sai sasin no fo tempo bebeik ba eucaristia. Aprende sai ki’ik iha ema seluk nia le’et no Maromak iha joven sasin nain sira nia moris.
Tuir programa anual nebé Comissão Juventude Católica Arquidiocese Metropolitana de Dili (COJUCAD) iha katak housi Formação tuir mai sei hala’o hikas iha fulan março ho jovem husi vigararia seluk nebe partençe ba Arquidiocese Metropolitana de Dili.
