Francisco, Amo Papa Domin no Laran Luak nian
Dom Anuar Battisti Arcebispo Emérito de Maringá (PR)
Ho fuan triste maibe nakonu ho agradecimento ba Maromak, ita hamutuk ho Kreda iha mundo tomak hodi agradece ba Papa Francisco nia moris no missão, nebé ohin fila fali ba Aman nia Uma. Ninia saída marca rohan husi era transformativa nebé profundamente iha história Kreda nian, maibe mós inicio husi tempo ida iha memória moris nian, iha nebé ninia gesto sira, ninia liafuan sira no hilin sira sei continua inspira geração sira.
Husi momento nebé nia mosu iha varanda Basílica S. Pedro nian iha kalan 13 Março 2013, hodi husu ho haraik-an ba povo nia oração molok haraik benção ba sira, ami hatene katak ami hasoru hela estilo foun Pontificado nian. Jorge Mario Bergoglio, Amo Papa Latino-Americano dahuluk, jesuita ida, hili naran Francisco – no ho ida-ne’e nia hakuak missão atu sai sinál simplicidade nian, cuidado ba ema kiak sira no sasin radical ba Evangelho.
Papa Francisco mak, liuliu, pastor ida nebé besik, nebé la ta’uk atu hakbesik ba periferia existencial no geográfica sira. Ho gesto concreto no liafuan direto sira, nia mak profeta ida laran luak nian, hanesan nia expressa ho apropriadi iha bula de proclamação do Jubileu Extraordinário da Misericórdia (2015): “Laran luak mak ai-riin nebé sustenta Kreda nia moris.” Iha nia liderança nia okos, Kreda descobre fila fali beleza simu, rona no la’o ho ema hotu, liuliu sira nebé vulneravel liu. Ninia opção preferencial ba ema kiak sira, ninia apelo insistente ba conversão pastoral, ninia denuncia profetica kona-ba indiferença globál ba sofrimento humano, no ninia defesa incansavel ba ecologia integrál – hanesan expressa iha Encíclica Laudato Si’ – halo nia sai líder espíritual ida ho importância global, nebé rona la’ós de’it hosi Católico sira, maibe hosi ema hotu-hotu hosi fiar no ideologia sira. Ema ida oração silencio nian, devoto ba Santa Teresa no São José, Papa Francisco combina iha nia an rasik bibi-atan nia firmeza no aman nia ternura. Ninia lian asessivel kona fuan sira, no ninia homilia dadeer nian sira iha Santa Marta, nakonu ho matenek pastoral, forma escola loloos ida espiritualidade simples no klean nian.
Ita mós labele haluha ninia coragen nu’udar reformadór. Ho firmeza evangelica, nia hasoru desafio sira iha Kreda laran, hodi promove transparencia, sinodalidade no participação. Nia convida ita atu sai Kreda ida nebé la’o ba oin, ho “bibi nia morin”, comprometido atu harii mundo ida justo no fraternu liu.
Iha loron 21 fulan-Abril tinan 2025, wainhira mundo despede Maromak nia atan boot ida-ne’e, ita hetan bolu atu preserva no multiplica nia Pontificado nia fuan sira. Papa Francisco sai duni presente Espírito Santo nian ba ita-nia tempo. Ninia memória sei moris iha fuan sira nebé hare iha nia sinál nabilan ida Cristo nia presença nian iha mundo.
Mai ita reza ba nia klamar, hodi entrega nia ba Na’i nia laran luak nebé nia serví ho nia fuan tomak. No atu nia continua harohan da’et husi lalehan ba Kreda ida-ne’e, nebé nia hadomi tebes. Descança ho hakmatek, Papa Francisco! Mundo ne’e fatin ida nebé di’ak liu tanba ita-boot moris iha nia.
Bele acesso nia link iha ne’e: https://www.cnbb.org.br/francisco-o-papa-do-amor-e-da-misericordia/
