HOMILIA
Oe-Cusse – Domingo, 25 de Maio de 2025
Arcebispo de Dili S.E Dom Virgílio Cardeal do Carmo da Silva
Ema Nebé Hadomi Ha’u Nia Sei Halo Tuir Ha’u Nia Liafuan
Ba Pároco nomeiado, Administrador Paroquial sessante, amululik concelebrante sira, Madre sira, sarani doben sira hotu, Bomdia e bom Domingo.
Ohin hakarak hahu ho liafuan tolu (3); Abertura, Acolhemento e Disponibilidade. Abertura katak nakloke, loke na; acolhemento katak ida nebé simu; disponibilidade katak pronto atu halo tuir.
Liafuan sira ne’e ita rona fila fila katak laos liafuan foun; ita rona bebeik iha santa missa sira, amo sira ninia homilia ou dala ruma ita rona iha retiro sira. Iha âmbito uma creda nian, liafuan hirak ne’e maske ita dehan katak rona bebeik, maibe balun liafuan ne’e fácil, comprende e halo tuir. Maibe balun sente todan atu halao iha moris.
Maske nune’e, ho roman Maromak nia liafuan nebé ohin ita rona, Santa Creda laiha dalan seluk, maibe bebeik haklaken atu sarani sira labele lao sala dalan. Ne’e duni, ita bele husu saida los mak característica Igreja ida, Creda ida nebé ita nain Jesus Cristo ninian!
Ohin ita rona iha Leitura sira haktuir mai ita; Cidade Santa Jerusalem tun husi Lalehan, Maromak nia presença, Maromak nia glória nebé nabilan. Lao iha tempo sei dok atu identifica nia-an ho imagem furak nebé Livro Apocalipse apresenta. Hare ba Jerusalem foun ita hare ba ita nia an hanesan Igreja foun nebé lao ba Maromak; lao ba Jerusalem foun, ba Lalehan foun, rai foun,
Ita nebé hanaran-an ema lao rai hanesan Livro Apocalispe dehan, ita lao ba hasoru Jerusalem foun, rai foun, lalehan foun. Iha imagem ida ne’e mak continua inspira ita atu lao iha dalan nebé los. Se lao iha dalan los ita buka atu halo conversão.
Ita hatene katak 2025 nudar ano Jubileu da Esperança ninian. Los duni igreja fó mai ita tinan 50 ita sarani sira lao, nudar Igreja ida lao hamutuk iha ita nia moris, maibe iha tinan ida ne’e nia laran Santo Padre fó mai ita opurtunidade ida ba ita hanaran Jubileu tinan osan mean ninian. Katak opurtunidade ida mai ita atu aproveita hodi halo ita nia peregrinação, buka atu cumpri tuir lalaok sira peregrinação nian, atu ita bele tama husi odamatan Santa nune’e ita bele hakonu ita nia-an hodi lao iha dalan nebé los.
Ohin iha segunda leitura koalia mos kona ba Templo Boot Jerusalem nebé halo ho muro nebé as, ho odamatan 12. Odamatan 12 ne’e símbolo salvação nian ba ema hotu, Maromak hadomi ema hotu la exclui ema ida. Ida ne’e mak lori ita ohin, ita nebé lao rai hatudu mai ita atu lao ba hasoru Na’i Maromak.
Espírito Santo laos ita ema mak inventa, laos amululik ida, bispo no Papa ida mak inventa, maibe Jesus mak promete ba nia escolante sira. Jesus dehan Maromak haruka ba imi hotu ninia Espírito Santo hodi bele hanourin imi ba buat hotu-hotu. Ne’e duni Creda ne’e ita bele dehan katak laos ema ida ninian, igreja laos ema ida ninian maibe Cristo ninian tanba Cristo mak hari no tau matan ba Creda ida ne’e no sarani ida-idak.
Tan ne’e ohin ita mos bele dehan, Creda mos la depende ba bispo ida, tanba ohin iha bispo ida aban bele iha fali bispo seluk, ohin bele iha pároco ida, aban bele iha pároco seluk hanesan ohin ita assiste kona ba despacho ho provisão Administrador Amo Júlio no Amo Carlos ninian. Tinan ida liu ba Amo Júlio mak Administrador no hahu ohin Amo Carlos mak assume fila fali cargo ba paróquia ida ne’e.
Ne’e duni igreja, paróquia ka Diocese la depende ba bispo ida, amululik ida ka pároco ida, maibe ida ne’e depende ba Cristo; Cristo mak hari, Cristo mak ninia nain, tanba Cristo rasik mak dehan: Ha’u mak ALFA no Ha’u mak ÓMEGA. Tanba ne’e Espírito Santo lao hamutuk ho sarani sira hakbesik ba Jerusalem foun.
Ita mos bele dehan iha dalan ida ne’e convida mos ita atu lao iha dalan nebé los. Tan ne’e wainhira ita hanoin fila fali ba iha missão ida amululik ida ninian, se Cristo mak nain, Pároco nia knar atu halo buat hotu atu manan klamar sira.
Pároco nudar instrumento ida Maromak ninian mai atu tulun sarani sira atu lao iha dalan nebé los. Liu-liu amu pároco foun. Serviço hotu nebé amo Pároco halo mak atu manan klamar sira, halibur klamar sira barak liu tan atu lori klamar sira ba Maromak, salvação klamar sira nian, hari Maromak ninia reino.
Maibe dala barak iha mos tendência ida quando pároco ida foin mak tama iha fatin ida liu-liu paróco sira nebé muda husi paróquia ida ba paróquia seluk nia hanoin kedas ona atu hari capela, escola, ida nee mos importante atu hadia, maibe buat nebé importante liu laos atu hari uma tanba Igreja ne’e laos Uma maibe Ema, Sarani. Ne’e duni Amo Pároco ida mai ba sarani sira hodi tulun sarani sira, hakbesik ba sarani sira, nia mai atu hari Maromak nia reino liu husi ninia sasin moris nudar instrumento ida Maromak ninian atu hatudu dalan ba sarani sira. Ida ne’e mak ita dehan pároco ida nia knar.
Wainhira koalia kona ba ida ne’e hau hanoin fali kona ba São Francisco de Assis iha sec. XII, wainhira nia sei jovem, nia ba reza iha capela ida ho naran São Damião iha rai Itália neba, nia hakneak hodi hateke ba iha cruz, jovem ida nebé riku iha buat hotu-hotu, maibe nia hare katak buat hirak ne’e hotu la importante ba nia, nia sente hamrook ka mamuk ida iha nia laran. Tanba nee nia ba capela ida nia reza hodi hateke ba iha cruz no iha liafuan ida husi cruz ne’e dehan ba nia; Francisco keta reza barak liu, hamriik ba hadiak Ha’u nia igreja a’at ona. Francisco foinsae ida hare ba kalen sira kuak barak ona, muro sira monu ba dadauk, nia hahu atu sosa sasan sira atu hadia, maibe husi cruz Jesus dehan ba nia “laos Igreja nebé halo ho fatuk, maibe Igreja nebé hari ho Maromak ninia povo-laos hari uma mak inportante, maibe buka oinsa mak atu hadia sarani sira nia moris, oinsa mak tulun sarani sira bele conhece Maromak, oinsa mak tulun sarani sira bele hadomi malu, oinsa tulun sarani sira bele fila fali ba Maromak. Ida ne’e mak hanaran Corpo Mística Cristo ninian.
Ohin hare ba buat hirak ne’e hotu ita dehan capaz no furak, maibe saida mak bele tulun ita atu bele conserva, persevera hodi buka buat nebé essencial iha moris. Iha Evangelho ohin ninian Jesus dehan “Quem me Ama Guardará a Minha Palavra e o Meu Pai o amará” se mak hadomi Ha’u halo tuir, moris tuir Hau nia liafuan sira ba, Ha’u nia Aman iha Lalehan hadomi nia. Ami sei ba iha Nia no Nia sei sai ami nia horik fatin. Ida ne’e mak buat ida nebé essencial wainhira ita ida-idak halo ita nia fuan sai fatin ida Maromak ninian. Buat ida essencial mak ida ne’e ita ida-idak hatene hare, hatene fihir, hatene hateke, hatene contempla ba Evangelho. Tanba Papa Francisco dehan Evangelho mak ksolok sarani sira nian. Ne’e katak rona Evangelho tau iha Fuan.
Dala barak tama husi los sai husi karuk, fuan ne’e mamuk, oinsa mak ita rona Maromak nia liafuan barak no pedasuk oan ida de’it mak monu iha hau nia fuan mos sorte ona.
Buat nebé hau bele tau iha hau nia fuan, tau iha hau nia fuan, se ha’u sidauk pronto atu halo tuir karik, ha’u reza atu nune’e ha’u bele iha força, Espírito Santo atu bele tulun ha’u hodi bele halo didiak hanesan ohin Jesus rasik dehan; Espírito Santo sei hanourin ó atu halo buat hotu-hotu wainhira hatene rai buat hotu iha ó nia fuan.
Ha’u hakarak termina ho Santo Agustino ninia liafuan “laos lao haleu mundo, maibe fila fali ba ó nia laran tanba lialos ne’e iha ita ida-idak nia fuan”. Se Maromak iha ita nia fuan ita bele hatene hadomi malu, wainhira Maromak iha ita nia fuan sempre iha dalan ba ita atu resolve ita nia problema. Maibe se Maromak laiha ita nia fuan, ita labele hari dame. Tanba ne’e Santo Agustino dehan ó hakarak buka lialos laos ba iha livro, ba iha internet, maibe fila fali ba ó nia conciência, rona ó nia fuan tamba lia los ne’e iha ita ida-idak nia fuan. Husik ita nia fuan mak sei dehan, ó sala ba confessa, ó sala ba husu desculpa.
Ita husu ba Maromak atu iha VI Domingo tempo ordinário ninian, Evangelho Nain Jesus Cristo nian bele tulun ita hotu atu ita hatene loke ita nia fuan ba buat nebé essencial husi Maromak, ita pronto halo tuir Maromak nia hakarak, ida ne’e de’it mak ita bele goja buat nebé dehan Rahun diak Maromak ninian.
