HEIN IHA NAROMAN, MORIS IHA DOMIN, HAHU HO ESPERANÇA
Hosi : Leonardo Sequeira Mau Falo
INTRODUÇÃO
Iha moris sarani fiar nain, tempo litúrgico iha sentido esperitual nebé klean tebes ho ninia contagem loron no tinan. Tempo Advento, Festa Natal no Celebração Tinan Foun, la’os de’it evento calendário, maibé hanesan dalan espiritual ida nebé orienta Fé, Esperança no Domin. Nune’e, iha doutrina igreja católica hanorin mai ita katak nudar ema cristã católica la celebra festa espiritual ida ne’e ho maneira superficial nian maibé atu prepara-an, reflete-an no tranforma-an.
Hein iha Naroman, Moris iha domin, Hahu ho Esperança, nudar sintetiza experiência espiritual ida nebé completa ba ita nudar sarani cristã. Advento convida ita atu hein Jesus Cristo hanesan Naroman, Natal convida ita atu simu Jesus Cristo nia moris ho domin no tinan foun convida ita atu hahu dalan foun ho esperança nebé funda iha Cristo.
Iha mundo ohin loron nian, iha mundo tomak especialmente iha rai doben Timor-Leste nebé ema barak moris iha barulho, consumismo no lakon sentido espiritual. Ha’u bele dehan nune’e, tanba realidade hatudu momos hela iha Tinan ba tinan, wainhira fulan dezembro besik ona, naroman sira começa nabilan iha cada uma, iha dalan ninin, iha jardim no iha igreja sira no pior-liu tan sunu fugetes, toca-musica natal nian iha bairro sira, loja sira no fatin-fatin. No ema hotu preocupa ho roupa foun, hahan especial, decoração, viagem no celebração sira. Maibé, iha actividade hirak ne’e hotu ninia le’et, mosu pergunta ida nebé iha nonok laran maibé kle’an tebes katak saida mak sentido natal nian ba ha’u?
Natal la’os de’it festa consumista ida, no mos la’os de’it tempo descansa ka halibur malu nian. Maibé iha mistêrio ida ne’e ninia fuan mak acontecimento simples, hakraik-an no silencioso ida: Kosok-oan ida nebé moris iha balada han – fatin, dook hosi Palácio sira no matan importante sira mundo nian. Kosok-oan ida ne’e, toba hela iha balada han fatin nian iha rai Belem, ba sarani sira Maromak nia Oan-Mane, nebé hili atu tama iha história humana liu-hosi dalan pobreza no simplicidade nian.
Iha artigo refleção ida ne’e, hakarak ajuda sarani cristã atu fila-fali ba fiar nebé loos no celebra festa Natal no tinan foun ho profundidade espiritual no responsabilidade moral.
Hein iha Naroman – Advento Tempo Converção no Praparação
Biblia hatuur liafuan Hein (espera) mak elemento central iha relação entre Maromak ho povo. Iha testamento tuan hatudu ba povo Israel hanesan comunidade ida nebé hela iha esperança “A Vinda do Mesias” nian. Hanesan iha Profeta Isaias declara “Povo nebé la’o iha nakukun, sira sei haree naroman” (Is 9,1). Naroman ne’e simboliza libertação, Páz no Renovação nebé promessa Maromak nian. Nune’e iha testamento foun interpreta promessa ida ne’e iha Jesus Cristo, nebé São João fo sai “Naroman loos mai iha rai-klaran, naroman nebé leno ema hotu-hotu” (Jo 1,9). Tanba ne’e, tempo advento mak hein Cristo nebé mai iha história Natal nian no hein Cristo nebé sei mai ho Glória.
Liafuan Advento mai hosi lian Latina “Adventus” significa “mai”, “Chegada” ka “Vinda”. Iha tempo Romana nian, Adventus usa atu refere ba “a vinda do Rei, Imperador” ka Autoridade boot ba cidade ida, nebé povo prepara ho ceremônia no festa. Nune’e, Advento mak tempo prepara-an atu simu Maromak nebé hola isin iha Jesus Cristo. Nune’e, iha tempo advento ninia laran nudar sarani Cristã, sei prepara-an durante semana haat, liu hosi lilin advento nian antes tama ba celebração Natal. Liu hosi lilin haat ne’e mak sai simbolu espiritual celebração natal nian; lilin hirak ne’e lakan progresivamente hahu hosi domingo dahuluk too domingo da-haat nian, simboliza katak naroman Cristo besik ona.
Lilin dahuluk: simboliza esperança, hein Mesias ho Fé no Confiança; Lilin-daruak: simboliza dame (páz), reconsiliação entre Maromak ho Humanidade; Lilin da-tolu: simboliza alégria, tanba vinda Cristo besik ona; no Lilin da-haat: simboliza domin (amor), manifestação suprema domin Maromak iha Jesus Cristo. Nune’e, sentido lolos hosi lilin haat advento nian hanorin mai ita nudar sarani cristã katak naroman cresce semana ida-idak, no convida fiar-nain cristã atu prepara-an ho consciência, fiar no esperança ba celebração Natal nian.
Moris iha Domin – Natal Mistério Encarnação, Reconciliação no Páz
Natal mak celebração religiosa ida nebé iha sentido profundo iha tradição Cristã nian. Nune’e, la’os de’it festa anúal, maibé Natal representa misterio espiritual ida nebé hatudu Maromak nia domin, humildade no solidariedade ho humanidade. Iha perspetiva teológica, Natal fundamenta iha conceito Encarnação, iha nebé Maromak sai ema liu hosi Kosok-Oan Jesus Cristo; “Liafuan ne’e halo-an ba ema, no horik iha ita leet. Ami hare nia gloria, gloria nudar Aman nia Oan Mane mesak, nakonu ho graça no lia-loos” (Jo 1, 14). Iha contexto ne’e, hamosu origem histórico tradição Presépio sai dalan visual no simbolico ida atu ajuda comunidade sarani cristã compriênde no vivência mistério ne’e ho maneira simples no concreta. Presépio la’os de’it decoração natal nian, maibé mos sai catequese viva ida nebé halo evangelho sai besik ba moris loron-loron.
Tradição Presépio mosu hosi iniciativa São Francisco de Assis iha Cidade Greccio, Itália, iha tinan 1223. iha nebá, em vez de celebra natal de’it iha Igreja tuir tradição normal, nune’e São Francisco hakarak hanoin fali simplicidade no susar nebé hasoru iha momento Kosok-Oan ninia moris. Iniciativa ida ne’e, laos atu halo representação teatral de’it, maibé atu convida ema hotu atu contempla ho matan rasik pobreza nian, humildade no amor Maromak nian nebé manifesta iha Kosok-Oan ninia moris. Husi momento ne’e, tradição Presépio hahu espalha ba igreja no comunidade cristã sira iha rai Europa no tuir mai ba mundo tomak.
Nune’e, ita entende ona katak Jesus ninia moris iha balada han-fatin iha rai Belem hatudu mai ita nudar sarani fiar-nain katak liu hosi Jesus Cristo ninia moris hatudu dunik humildade Maromak nian, nebé hili tama iha condição ema kiak sira nian, “Inan Virgem Maria, Nia tur ahi nia oan-mane boot, hodi haneras no hatoba nia iha balada han fatin, basá la-iha fatin oan ida ba sira iha uma laran” (Lc. 2,7). Misterio ida ne’e hanorin mai ita katak dignidade humana la depende ba riqueza ka poder nian, maibé ba amor Maromak nian. Too ponto ida ne’e, nudar sarani Cristã oinsá mak atu halo prática lolos tuir dimensão espiritual iha tempo Natal nian liu hosi amor no partilha ba familia, sociedade no ema seluk; hanesan iha evangelho João hateten “Basa Maromak hadomi tebes mundo to’o fo Nia Oan Mane mesak, atu ema hotu nebé fiar iha Nia la-bele lakon, maibé hetan moris rohan-laek” (Jo 3,16). Amor ida ne’e, torna modelo ba vida cristã, nebé convida fiar-nain sira atu hadomi, tulun malu iha familia no respeita ema seluk, liu-liu ba ema vulnerável sira no visita ema moras sira; nune’e mak sai tradição partilha nian lolos no reflete valor cristã nebé moris iha ação concreto nudar sarani Cristã, “Basa Ha’u hamlaha, imi fo han Ha’u; Ha’u hamrook, imi fo hemu Ha’u; Ha’u la’o rai, imi simu Ha’u” – “Ha’u isin tanan, imi fo hatais Ha’u; Ha’u moras, imi ba hare Ha’u; Ha’u iha dadur laran, imi ba hare Ha’u” (Mt 25, 35-36).
Natal mos iha dimensão ética ida nebé forte kona ba Páz no Reconciliação. Wainhira Jesus moris, anjo sira anúncia “Gloria ba Maromak iha leten aas ba, dame iha rai-klaran ba ema sira nebé Nia hadomi” (Lc 2, 14). Mensagem ida ne’e, hatudu katak natal mak fundamento ba cultura Páz nian. Hanesan humana cristã, ida-idak ho ninia história jornada moris nian nebé marca ho desafios, sofrimento oi-oin, laran moras ba malu no hirus malu, nune’e, Natal bele torna momento reflexão coletiva kona ba perdão, dame malu no hadia relação, tuir Jesus ninia hanorin “Ksolok ba sira nebé harii dame, basá ema sei hanaran sira Maromak oan” (Mt 5,9). Moris tuir nune’e, ita bele sai mensageiro humildade, amor, páz no solidariedade nebé sai hosi Natal, tuir sagrada escritura, bele inspira sarani no povo Timorense atu continua harii sociedade ida nebé mais justo, unido no humanizado.
Kalan Fahe Rua – Hahu Dalan Foun Ho Esperança
Iha tradição Cristã, Kalan Fahe ba Rua (transição hosi tinan tuan ba tinan foun), la’os de’it mudança ba número iha calendário, maibé momento espiritual ida nebé bo’ot tebes. Oras meia-noite simboliza remata tinan ida hahu tinan ida seluk; iha momento ida ne’e, ita ida-idak reflete experiência tinan tuan nian; balun sente contente tanba sucesso, balun sente falha, balun sente laran moras no balun fali sente triste tanba lakon familia; ho experiência hirak ne’e hotu, nudar sarani cristã la hela de’it iha saudades ka laran susar, maibé entrega hotu ba Maromak liu hosi oração no agradecimento. Laos ba ida ne’e de’it, maibé iha kalan ne’e mos sai momento arrependimento no reconciliação. Nune’e, hahu tinan foun ho esperança precisa laran livre hosi ódio, ressentimento no culpa. Tradição Cristã hanorin katak la-iha dalan foun, se laran sei todan hela iha passado nian, nune’e perdão ba ema seluk no aan-rasik mak sai chave espiritual atu loke futuro.
Hahu dalan foun ho esperança significa hela nafatin iha confiança mas que incerteza; nune’e tinan foun la’os de’it mudança tempo, maibé viagem espiritual ida nebé acompanha sarani cristã atu moris ho laran foun, fiar nebé maduro no domin concreto.
Conclusão
Hein iha Naroman, Moris iha Domin no Hahu ho Esperança, hatudu katak fiar cristã la’os de’it iha celebração litúgica, maibé integra iha moris loron-loron nian. Hein iha naroman; fo vigilância no confiança iha Maromak, “Ne’e duni, matan moris hodi hamulak nafatin ba, atu bele hetan kbiit hodi hadok-an hosi buat hotu nebé sei mosu no bele hamrik metin iha Oan Mane nia oin” (Lc 21,36). Moris iha domin; manifesta fiar ho ação concreta; perdoa, servi no partilha, “Liurai sei hatan ba sira: Tebes, Ha’u dehan ba imi; wainhira imi halo buat ne’e ba Ha’u nia alin-kiik sira ne’e ida, imi halo mai Ha’u rasik” (Mt 25, 40). Hahu ho Esperança; orienta moris ba futuro ho laran firme no entrega ba orientação divina, “Ha’u hatene plano nebé ha’u iha ba imi Plano ba Páz no futuro ho esperança” (Jr 29, 11).
Hosi dimensão tolu ne’e, naroman, domin no esperança, sustenta tebes vida cristã; wainhira moris tuir lolos ida ne’e ho fidelidade no Fé mak sei tranforma moris ho naroman, dame no renovação ba familia no ba sociedade.
Boas festas do Santo Natal e Feliz do Ano Novo ba ita hotu!
