HOMILIA MISSA SOLENIDADE DE SÃO JOSÉ, ESPOSO DA VIRGEM SANTA MARIA, DÉCIMO ANIVERSÁRIO ORDENAÇÃO EPISCOPAL DOM VIRGÍLIO CARDEAL DO CARMO DA SILVA E ORDENAÇÃO DIACONAL
Ohin ho ksolok boot haleu altar santo ida ne’e, ita sarani comunidade Arquidiocese Dili, tukutur hasae agradece ba Maromak ba graça oi-oin nebé hasuli ona mai ita nia Arquidiocese, iha tinan 10 iha atan oan ninia episcopado, momento furak ida mai ha’u atu agradece ba Maromak. Tamba ha’u bele experiência Maromak ninia diak, Maromak ninia furak liu husi ema oi-oin husi sarani tomak Arquidiocese ida ne’e nian, husi ida nebé kiik to’o ferik no katuas, husi sira nebé iha cidade ba to’o iha sira nebé hela iha foho, agradece ba ema hotu, ba religioso/a sira, particularmente ba Amu lulik hotu-hotu iha Arquidiocese ida ne’e ninian, ba ita boot sira nia paciência, sacrifício, dedicação no espírito de colaboração, incansável ba ita nia igreja, ba ita nia diocese nia diak.
Furak mos ohin, iha solenidade São José esposo da Virgem Santa Maria, ita continua experiência Maromak ninia domin hodi continua bolu, fihir no consagra foinsa’e nain lima, nebé tur hela iha ita nia oin, foin daudaun fo ona sira nia sim, atu haburas nafatin Maromak ninia reino iha rai, sira nain lima nia generosidade mak hatudu gesto concreto, ita nia obrigado ba Maromak, ita continua harohan atu liu husi São José ninia intercessão, rai Timor, Igreja Timor, sai nafatin viveiro vocação nian, ba consagrado/a ba uma creda universal, São José kuda no hakiak fini vocação nian, iha ita nia foinsa’e sira nia fuan, furak tamba ohin iha missa ida ne’e hare foinsa’e mos barak, estudante barak feto no mane, laos ferik ho katuas de’it, maibe ita mos celebra São José ninia festa ho joven sira, estudante sira, atu nune’e ita saran sira iha São José atu bele hakiak iha sira nia fuan, fini vocação sai sarani nebé diak, aban bainrua bele sai fini vocação ba uma creda ninian.
Ne’e duni, ohin iha Festa São José nian dala ida tan, ita hotu haksolok, boas festa ba ema hotu liu-liu laos de’it ita iha ne’e, maibe sira nebé mos ohin bele karik tuir dalan seluk, husi virtual ninian, solenidade loron ohin ninian, convida ita atu hare ba papel São José Virgem Santa Maria nudar nia kaben, masque ita sei iha Quaresma nia laran, liturgia convida ita atu pausa oituan, onra, ema ida nebé ita bele dehan katak nonok, maibe extraordinário iha história salvação nian. Iha Sagrada Escritura nia la koalia liafuan ida, maibe nia hahalok revela moris ida nebé fiar, confiança no obidiência nebe klean tebes ba Maromak.
Ida nebé simu ho haraik-an Maromak ninia proposta ho laran manas tau matan ba Maromak Oan, ho nia Inan ho domin no dedicação tomak. Sociedade global ida nebé desicríbio socio económico cultural no política, moral no ética, husik hela dilema no preucupação boot ida ohin loron nian. Tamba ne’e Festa São José nian bele sai momento ida bele convida ita fila ba aprende husi nia, atu mos bele hatene harohan, halo hau nia knar, hatene hadomi Maromak. São José ema harohan nain, dala barak ita conhece santo ida nebé la koalia, siléncio laos augência ida hanoin, maibe espaço ida iha nia comunhão klean ho Maromak, situação ne’e permite nia atu hatene rona no compriende Maromak nia plano masque iha mehi, São José ema justo judeio ida devoto nebé hatoman an ho oração sira iha prática, ita bele dehan nia moris tomak iha oração constante tamba lor-loron literalmente moris ho Virgem Santa maria no Jesus. iha íntima sira ida nebé único tebes transforma nia knar lorloron ba acto ida harohan ninian.
Ita hotu hatene São José nia oração labele haketak husi Maromak nia hakarak, nia sim, hatudu nia prontidão ba Maromak. Anjo koalia ho nia iha mehi, atu nia simu Maria hanesan nia kaben, wainhira nia tem que halai ba Egipto la hanoin barak hamrik no ba kedas, domin ida saran an nian São José sacrifica ninia plano atu protege sagrada família hare momento hirak ne’e hotu hanesan oportunidade ida atu hahi Maromak, hanesan carpinteiro São José servisu hodi tau matan Maromak nia Oan, ne’e lição ida mai ita katak husi serviço sira nebé ita halo lorloron bele tulun ita atu moris iha santidade.
São José ema ida nebé em ação masque início moe atu simu Maria, moe ba saida mak público sira sei hanoin konaba nia, maibe nia obedece ba instrussão mai husi anjo atu simu Maria iha ninia uma. Nune’e mos wainhira Herodes hanoin hakarak atu oho Kosok oan Jesus, São José iha Egipto nia hein momento nebé Maromak haruka sira atu fila ba Nazare.
São José nudar badaen ida. Nia serviço lahatene kolen, la sura kolen, tau matan ba Nain Feto ho Kosok Oan Jesus no mos hanorin Jesus atu serviço. São José ema nebé hatene halo tuir kedas, pronto obidiência, nia la duvida no mos lahalo pergunta barak, maibe hanesan Moises, hamriik no ba, virtude hirak nebé sai airin ba nia ação mak hatene halo tuir kedas, corágem, creativo no ema los ida, nudar ema ida iha contemplação.
Evangelho ita hotu hatene katak la iha liafuan ida nebe sai husi São José nia ibun, maibe atu hatudu mai ita katak ida ne’e sinal ida fuan nebe hatene contempla, nebé hatudu nia disponibilidade ba Maromak nia hakarak, São José iha nia moris hatudu mai ita la iha tenção entre moris ida nebé super ativo ho ita nia vida interior, nia kna’ar hanesan carpinteiro ida, sai hanesan oportunidade ida nebé diretamente servi no contempla ba Maromak.
Wainhira Jesus sei adolescente moris hamutuk iha Nazare, ema hanaran igreja doméstica Nazare, São José mak primeiro homem bele contempla continuamente rosto humano Maromak ninian, haensan São João Paulo II dehan; São José nia moris sai oração ida tamba nia iha contacto ida constante ho mistério boot incarnação ninian.
Santa Teresa de Ávila, promove São José hanesan mestre da vida interior. Nia dehan mos mai ita ohin loron nian katak la hetan karik mestre ida oração nian, diak liu hare ba São José, tamba São José iha toman diak ida ne’e hatene contempla mak tulun tebes nia atu rona Maromak nia instrução ba nia liu husi mehi.
Iha momento graça ida ne’e, la to’o mai ita atu admira de’it hahalok furak São José hatudu iha ninia moris tomak, maibe oinsa ita mos hakas-an atu banati tuir liu-liu situação ida-idak ita atravessa iha circuntância oi-oin laos aprende atu harohan deit, maibe hakas-an atu hola conciência ida moris nafatin iha Maromak nia presença. Ha’u fiar katak gesto ida ne’e sei ajuda tebes ita ida-idak bele moris iha cerenidade, hakmatek nebe mai duni husi fuan.
Ohin loron ita precisa duni ceriedade iha mundo nebé marca ho barulho, ho egoismo, indiferensa nebé halo ita dala barak la hakmatek.
Ne’e duni maluk doben sira hamutuk ho ita nia maun alin nain lima nebe tur hela iha ne’e oraoras tan hakat mai atu simu ordenação Diaconado, mai ita aprende husi São José. Diácono, Amululik, sarani no ita hotu precisa haburas-an iha buat tolu ne’e, harohan, serviço no hela iha Maromak nia presença.
Diácono doben sira, oração ba Diácono ida hanesan conversação ida diário no relacionamento íntimo ida ho Maromak. Laos fali hanesan obrigação ida de’it. Diácono ida wainhira harohan hatudu nia gratidao ba nia vocação no husu Maromak tulun guia nia iha susar laran aprende tau Jesus iha nia centro moris ninian.
Tuir tradição Kreda ninian, Diácono tem que hatoman an ho litugia das horas. Nudar Diácono hare uluk maka buat nebé atu tulun iha imi nia vida Diaconal nian, ho livro oan ida ne’e garante ita atu bele reza bei beik. Considera hanesan oração Diácono nian maka halo mos diak, tau matan ba ema moras, tau matan ba ema kiak sira, no sira nebé mais vulnerável. Aprende husi Cristo atu servi, hirak ne’e hotu dalan ida. Diácono ida buka atu sai modelo moris ida nebé Santo, nain lima rona didiak modelo moris ida nebe santo.
Diácono ida laos reza de’it, maibe mos homen de ação, tamba sira nia ministério difine ho ação laos ho liafuan. Ita boot sira nia matan espiritual nian atu hatene hare, nececidade ema seluk nian, nune’e mos creativo atu hatan ita boot sira nia kna’ar ne’e, hetan iha actos do apóstolo capitulo 6, atu tulun duni halo knar Diácono nian ho didiak precisa hariku an ho hahalok sira hanesan dignidade no integridade controla an ho hahalok nebe diak sira.
Iha Dili ne’e durante tinan 10 nia laran iha dia 19 de marco ne’e sempre ordena Diácono, ita hanoin konaba São José idanetifica ho Diácono sira nia moris katak laos deit cerimónia ida iha dia 19, Festa São José no bispo nia aniversário, maibe oinsa maka Diácono ida bele foti espiritualidade São José; prontidão, serviço, homen de ação, laos koalia mak barak maibe halo mak barak.
Ita precisa reza makas ba São José atu bele hariku duni ita nia rain, ita nia sociedade atu vertude ida nee bele buras iha ita nia rain. Diácono ida ne’e ativo maibe nia natureza contemplativo ne’e bele garante nia serviço sira ne’e espiritualmente abut metin tamba nia hamriik metin iha Maromak, iha nebe deit nia ba, nia la haketak bainhira mak nia reza, bainhira mak nia serviço maibe nia hatene tau buat hirak ne’e hamutuk. Tanba ne’e São José nia moris hanorin hela mai ita katak santidade dala barak hatudu ita nia fidelidade ba ita nia responsabilidade sira.
São José tem que hanorin ita hotu laos deit sira nebe Diácono, maibe sira hirak nebe iha ne’e hotu. Oinsa ita bele aprende buat ruma husi São José, fidelidade ba ita nia responsabilidade, saida deit ita aprende atu fiel, la koalia barak, maibe nia hatene fiel, coragem masque iha Certeza laran, nia rasik hahu kedas wainhira nia simu missão atu sai Maromak nia aman hakiak, maibe nia nunca disanima. Ita mos hare ba buat nebé acontece iha mundo funu ho buat hirak ne’e hotu buat barak acontece iha ita nia família, iha ita nia comunidade, iha ida-idak nia situação dala barak ita mos desanima lalais, maibe São José hanorin ita mos atu hatene laran metin iha Maromak. Comfia ba Maromak, Maromak sei hatudu dalan mai ita.
