Reflexão
Dc. Hermenegildo Gomes Soares
Jesus dehan ba nia Inan: “Nain Feto, ó nia oan mak ida ne’e”. Hafoin Nia lia tun ba Apostolo João “ Ó nia Inan mak ida ne’e”.
Fulan Maio Santa Creda didika tempo Mariano ka fulan Nain feto nian. Hodi hanoin fali Nain Feto mosu iha Fátima nian no ita mos sei halo procissão husi ne’e ba Igreja, ho Nain Feto nia futar ilas, halo ita hanoin kona ba Nain Feto mosu iha rai Fatima iha 13 de Maio ba bibi atan nain tolu: Lucia ho tinan 10, Francisco ho tinan 9, no Jacinta ho tinan 7. Nain Feto mosu ba sira wainhira mundo hasoru crise, nuneé nia la hili mosu ba ema boót sira ka ema poderoso sira, maibe nia hili mosu ba kiik oan nain tolu nebe ho condição hanesan ema bibi atan. Tamba Maria cumpri saida mak nia Oan (Jesus) dehan Maromak hatudu Nia mistério ba ema kiak no kiík sira, atu husi kiak no kiik sira Maromak uza hodi transmite nia mensagem. Nuneé Na’i Feto mosu ba sira na’in tolu mensagem nebe mak hato’o hela ba sira nain tolu no ba ita hotu mak ne’e Reza Terço, converte an hodi abandona pacado sira, halo caridade, moris iha dame no tau confiansa total ba Maromak.
Tamba sa mak Nain Feto nia mensagem hodi haruka ita atu halo buat sira neé?
Reza Terço ne’e Graça ida halo ita moris conectado ba Maromak; Oração Terço ne’e graça ida halo ita moris iha misterio salvação nian; oração Terço ne’e mak sarani sira nia kilat hodi contra Demonio. Tamba ne’e “Se mak halo devoção ba Nain Feto Nia sei hare saida mak Milagre”.
Maluk Sarani doben sira!
Iha Nain Feto nia festa ne’e, hanorin mai ita katak Nain Feto Maromak nia Inan no ita hotu nia inan doben. Iha Nain Feto mak Feto ida nebe nakonu ho graça Maromak Nian, Nia Santa no humilde, acompanha Nia Oan nia missão hodi tau matan ba ita, sai ita nia intercessora hodi acompanha ita, sai exemplo mai ita oinsa atu ita hadomi Maromak hanesan nia hadomi Ita Nai Jesus Cristo. Tamba ne’e nudar sarani buka atu konese didiak, hatene didiak Na’i feto hadomi tebes nia nudar ita Inan liu husi oração Terço.
Nain Feto hadomi tebes nia oan, nune’e Nain Feto hamutuk nafatin ho Na’i Jesus hahu moris mai to’o sa’e ba foho Calvario nebe ema hedi Jesus iha Cruz. Atu salva humanidade tomak nia pecado, tutan fali Lalehan ho Rai. Tamba ne’e Nain Feto nia hahalok ida ne’e sai exemplo furak no importante boot tebes mai ita hotu.
Maluk sira sarani sira!
Wainhira ita dehan katak Nain Feto ita inan. Ida ne’e lialos eh verdade ida nebe ita sarani sira labele nega iha moris fiar nian.
Ida ne’e mak ohin Evangelista São João hakarak haklaken mai ita iha loron aparição ka Nain Feto mosu nian ida neé. Nain Feto sai ita nia Inan. Tan Jesus Cristo rasik mak entrega nia Inan mai ita, atu nia Inan sai ita nia Inan. Nia hakarak ita moris diak, Nia hakarak ita hetan salvação; tan ne’e mak Nia fo ba ita nia Inan Nain Feto. Atu nia Inan Nain Feto tau matan no tulun ita nudar nia oan rasik. Tan Nain Feto kuidado Jesus oinsa, kuidado mos ita hanesan nia kuidado Jesus too Cruz hun.
São João haktuir katak molok nia mate, nia atu husik i’is ikus nian. Rai tomak nakukun, barulho sira mundo nia nonok lian ida mos ita la rona.
Nune’e wainhira liafuan sira hotu la iha tan ona folin, atu muda realidade ruma, hakilar sira hotu fuan nian, la iha tan ona kbiit, atu muda situação ruma, halerik sira iha mesak nia laran, mata wen sira sulin iha nonok nia laran, la iha ema ida mak rona, moras fuan nian hotu lori mesak-mesak. Ida ne’e hatudu katak ema tama dadaun ba situação terus ida nebe klean liu ona. Iha terus be klean ne’e ema hili liu atu nonok. No buat hotu nonok iha fuan. Ida ne’e ita hetan iha Nain Feto Maria, iha situação terus ida ne’e Nain Feto hili dalan nonok hodi simu buat hotu hodi rai nonok terus iha nia fuan. Ida ne’e Sacrificio domin boot liu Inan ida halo ba Nia oan.
Maluk Sarani doben sira!
Iha nonok no hakmatek nia laran, Jesus foti matak hateke tun ba nia Inan Maria no hateke ba Apostolo nebe Nia hadomi iha nia sorin. Jesus dehan ba nia Inan: “Nain Feto, ó nia oan mak ida ne’e”. Hafoin Nia lia tun ba Apostolo João “ Ó nia Inan mak ida ne’e”. Hahu oras ne’e kedas João loriNain Feto ba nia uma.
Maluk sarani sira!
Apostolo nebe Jesus hadomi katak João, nia represente ita humanidade tomak nebe hanaran an sarani be fiar iha Jesus Cristo. Nune’e Jesus entrega nia Inan ba João, Nia mos fo nia Inan mai ita hotu liu husi Apostolo João. Wainhira Jesus dehan ba João katak nia Inan mak Nain Feto. Nune’e ohin Jesus dehan mai ita hotu katak ita nia Inan mak Nain Feto. Hahu ba ida ne’e Nain Feto simu missão ida hodi halao nia knaar no actividade salvificas iha Santa Creda tomak horik uluk no ba nafatin.
Lição saida mak ita precisa atu aprende iha festa Nain Feto nian atu ita bele pratica iha moris loron loron hodi sai sarani diak.
Iha husu Nain Feto nudar ita Inan doben tebes, atu tama ita idaidak nia moris, hodi tulun no salva ita. Hahu loron loron ohin ba ita nia moris tomak ita buka atu konese liu tan Nain Feto laran metin liu tan ba nia, hadomi liu tan nia, halo tuir no moris tuir buat hotu be nia hanorin mai ita no haruka ita halo tuir no moris tuir ba ita nia diak isin lolon no klamar nian.
- Keta haluhan reza Terço loron loron.
- Ita sarani badinas reza terço pessoal no Terço iha familia. Ida ne’e mak Nain Feto mosu iha rai fatima promete tulun ema hotu be reza Terço.
- Keta haluhan ita nia devoção iha primeira Sabado fulan fulan. Basa ema se mak ho domin halo nafatin halo devoção primeira sabado, ema ne’e Nain Feto sei salva nia lalais husi Purgatorio. Tan ne’e devoção boot rua nebe uma creda fo mai ita atu halo mak Primeira sexta feira no Primeira sabado iha fulan fulan. Na’i Jesus la husik ema mate ho pecado mortal. Basa ema se mak mate ho pecado mortal hetan condenação eterna iha inferno. Devoção primeira Sexta feita salva ita. Ita Inan Na’i Feto hakarak ita nia diak no ita nia salvação.
Ba ida ne’e Nain Feto husu mai ita atu domingo no loron santo sira labele falta ita nia missa no comunhão. Confesa fila fila no confesa didiak atu ita lao ho klamar mos ba nafatin ho halo buat diak iha ita nia moris sarani nian. Lialos sira ne’e ita tenki hanorin ba ita nia familia sira hotu, ba ita nia belun no maluk sira hotu. Tan ita ema Apostolo Cristo nian tan ne’e ita obrigação dada no haklaken ba ema hotu atu kontinua badinas reza terço loron loron iha ita nia moris. Amen.
