HOMILIA
TOMADA DE POSSE BA PÁROCO FOUN PARÓQUIA PADIAE
24 DE MAIO DE 2025
ARCEBISPO DE DILI S.E DOM VIRGÍLIO CARDEAL DO CARMO DA SILVA
Ohin ita hotu mai hamutuk iha ne’e hanesan momento furak ida mai ita atu agradece ba Maromak ba buat barak nebé ita simu. Ohin mos ita celebra Festa Maria Auxiliadora nian “24 de maio”. Ita halibur hamutuk iha Eucaristia Santa ida ne’e hamutuk ho comunidade sarani hodi marca tan história foun ida ba Paróquia Padiae. Ohin Pe. Carlos termina ninia kna’ar nudar Pároco durante tinan 9 nia laran ita hatene katak Pároco primeiro iha Paróquia ida ne’e. no ohin mos ita mai hamutuk hodi simu ita nia Pároco foun hodi continua hala’o ninia missão hodi haklaken Evangelho.
Ohin tomada de posse ba pároco ida laos de’it ita dehan katak evento baibain ida, maibe iha ninia sentido ida nebé klean liu tan; evento ida nebé marca ho fiar. Tan ne’e orsida pároco foun sei hakneak hodi reza credo hamutuk ho ita hotu. Buat nebé nia hala’o tanba nia fiar, nia simu kna’ar ida ne’e hodi servi sarani sira iha rai Padiae.
Ne’e duni buat nebé mak halo Evento ida ne’e sai especial, extraordinário ne’e, ita hare fila fali ba Leitura oinsa São Paulo haktuir mai ita kona ba Paulo ho Barnabe nebé decide hodi visita maun-alin sira nebé simu tiha ona batismo atu hametin sira nia fiar. Tan Paulo Mesak de’it nia hili tan Timotio, maibe ikus mai sarani sira ladun contente ho Timotio tanba nia laos ema Judeu! Tanba ne’e sira husu ba Paulo atu nia bele simu circuncisão atu nuen’e nia bele halao kna’ar didiak. Nune’e Paulo simu sira nia proposta husu ba Timotio atu halo duni circuncisão atu nune’e nia bele serviço diak hodi fó an tomak ba povo. Tanba ne’e mak Paulo dehan; “hanesan Apóstolo nia temque halo-an hanesan ema Judeu atu nia bele hala’o kna’ar sira barak liu tan ba Maromak-halo buat hotu-hotu tanba Evangelho”.
Hanesan ne’e mos ha’u hakarak atu dehan; liu-liu ba iha Amo Mariano hanesan Paulo dehan ba Timotio, ha’u mos dehan ba ita boot nudar pároco foun aprende husi buat nebé Paulo halo ba Timotio- amo Mariano hakasan ba sai ema Atoni oan ida mak bele servi didiak Oe-Cusse oan sira. Buat hotu ó halo laos atu foti an maibe hanesan Paulo dehan atu manan klamar. Buat hotu nebé amo sei halo laos deit atu aprende deit Baikenu, maibe halo oinsa mak bele besik liu tan ba labarik sira, foinsae sira, família sira, katuas ferik sira tanba buat ida deit “EVANGELHO”. Buat hotu bele halo, maibe buat principal liu mak atu manan klamar ba Maromak, atu lori klamar barak liu tan ba Maromak. Ida ne’e mak kna’ar ba amo, laos deit ba amo mesak maibe amo sira hotu. Tanba ne’e ba Amo Mariano halo-an sai hanesan Atoni oan ida atu bele servi hodi lori klamar sira besik liu tan ba Maromak.
Wainhira hanoin kona ba ida ne’e, halo ha’u hanoin fali iha Antigo Testamento iha momento ida nebé Abraão nia ba funu no nia manan fila mai liurai Sodoma nian dehan ba nia; fó mai ha’u soldado sira, sasan hotu nebé ó funu hetan ó lori ba, ha’u precisa deit mak ema atu tulun. Maibe Abraão nudar ema fiar nain la husu buat ida. E nune’e mos mai ita amululik sira liu-liu ba amo Mariano buat ida ita boot temque tau iha neon mak ida ne’e “buka mak klamar sira nia diak, sira seluk lori ba. Ne’e duni laos sasan, laos mundo, mak pároco ida buka, maibe buka mak klamar barak liu tan ba Maromak”. Ne’e mak ita amululik sira nia kna’ar katak lori klamar sira barak liu tan ba Maromak. Tan ne’e ho Espírito Sinodalidade nian hanourin ita atu hamutuk ho colaboradores sira no sarani sira atu ita bele manan klamar hotu-hotu.
Oe-cusse ita hatene katak odamatan fiar nian. Nee duni Oe-Cusse temque sai nafatin sinal ida especial. Ha’u hatene katak autoridade sira hakasan hela hamutuk ho Oe-Cusse oan sira atu conserva cultura, tradição, valor fiar nebé desde uluk beiala sira simu to’o agora ita continua lori ba oin. Ida ne’e mak exige ita nia lao hamutuk ho sarani sira hanesan Espírito Sinodal ninian atu lao hamutuk iha missão ida ne’e atu ita bele haburas liu tan fiar sarani nian iha Paróquia ida ne’e.
Kna’ar ida ne’e nudar kna’ar missionário nian ida laos buka de’it ema ida nia hakarak maibe buka Maromak ninia hakarak. Tan ne’e nudar pároco buka atu aprende buka atu sai Atoni oan ida hodi rona sarani sira nune’e mos sarani sira precisa mos rona imi nia pároco.
Evento ida ne’e sai evento especial liutan tanba Igreja Universal. Ita hotu hatene katak iha 18 liu ba ita nia Papa Foun Papa Leão XIV halo ninia missa inauguração ninian iha Roma. Iha ninia homilia dahuluk nia apresenta ninia an nia dehan “Ha’u nudar atan ida iha fiar, ha’u soi ba ida ne’e duni, ha’u hamrik iha imi nia oin ho tauk, nakdedar, ha’u mai hanesan maun ida hakarak atu sai atan ba imi nia fiar no imi nia ksolok”.
Papa ida iha nia missa iha Roma apresenta dehan hau mai nudar atan ida atu servi. Ida ne’e mak dehan ita lao tuir Cristo nebé iha cruz. Tanba ne’e mak ohin ita dehan katak poder pároco nian ne’e laos poder mundo ninian, maibe poder atu servi. Ita nia poder mak Cristo nebé iha cruz nudar atan mai atu servi. Tanba ne’e sarani sira precisa lao hamutuk ho imi nia pároco hodi sai família ida de’it “sarani paróquia Padiae”. Santo Padre iha ninia homilia mos nia dehan; nia hakarak atu sai sasin, diálogo iha mundo ida nebé ohin loron nakonu ho funu atu bele hakiak paz iha ema ida-idak nia fuan. Nia mos hanoin fali kna’ar sucessor Pedro nian Servus Servorum Dei (atan atan sira nian) nune’e Cristo sai atan to’o mate iha cruz. Nia kna’ar mak atan ida domin ninian ba ninia maun-alin sira.
Hanesan ohin ita rona iha Evangelho ‘Jesus dehan buat nebé mosu mai Ha’u sei mosu mos ba imi, ema fó terus mai Ha’u, sira mos sei fó terus ba imi, se sira curmpri Ha’u nia liafuan sira mos sei cumpri imi nian, se imi fiar metin iha Ha’u nia liafuan, Ha’u mos sei laran metin ba imi, imi nebé metin iha Ha’u, Ha’u sei hela metin ho imi.
Ne’e duni ba Amo Mariano no ba sarani tomak Padiae ninian dala ida tan ita agradece ba Maromak ba Nia liafuan hirak nebé Nia fó, nune’e mos ohin ita celebra Festa Maria Auxiliadora ninian hanesan Anjo dehan ba Nain Feto no Nain Feto hatan dehan Atan oan mak ne’e halo tuir ita nia hakarak ba! Ne’e duni mai ita harohan atu liu husi intercessão Nain Feto ninian hanourin ita hotu laos ita admira de’it maibe hakasan atu comprende sentido ida ne’e ; sai atan atu servi
