Reflexão
Solenidade Festa Corpo e Sangue de Cristo
(Arcebispo de Dili Dom Virgílio Cardeal do Carmo da Silva
Maluk doben sira, iha Solenidade ohin ninian hanoin kona ba Cristo nia Futar Isin no Ran nian lato’o de’it ita lao hamutuk ho Nia iha procissão lokraik ida ne’e, maibe sai mos momento furak ida mai ita hamutuk atu buka no haklean liu tan ita nia neon no ita nia fuan presente boot Eucaristia nebé ita nain Jesus Cristo harí hela mai ita atu continua sustenta ita nia isin no klamar no fó força atu ita continua lao ba oin fiel ba Maromak.
Ha’u mak Pão moris be tun husi Lalehan, ema nebé han Pão ne’e sei moris ba nafatin. Promessa ida ba moris rohan laek, moris ida naresin ho esperança, moris nebé folin no as liu ita nia susar no terus lor-loron nian.
Lokraik ida ne’e ha’u hakarak atu ita hamutuk hanoin fila fali buat nebé ita rona iha segunda leitura São Paulo sublinha Eucaristia nia diak iha ita nia moris; cálice nebé ami bensa laos ida de’it ho Cristo nia Ran? Pão nebé ami fahe laos ida de’it ho Cristo nia Isin? Efeito rua Eucaristia nian mak “Místico no Comunitário”.
Efeito místico ita mos bele hanaran efeito místico Eucaristia. Cálice nebé foin bensa no pão nebé fahe, iha ne’e ita koalia kona ba união ho Cristo nebé iha Pão no Tua oferece ba mundo nia salvação. Jesus presente iha Sacramento Eucaristia atu nune’e bele sai Ai-han, atu Nia bele sai ida de’it ho ita hodi fo força no renova ita, fó vontade mai ita atu buka nafatin moris hanesan Maromak oan lolos iha mundo ida nebé continua muda. Situação ida ne’e husu mai ita nia disponibilidade atu ita hatene husik ita nia an ba Jesus.
Parabens tanba loron ida ne’e sai tiha ona tradição. Tinan ba tinan número mai halo procissão aumenta ba nafatin. Katak ita ida-idak sente ona importância Eucaristia nian. Loron ida ne’e hanoin kona ba Jesus nia Futar Isin no Ran, Nia nebé lao hamutuk ho ita no ita mos husik ita nia an, husik ita nia preucupação sira, lao tuir Nia tamba Nia mak atrai, Nia mak promove ita husi laran atu ita mos lao tuir Nia. Nia presença hanesan ai-han mai ita ida-idak.
Efeito daruak nian mak comunitário; São Paulo hatudu liafuan hirak ne’e tan iha deit ai-han ida; ita bele wain tebes ita bele halo isin ida de’it. Ida ne’e trata kona ba comunhão ida recíproca ba ema hotu iha comunidade.
Ohin iha ita nia procissão tun mai imagina multidão boot ida ne’e lao diak, ema hotu reza, ema hotu tau iha disciplina, ida-idak iha nia papel atu halo; hotu-hotu razão ida de’it atu ita hotu fó ita nia an halo momento ida ne’e sai momento furak liu katak momento comunhão nian.
Ita halo ita nia an sai ida de’it. Comunhão ida ne’e mak temque continua iha ita ida-idak nia moris. Cristo nia presença halo ita hotu sai maun-alin e feton ho naan. Ita forma comunidade ida nebé han no hemu Cristo nia Futar Isin no Ran, sinal eficácia unidade. Comunga nia futar isin no ran halo ita sai nia Ilas rasik. Cominhão ida ne’e laos de’it cominhão físico maibe cominhão ida nebé tem que ser ho ita nia moris tomak husi dader to’o kalan, husi ita nia hanoin to’o ita nia hahalok sira sai ida de’it ho Cristo. Ho ida nebé comunga atu ita la trai, maibe soi duni atu ita bele fó sasin iha ita nia moris.
Iha ida nebé ita simu mos atu halo ita sai ida de’it ho Nia no Nia mos halo ita sai ida de’it ho ita nia maun alin sira, laos tan ona ita hare ema seluk hanesan ema bai-bain, maibe ita hotu mesak maun-alin. Ida nebé ita comunga halo ita nia isin ne’e sai lulik, atu ita ida-idak hare ba ita nia an nudar fatin sagrado atu ita hatene hadomi, respeito tamba horik fatin Maromak ninian. Nune’e mos Cristo nebé horik iha ha’u atu ha’u mos hare ba ema seluk hodi respeita nia, koalia diak ba nia, la trata nia tamba nia ilas Maromak ninian.
Los duni dala barak ita hotu dook husi realidade ida ne’e. tan ne’e mak celebração ohin ninian lori ita ida-idak atu halo exame de conciência kona ba ita nia moris nudar sarani. Iha celebração ohin nian mos comvida ita atu sente katak tuir Jesus iha nescecidade ida ne’e; ita precisa apoio espiritual ida hanesan isin precisa hahan, klamar mos precisa hahan espiritual ida nebé bele continua fó força mai ita atu hamrik metin; tan Cristo mak we matan moris comvida ita mos atu hakbesik ba Nia hanesan Nia rasik ohin dehan; pão moris hanesan we matan espiritual bele transforma ita nia prespectiva sira, ita nia prioridade sira. Wainhira se Cristo mak iha ita, ida nebé ita comunga ita nia prioridade mos laos tuir deit saida mak mundo ne’e nia hakarak, maibe prioridade tuir Cristo ninia hanorin no hakarak sira; Tamba Cristo convida ita atu hakiak fiar liu husi Comunhão. Acto comunhão nian simbiliza conecção klean ho Cristo. Hakasan atu participa iha Sacramento ida ne’e atu nunne’e bele haforça liu tan ita nia fiar hodi tulun ita iha vontade atu lao tuir no moris Cristo nia hakarak sira. Iha ita nia capela sira, iha Igreja paroquial sira iha capela adoração perpétua nakloke ba sarani hotu atu nune’e depois de serviço loron tomak ka seman tomak iha fatin ida atu ita visita, laos de’it televisão oin, laos de’it iha telephone oin atu ita halo tiktok, maibe ba visita santíssimo atu bele hakman ita nia naha todan moris nian. Buka moris iha unidade ho ema seluk, hatene mos atu hatan ba hamlaha sira espíiritual nian.
Iha capela Paço ninian nune’eiha capela sira iha festa corpo e Sangue nian sarani barak mos hakbesik ba comfessa tanba sarani sente katak comfessa laos deit iha tempo Páscoa no Advento, tamba sarani sira sente duni hamlaha ida ne’e oinsa mak hau bele moris nafatin iha Maromak nia presença se ita haketak an, se ita moris iha conciência ida nebé nakonu ho pecado. Mai ita ida-idak buka ho haraikan buka nafatin Maromak, ida ne’e it abele dehan fruto Eucaristia nian, união ho Cristo. Creda mak halo Eucaristia hanesan Santo balun dehan; Eucarista mak halo Creda no loke dalan ba nia missão. Ida ne’e mak mistério cominhão Eucaristia; simu Jesus tamba Nia tranforma ita husi laran no ita simu Jesus nia halo ita ida de’it “unidade no laos atu haketak ita”. Mai ita iha Monumento Nain Feto nia ain ne’e ita harohan atu Virgem Santa Maria tulun ita ida-idak atu hatene simu ho domin no gratidão presente boot nebé Jesus husik hela mai ita Sacramento Eucaristia.
