Maromak nebé hahu ona buat diak iha ó no Nia sei lori ó to’o rohan
Homilia Missa Crismal
Arcebispo de Dili Dom Virgílio Cardeal do Carmo da Silva
(Catedral, 26.03.2026)
Maluk doben sira, dala ida tan molok tama ba celebração Páscoa, sarani halibur hamutuk iha Catedral ita celebra Missa Crismal.
Missa Crismal mak celebração inportante iha nebé mak ita celebra iha Quinta-feira Santa, maibe tanba razão pastoral ita nia diocese iha toman ida atu inicia tiha Quinta-feita antes de Semana Santa.
Objetivo primária missa ida ne’e ninian atu consagra Santo Crisma; bense ólio nebé mak ita sei uja iha Sacramento tomak iha tinan ida nia laran. Missa ida nebé ita celebra dadauk mos símbolo unidade katak halibur hamutuk Amululik, diácono, consagrado/a, seminaristas, estudantes no sarani sira ho sira nia bispo. Amululik ho sira nia bispo forma presbítero ida hodi renova sira nia votos de obidiência ba bispo no comprimisso atu fiel ba sira nia vocação, hafoun mos sira nia desejo atu dedica an liu tan ba Maromak nia povo.
Loron ida ne’e mos atu halucro hanoin fali instituição Sacerdotal nebé hamutuk ho Cristo. Tan ne’e loron ida Amululik sira nian, loron ida atu reza ba Amumulik sira, atu bele sai duni instrumento Maromak nia graça ba Maromak nia povo.
Leitura sira ohin ita rona liu-liu iha Evangelho, mai ita haklean hamutuk; ita Amululik sira ita ida-idak iha ita nia história. Iha ita nia loron Ordenação ita confessa katak, ita só bele iha história ida ne’e ho naroman Jesus Nazare ninian. Jesus nebé hadomi ita no liberta ita husi sala ho Nia ran. Nia loke hino furak ida iha moris no hanorin ita atu descobre passagem sira nebé mai ita nudar ita nia identidade no ita nia missão. Se ita husik Jesus hanorin ita mak ita nia ministério sei sai duni ministério da esperansa ba Maromak ninia povo.
Ohin ita mos bele husu ba ita nia an; ha’u aprende duni atu lé ha’u nia história ka dalaruma ha’u ta’uk atu lé ha’u nia história karik!
Maluk doben sira, ohin ita halibur hamutuk iha ne’e conciente ba vocação nebé ita simu tiha ona no hakarak atu hafoun ita nia SIM ba Maromak! Ne’e confissão fiar nian ida nebé ita halo no ba Maromak nia povo tomak. Jesus nia paixão nebé ita sei halo ninia memória ida ne’e mak base princípio fundamento nebé sustenta Kreda no ita nia ministério Sacerdotal. Base ida nebé? Princípio fundamento ida oinsa? Base ida nebé mak sustenta no halo buras ita nia ministério ida ne’e bele buras liu tan? atu halo ida ne’e ita precisa fila fali ba Nazare katak fila fali ba Na’i ita nia vocação hun.
Maluk doben sira, ita nia moris sustenta ho tradição moris diak sira, toman diak no abut diak sira maske toman diak sira dala barak sai tiha hanesan rutina, maibe abut diak ne’e hatudu saida no se mak ita! Jesus nia fuan hadomi tebes Maromak nia Liafuan. Wainhira Nia sei tinan 12 to’o Nia sai adulto, Escritura mak Nia horik fatin no Nia Uma. Ida ne’e mos mak base principal nebé ita precisa iha moris hanesan Jesus nia Escolante sira.
Amululik doben sira, ita ida-idak temque cumpre dehan ita ida-idak mos goja harí sacramento saudavel ida ne’e ho Maromak ninia liafuan nebé ita lé, medita no haklaken lor-loron iha ita nia moris. Wainhira ita hakasan duni hodi servi ema seluk, mak Sagrada Escritura bele sai ita nia horik fatin. Iha Sagrada Escritura nia laran iha liafuan barak nebé kona ita nia moris. Ita mos dalabarak tulun ema atu descobre furak ida ne’e. exemplo ba sira atu kaben gosta hili passagem especial ruma nudar sira nia motto. Nune’e mos mai ita nudar Amululik ka consagrado/a ita gosta hili passagem ruma nudar motto ba ita nia vocação, ba ita nia votos temporários no perpétua. Ida ne’e mos mak ita bele hari iha Liafuan nebé Jesus hili wainhira Nia fila ba Nazare. Wainhira tama iha Sinagoga fraze nebé Jesus hili revela Ninia identidae no missão “Na’i nia Espírito iha Ha’u basá nia tulun Ha’u atu haklaken liafuan diak ba kiak sira, ba dadur sira no ba matan delek sira, atu fó Liberdade ba sira nebé ema hanehan.
Ohin ita harohan ba Espírito nebé hanesan mai ita nia sacerdócio. Ita simu tiha ona Espírito ida ne’e no nia continua servi ita lor-loron iha ita nia ministério. Ema sente Espírito ninia Is iha ida-idak wainhira ita nia liafuan sira sai realidade ida iha ita nia moris lor-loron.
Crisma Santo nebé ora-oras tan ita sei consagra marca mistério transformação continua serviço iha iha nível oi-oin iha sarani ida-idak nia moris. Ho gesto ne’e, hatudu Maromak tau matan ba ita, Maromak nunca husik ita iha respiração nia laran hatudu Maromak continua serviço tau matan ba ita hanesan liafuan furak iha Ordenação nian nebé nafatin eco iha ita nia tilun; Maromak nebé halo diak ona buat diak iha ó no sei lori ho ó to’o rohan. Ho ida ne’e ho it aida-idak nia experiência bele sente kmo’ok no furak oinsa Maromak nia domin mai ita ida-idak. Los duni, ida obra ida Maromak ninian laos ita nian lori liafuan diak ba kiak sira, Liberdade ba dadur sira, matan ba sira nebé la hare, Liberdade ba sira nebé ema hanehan
Agradece ba Maromak ba ita nia sacerdócio. Ne’e presente boot ida nebé ita simu husi Maromak ba Maromak nia povo. Dala hira iha ha’u nia moris agradece ba dom sacerdócio nebé ha’u hetan? Dala hira mos mak ha’u preucupa tebes atu lahamihis satan hafoer dignidade sacerdotal nian nebé iha ha’u? dala hira mos mak graça sacerdotal nian nebé ha’u simu ha’u la karak, ha’u la baruk atu fahe ba ema seluk? Los duni desde loron ordenação nian ita sente la soin ba graça ida ne’e. maske salanain karik ba maibe Maromak fihir ita. Maromak de’it mak hatene no sei halibur buat diak nebé nia haraik mai liu husi ita.
Crisma santo nebé ita sei consagra, celebração solene ne’e atu lori construição ksolok ba Maromak nia povo. Ita nia to’os mak mundo. Ita nia casa comum nebé marca ho hakarak oi-oin no Fraternidade humana nebé dala barak nega presença Maromak ninian bolu ita atu hamri’ik metin.
Ne’e duni Maluk doben sira, saida mak celebração ohin ninian nebé hakarak hanorin mai ita! Uluk nanain convida ita atu sente fila fali Is Espírito Santo nebé ita simu iha loron Ordenação ninian “Na’i nia Espírito iha ha’u leten; espírito ne’e continua serviço iha ita ida-idak nia moris. Iha tempo ida ne’e ita moris iha tempo Espírito sinodal; ne’e significa bolu amululik sira atu halao sira nia serviço iha espírito proximidade ho Maromak nia povo, bolu mos atu moris iha solidariedade ho maun-alin amululik sira.
Papa Leão encoraja ita amululik sira buka atu hari amizade ida nebé forte no autêntico, hatoman an atu reza hamutuk, estuda hamutuk no han hamutuk. Ne’e mak dalan ida amu Papa convida ita atu fó prioridade ba ita nia verdadeiro fraternidade entre amululik. Papa mos fó hanoin nafatin mai ita atu iha Kreda lapreucupa atu halibur poder, maibe oinsa atu encoraja ita atu hakiak no haburas espiritualidade ida ‘serviço no haraikan’.
Mai ita aprende husi ita nia missionário sira nebé iha tinan 500 resin nia laran, mai fó an ba ita nia rain to’o agora balu sei moris, hare ba sira nia exemplo serviço haluha an ba Kreda ida ne’e nia diak nebé ohin loron ita haksolok no hola parte.
Convida ita atu fila fali bai ta nia Nazare. Laos fatin no tempo mak importante, maibe encontro nebé lori transformação radical ida ba ita nia moris. Ne’e duni maluk doben sira, mai ita ho haraikan, mai ita lori mai iha Altar santo ida ne’e nia leten ita nia intenção, ita nia preucupação nebé ita ida-idak iha husi Paróquia sira, comunidades, famílias, instituição nebé ita servi nudar karan murak ita hasae ba Maromak no liu husi intercessão Virgem Santíssima intercessoa nailulik sira, hanourin ita hotu hatene hamatan no haburas Nia Oan nia missão ho paciência, sacrifício, dedicação ho domin.
