DCAD (12.05.2025) Santo Padre Leão XIV iha loron 12 maio foin lalais ne’e, hala’o audiência ho jornalista husi mundo iha salão Paulo VI nian, hodi hato’o ninia profundo agradecimento ba serviço sira nebé jornalistas halo ona no halo hela to’o momento ida ne’e.
Iha Santo Padre ninia mensagem ba jornalista hateten, jornalista ida-idak percisa halo compromisso hodi lori ba oin comunicação diferente ida nebé la halo buat hotu atu buka de’it consenso, la hatais-an ho liafuan agressivas, la adopta modelo competição, nunca separa oinsa buka lialos ho domin nebé mak ita temque buka ho haraik-an tebes.
“Maun alin inan feton sira, hau hato’o bemvindo ba imi hotu representante média sira husi mundo tomak. Ha’u agradece barak imi, tan serviço nebé imi halo tiha ona no halo hela too momento ida ne’e, nebé ba igreja essencialmente nudar tempo graça ida. Iha sermão da montanha Jesus dehan “Ksolok ba sira nebé buka hari paz. Ida ne’e rahun diak kmanek ida nebé desafia ita hotu, bolu liu tan ita ida-idak atu halo compromisso hodi lori ba oin comunicação diferente ida nebé la halo buat hotu atu buka deit consenso, la hatais-an ho liafuan agressivas, la adopta modelo competição, nunca separa oinsa buka lialos ho domin nebé mak ita temque buka ho haraik-an tebes”.
Sucessor Pedro nian ne’e reforça tan katak, Maneira oinsa jornalista sira comunica ne’e fundamentalmente importante: tem que dehan lae ba funu liafuan ho imagem sira, tem que rejeita paradigma funu nian.
“Paz hahu husi ita ida-idak, hahu husi oinsa ita hateke ba ema seluk, rona ema seluk, koalia kona ba ema seluk. Nune’e mak maneira oinsa ita comunica ne’e fundamentalmente importante. Ita tem que dehan lae ba funu liafuan ho imagem sira, ita tem que rejeita paradigma funu nian”.
Atu remata Papa Leão bolu atenção ba mundo katak, Sofrimento husi jornalista sira nebe ema kaer hodi castigo tamba sira buka no relata lialos, desafia conciência nação sira ho comunidade internacional nian, no convoca ita hotu atu proteje, valor husi liberdade, expressão, no imprensa.
“Permite hau atu ohin hato’o fila fali tan igreja ninia solidariedade ba jornalista sira nebe ema kaer hodi castigo tamba buka no relata lialos. Ho nee hau husu atu liberta tiha jornalista sira ne’e nebe mak kaer no hetan hela castigo.
Igreja reconhece iha testemunho hirak ne’e nebe (jornalista sira hatudo), sira nebe relata hela kona ba funu, mesmo ho custo sira ninia vida rasik, coragem husi sira nebe defende dignidade, justiça no direito povo sira nian, atu bele informado, tamba so halo povo sira informado deit mak foin bele halo escolha livre. Sofrimento jornalista sira nee nian be ema castigo hela, desafia conciencia nação sira ho comunidade internacional nian, convoca ita hotu atu proteje, valor husi liberdade, expressão, no imprensa. Maun alin doben sira, obrigado barak ba imi tamba imi ninia serviço ba lialos.
