DCAD (Vaticano 25.04.2024) Informação ne’e fó sai hosi Gabinete Imprensa Santa Sé nian, nebé fó sai mós katak Congregação Geral Cardeal sira nian dahaat hahu iha tuku 9:10 dadeer (horas local), ho momento ida oração nian, tuir fali ho juramento nebé halo hosi sira nebé to’o ohin. Seção ne’e remata iha tuku 12:20 lokraik.
Iha intervenção 33 nebé aborda tema sira Igreja no mundo nian no continua ho leitura Constituição Apostólica Universi Dominici Gregis to’o parágrafo 32.
Iha Congregação nia rohan, mestre celebração litúrgica pontificial sira, Arcebispo Diego Ravelli, ko’alia no esplica kona-ba hili rito funeral nian, atu nune’e sai funeral pastor ida nian, no la’ós soberano ida nian.
Rito taka Papa Francisco nia caixão sei hala’o iha kalan ne’e, no sei sai hanesan cerimonia privada ida.
Aban, durante misa funerál, autoridade sira sei organiza tuir protocolo: iha linha dahuluk sei iha presidente sira Argentina nian — Amo-Papa nia patria — no Itália nian; depois, membro sira hosi família real no presidente sira seluk, tuir ordem alfabética iha lian Frances. Lista completo hosi delegação sira sei fó sai iha loraik.
Proceção ho veículo nebé sei tula Papa nia futar isin mate ba Basílica Santa Maria Maggiore nian, sei sai liuhosi Portão Perugino, nebé localiza iha Casa Santa Marta nia sorin, la liu hosi Praça São Pedro nian. Viagem sei demora besik meia-hora no Papa nia caixão sei visivel. Hakoi mate ne’e sei hala’o cerimónia privado ida.
Iha Domingo loraik, Cardeal sira sei ba Santa Maria Maggiore, ho sira nia to’o nebé marka ona ba tuku 4:00 lokraik. horas local; sira sei liu hosi Odamatan Santa, hodi vizita Papa Francisco nia rate no tuirmai capela nebé hatudu imagen Salus Populi Romani nian. Tuirmai sira sei celebra Véspera hamutuk. Congregação Geral Cardeal sira nian tuirmai sei hala’o iha Segunda, 28 Abril, tuku 9:00 dadeer horas local.
