Homilia Domingo de Ramos, Ano A
Pe. Bento Barros Pereira, Bidau, 29 de Março 2026
HOSANA BA DAVID NIA OAN. DIAK TEBES IDA BE MAI HODI NAI NIA NARAN
Maun alin sarani doben sira nebe hau hadomi iha ita nain Jesus Cristo,
Ita hahu ba oras ne’e ita ninia semana santa. Semana ida nebe santa liu hotu, iha nebe ita hotu hamutuk moris mistério boot ita ninia salvação nian hahu kedas husi aclamação ba ita Nain Jesus Cristo nudar Liurai Israel nian, ita sira be Israel foun ninia liurai. Liurai ida nebe iha contexto semana santa nee nian hatudu-an nudar liurai maksoin ida. Nia fo ninia-an hodi terus too mate no moris hias ba ita emar sala nain sira hodi halo ita sai ninia povo, povo santo ida.
Leitura sira be ohin ita rona haktuir mai ita kona ba Nai Jesus Cristo nebe semana ida molok ninia paixão tama iha Jerusalem ema sira simu nudar Liurai. Na’i Maromak tulun loke ema sira iha tempo nebe ninia matan no sira ninia neon hodi hare hetan no reconhece Cristo maksoin nudar liurai ida be Maromak haraik ba sira. Los duni Cristo liurai, liurai nebe hanorin no fo sasin kona ba Maromak nudar liurai lolos ninia Reino; Liurai nebe ukun atu servi, atu hadomi, atu fo-an ba mate, ho restaura fila fali justiça, paz, domin no moris ksolok lolos ema sala nain sira nian hodi halo sira hotu hola parte iha Reino ida deit, reino Maromak nian.
Cristo tama iha Jerusalem povo tomak ho ksolok haklalak “Hosana David nia oan. Diak tebes ida be mai hodi Nai ninia naran”. Nai Jesus Liurai lolos mai iha mundo moris tuir linha Liurai David ninian, Liurai nebe Maromak rasik mak hili hodi ukun ho domin no justiça ninia povo israel. Cristo Jesus Aman Maromak haruka mai laos deit atu ukun nudar liurai, maibe atu salva, atu soi Maromak ninia povo nee husi buat at hotu-hotu. Soi dala ida ba nafatin hodi halo ema ho criatura tomak hetan salvação rohan laek.
Ohin ita rona mos Paixão Cristo nian. Oinsa mak ita nain Jesus Cristo terus tebes duni too mate iha Cruz tutun hodi soi fila fali ita ema sala nain sira husi salan no nakukun laran. Hahu kedas husi Han kalan ikus, agonia iha toos oliveira, julgamento sira iha sacerdote no boot sira oin, terus kalan tomak iha cadeia laran, acusação falsa iha herodes ninia oin, rejeição povo no boot sira povo judeu nian, hasan Cruz iha loron manas boot hodi simu tuku tebe, monu hamrik halo kanek wain no ran suli sai ba too Calvario, lia croat no prego croat nebe sona borus ninia isin no klamar, halo tuir nafatin deit too iis kotu iha cruz tutun, ema hakoi tiha no moris hias fila fali hafoin loron tolu.
Maun alin sira Cristo terus sira nee hotu terus fodik ita salan, mate tamba ita salan, maibe Nia moris hias fila fali tamba mate labele ukun Nia. Tamba Cristo ninia moris hias nee mak halo ita sira be sala nain ne’e sai los fila fali. Cristo mak halos fodik ita, Cristo ninia mak hafoun fila fali ita ninia justiça.
Iha mistério boot ita nain Jesus Cristo ninia terus, mate no moris hias ne’e mak Cristo hatudu Maromak ninia domin rohan laek ba ita ema sira no ba ninia Criatura tomak. Maromak hadomi rohan laek nune nia salva ita, nia mak liurai lolos, liurai Lalehan ho rai nian, laiha tan seluk. Cristo mas que liurai, mas que Maromak oan maibe nia haraik-an simu terus nee too mate hanesan ohin ita rona hodi soi fila fali ita, lori fila fali ita ba dalan los, ba moris lolos ninia hun, ba reino lolos ida nebe ukun ho domin no ho justiça rohan laek.
Maun alin sarani doben sira, nune’e hodi celebra misterio boot nee hanesan oras nee dadaun mai ita buka atu keta monu fila fali ba sala, maibe atu moris mos iha dalan los; mai ita la lao dook tan ona husi Maromak ninia Reino maibe moris tuir valores sira reino ne’e nian: Sacrifício, perdão, domin, dame no justiça laran loro-loron iha ita ninia moris; mai ita buka atu labele fo terus ema seluk, atu la dun matak ema, maibe buka atu tulun ema seluk, atu fo moris ba ema seluk, atu halo justiça ba ema seluk nune’e ita hatudu duni moris ida nakonu ho domi no lialos nudar Maromak hakarak mai ita. Mai ita hatene reconhece ita ninia liurai lolos mak Cristo mesak deit no moris tuir nia tinan ba tinan nafatin, laiha tan liurai seluk ida nebe hatene fo nia-an ba terus too mate hodi soi ninia ema sira.
Mundo ohin loron apresenta mai ita liurai no maksoin falsu sira iha forma oioin deit nebe bele salva mak isin deit maibe labele salva klamar. Liurai no maksoin mundo ohin loron nian hatudu-an iha riku soin ka material hanesan osan no riku soin sira, iha poder ou ukun, iha vida comoda, iha atitude indifrença, iha promessas falsas, iha vida facil, iha odio no vingança, iha violência, iha hakarak aat no seluk seluk tan.
Nudar ema sarani nebe moris iha Reino Maromak nian comcerteza ita hatene buat sira ne’e laos Reino Maromak nian, hirak ne’e buat mundo nian nebe la rohan laek, sei liu lalais deit, maibe Reino Lalehan nian nebe mai husi Liurai no maksoin lolos ita nain Jesus Cristo sei rohan laek. Nune’e ita buka atu moris hamutuk nafatin iha Cristo ita ninia liurai lolos no iha ninia hanorin sira nebe lori ita ba moris rohan laek iha ninia Reino. Moris iha sasin fiar nian nebe hatene hadookan husi tentação no salan sira; hatene halo sacrifício hodi halo tuir Maromak ninia hakarak, hatene hadomi lolos, moris lolos iha justiça no iha ksolok ba ita ninia salvação no ba ema ho criatura hotu nian salvação hanesan Maromak hakarak mai ita nudar sasin ida presença Reino Maromak nian iha mundo rai klaran. Amen.
Bidau, 29 de Março 2026
Domingo de Ramos, Ano A-Pb
