‘Ha’u Nia Fuan Seidauk Hakmatek, Wainhira Ha’u Seidauk Descança Iha Maromak’
Homilia
“19 de maio de 2025”
Arcebispo de Dili iha Missa Fúnebre ba Maktoban Saudoso Rev. Pe. Domingos da Silva Soares nia Futar Isin Mate iha Sé Catedral Dili.
Maun bin feton sira hotu nebé Amo Domingos da Silva Soares hadomi! Bomdia
“Padre Domingos Maubere sempre dehan liafuan, Na’i ita cria ami ba ita ‘ha’u nia fuan seidauk hakmatek, wainhira ha’u seidauk descança iha Maromak’ (St Agustino nia Liafuan)
Expressão ida ne’e representa ida ema ida-idak ninia desejo nebé profundo hakarak ida nebé klean liu haksumik hela iha ita ida-idak nia fuan laran nebé halo ita buka nafatin quase atu hanesan luta interior ida nebé ita percore husi loron ba loron atu bele ba to’o iha ksolok no hakmatek ida nebé lolos nebé ita hetan deit iha Na’i Maromak. Ita nia existência física hamrook ba nececidade espíritual nebé lori ita ba moris iha Esperança no fiar ba Maromak nebé cria ona ita.
Nia hakarak ita ema liu tiha experiência no drama hotu moris nian, ema sente iha fuan lian ida nebé bisu-bisu bolu atu fila fali ba Nia. Última resposta no último recurso ba ita nia inquietações mak Na’i Maromak deit. Pergunta distencial sira hanesan; Tansa mak ema ida terus, tansa mak ema ida nebé ita hadomi mate no husik hela ita! Tansa mak moras nebé la cura hela deit! Tansa ema nebé ita tau esperança lakon iha ita nia le’et! Wainhira hasoru preguntas sira ne’e resposta diak no prudente mak silêncio entrega buat hotu ba Maromak.
Santo Agustino liu tiha experiência hotu nebé nia hasoru, to’o iha fase a’as liu husi nia moris nia to’o iha reconhecimento katak laiha tan fatin seluk nebé hakmatek liu mak iha deit Maromak.
Maktoban Pe. Domingos Soares nebé toman liu bolu Amo Du/ amo Maubere, kaer lifuan Santo Agustino nian ida ne’e hodi dehan fila-fila katak; Na’i ita cria ami ba Ita no ami nia fuan sidauk hakmatek wainhira sidauk descança iha Ita. Liafuan ida ne’e sai ona nia oração wainhira nia sei is iha, temi liu tan wainhira nia moras no temi ba dala ikus momento nia husik Is.
Iha loron sexta-feira loron 16 fulan Maio dadersan wainhira rona katak amo Du husik ona Is ha’u mai kedas iha Hospital (ICU) hodi reza no no fó bênção wainhira hateke ba nia oin nabilan, hakmatek. Hatudu hela soriso ida nebé transmite mai ita hotu nebé hare nia katak oras ne’e nia toba ona ho hakmatek, nia laterus tan ona, la moras tan ona, nia ba hasoru ona Maromak nebé cria no bolu nia.
Wainhira hateke ba nia oin nebé nabilan no hakmatek transmite mos mensagem ida katak iha momento ikus husi nia moris nia aprende hodi temi Jesus nebé iha cruz tutun; Buat hotu tuir los ona, halis nia ulun entrega nia Espírito. Buat hotu tuir los ona katak, missão cumprida, todan hotu nia lori ona.
Domin ida nebé nia fó ba Igreja too ona Rohan. Ema Santo preparaan ba nia loron mate. Wainhira nia taka matan ba dala ikus nia hatene katak oras ne’e nia moris fali ba Maromak ida nebé trata nia, nebé halo nia hare Maromak matan ho matan dehan; Amo Du mate iha fulan Nain Feto nian, nia aguenta ho nia condição nebé critico hodi celebra tiha nia loron moris iha loron 12 fulan Maio molok celebra 13 de maio Nossa Senhora do Rosário de Fátima. Wainhira ami canta música nain Feto ninian masque iha hela condição sira ne’e hotu maibe nia hakasan atu canta.
Amu Du, amululik santo no devoto ba Na’in Feto hatudu iha nia moris no nia mate. Nia hatene katak Nain Feto mak Inan ida nebé acompanha nia iha missão hotu no hakuak, hametin nia iha nia fragilidade sira no iha momento ikus iha tinan ida ne’e mak lori nia ba hasoru Jesus Cristo. Mesmo que Amo Du laiha ona, maibe nia Espírito sei moris iha ita hotu liu husi legado nebé nia husik hela mai ita nudar amululik mak nia zelo pastoral no nia sai aman vocação ninian.
Amo Du nia zelo pastoral ne’e extraordinário. Quase nia moris tomak nia dedica ba iha moris pastoral nian moris besik ba sarani sira, conhece ema ida-idak, sai ba visita bairro no família sira, fó assistência ba ema moras sira, badinas reza missa.
Zelo pastoral ida forte hatudu nia intimidade nebé klean ho Jesus Cristo. No iha kedas vida formação ninian tuir ninia colega Amo Domingo Alves fo sasin katak, nia zelo pastoral ne’e hatudu ona wainhira nia hola parte iha grupo oi-oin wainhira nia sei estudante, hodi tuir organização sira nebé organiza. Sai tiha amululik forte liu tan wainhira mai too iha Timor. Iha situação difícil wainhira amo bispo tempo neba nian haruka nia ba halo nia primeira missão iha Ossu-Viqueque nudar pastor gerante, nia percorre fatin barak hodi fó assistência pastoral, celebra sacramento sira, nia besik ba sira nebé terus, kiak hamlaha no moras. Liu tiha tempo naruk iha Ossu nia mos halo knar iha Suai, iha Letefoho no ikus liu iha Becora.
Nudar aman vocação nian iha Paróquia nebé halo missão ba nia cria grupo vocacional hodi prepara adoluscente no foinsae ba Naiulik no madre. Ita tem que reconhece katak nia oferece ba igreja Madre, Padre lubuk ida no fó mos leigo diak sira mai husi grupo vocacional hodi tur iha instituição sira. Iha fatin nebé deit nia visita nia bolu nafatin ba família atu oferece sira nia oan ba creda hodi servi nudar amululik no madre ‘consagrado no consagrada’.
Amo Du sai ona fini vocação nian oras ne’e buras iha ita nia rain. No nia sei continua iha Lalehan hodi tau matan no harohan hodi tau matan ba nia amululik no madre nebé continua nia espírito lao tuir nia dalan. Tan ne’e loron ida atu dehan deit
“Obrigadu Amu Du, tan sai ona aman vocção nian ba Igreja Timor. Amu Du mos hatudu ninia domin ba ema kiik, kiak hodi foti iniciativa hodi loke escolar hodi aoio kiika sira no jovem sira formação, atu liu husi fatin ne’e nia prepara mos liderança ba creda no ba nação.
Nudat timoroan nia hadomi rai ida ne’e no nia domin ba rai ida ne’e sasukat laek. Nia ho nia contribuição significante hodi luta ba ita nia auto determinação. Iha tempo dificil sira nia lori naran maubere iha nia an, ho buat hotu nebé nia halo ba rai no ema timor hatudu duni nia nudar timoroan ida Maromak oan, maubere oan nebé fo an tomak ba rai ida ne’e iha diak eh iha moras laran, ita hare iha condição nebé moras mos nia lahaluha atu reza ba rai timor atu sai diak liu tan, reza ba lider sir abele tur hamutuk koalia ho ulun malirin no tau hamutuk hanoin atu desemvolve rai no nhia povo timor.
Amo Maubere Obrigado ba ita nia domin ba rai no povo ida ne’e. iha lalehan continua harohan mai ami no liu-liu balider sira rai ne’e ninian atu hatene moris iha unidade, hodi tula dikur no kahe kbaas ba malu iha luta foun nebé nação timor atu ba oin hodi lori timoroan sira sai husi kiak no mukit ba iha prosperiedade, dame no ksolok.
Amo Du nia moris hatudu ona katak buat nebé ita halo ba ita nia an rasik sei hakoi ba rai hamutuk ho ita , maibe buat nebé ita halo ba ema seluk ba ita nia rain no ba ita nia emar sira sei hela ba nafatin, sei hatur nafatin husi geração ba geração seluk.
Amo Maubere halo ona nia parfum no husik on aba geração foun sira; ba amululik, ba bispo, sarani, madre sira atu continua moris nia espírito, nia legado no herança nebé nia husik hela atu hakerek iha nia história atu conserva no haktuir nafatin ba geração sira tuir mai no liu-liu tanba nia história, escritos sira.
Amo Du ohin ita fó ita nia adeus ikus ba nia. Husi ohin ba oin nia sei la hamutuk tan ho ita no nia sei la hakilar tan Gaudete et exultate-hamutuk ho ita, maibe oras ne’e nia moris dadaun Gaudete Et Exultate iha reino lalehan. Iha neba nia sei haksolok no hahi Maromak ba nafatin no nia sai nafatin harohan nain ida mai ita hotu nebé sei moris iha rai ne’e.
Pe. Domingos Soares iha nia morsi tomak kaer metin ba Jesus nia lia menon nebé ohin ita rona iha Evangelho; Ema nebé hadomi ha’u sei halo tuir buat hotu nebé Ha’u haruka no Ha’u nia Aman sei hadomi nia no Ami sei hela ho nia. Amo Du halo tuir ona to’o rohan Jesus nia Ukun fuan sira, nia domin ba Jesus Cristo no ba Aman Maromak iha nia lalaok moris nudar amululik to’o mate.
Obrigado Amo Du ba domin no obidiência, ba domin, ba sacrifício, ba exemplo da vida, ba dedicação tomak nebé amo fó on aba Igreja no ba povo ida ne’e.
