DCAD, (Oe-Cusse, 25.05.2025) Arcebispo de Dili S.E Dom Virgílio Cardeal do Carmo da Silva Domingo VI tempo ordinário nian preside Santa Missa iha Paróquia Nossa Senhora do Rosário, Numbei. Iha Santa Missa nian ne’e, Arcebispo de Dili hasai Despacho no Provisão hodi fó posse ba Pe. Carlos de Deus, Pároco Sessante Paróquia Padiae ba missão foun nudar Pároco da Paróquia Nossa Senhora do Rosário Numbei.
Pe. Carlos de Deus antes ne’e hala’o ninia missão nudar Pároco iha Paróquia Padiae durante tinan 9 nia laran, no iha loron 24 maio Pe. Carlos de Deus termina nia knar nudar Pároco iha Paróquia Padiae subtitui hikas husi Pe. Mariano Neto.
Arcebispo de Dili S.E Dom Virgílio Cardeal hateten wainhira ita hanoin fila fali ba iha missão ida amululik ida ninian, se Cristo mak nain, Pároco nia knar atu halo buat hotu atu manan klamar sira.
“Pároco nudar instrumento ida Maromak ninian mai atu tulun sarani sira atu lao iha dalan nebé los. Liu-liu amu pároco foun. Serviço hotu nebé amo Pároco halo mak atu manan klamar sira, halibur klamar sira barak liu tan atu lori klamar sira ba Maromak, salvação klamar sira nian, hari Maromak ninia reino. Ne’e duni Amo Pároco ida mai ba sarani sira hodi tulun sarani sira, hakbesik ba sarani sira, nia mai atu hari Maromak nia reino liu husi ninia sasin moris nudar instrumento ida Maromak ninian atu hatudu dalan ba sarani sira. Ida ne’e mak ita dehan pároco ida nia knar.
São Francisco de Assis iha sec. XII, nia ba capela ida nia reza hodi hateke ba iha cruz no iha liafuan ida husi cruz ne’e dehan ba nia; Francisco keta reza barak liu, hamriik ba hadiak Ha’u nia igreja a’at ona. foinsae ida hare ba kalen sira kuak barak ona, muro sira monu ba dadauk, nia hahu atu sosa sasan sira atu hadia, maibe husi cruz Jesus dehan ba nia “laos Igreja nebé halo ho fatuk, maibe Igreja nebé hari ho Maromak ninia povo-laos hari uma mak inportante, maibe buka oinsa mak atu hadia sarani sira nia moris, oinsa mak tulun sarani sira bele conhece Maromak, oinsa mak tulun sarani sira bele hadomi malu, oinsa tulun sarani sira bele fila fali ba Maromak. Ida ne’e mak hanaran Corpo Mística Cristo ninian” haktuir Arcebispo de Dili Dom Virgílio iha nia homilia.
Atu termina Arcebispo ninia homilia nia hateten, buat ida nebé essencial liu wainhira ita ida-idak halo ita nia fuan sai fatin ida Maromak ninian: hatene hare, hatene fihir, hatene hateke, hatene contempla ba Evangelho. Tanba Papa Francisco dehan Evangelho mak ksolok sarani sira nian. Ne’e katak rona Evangelho tau iha Fuan.
“Ha’u hakarak termina ho Santo Agustino ninia liafuan “laos lao haleu mundo, maibe fila fali ba ó nia laran tanba lialos ne’e iha ita ida-idak nia fuan”. Se Maromak iha ita nia fuan ita bele hatene hadomi malu, wainhira Maromak iha ita nia fuan sempre iha dalan ba ita atu resolve ita nia problema. Maibe se Maromak laiha ita nia fuan, ita labele hari dame. Tanba ne’e Santo Agustino dehan ó hakarak buka lialos laos ba iha livro, ba iha internet, maibe fila fali ba ó nia conciência, rona ó nia fuan tamba lia los ne’e iha ita ida-idak nia fuan. Husik ita nia fuan mak sei dehan, ó sala ba confessa, ó sala ba husu desculpa”.
