HOMILIA
Imi nia Justiça la boot liu Fariseu no Escriba sira nian, Imi sei la tama iha Reino Lalehan
Arcebispo de Dili, Sua Eminência Dom Virgílio Cardeal do Carmo da Silva
Missa Novena loron Ikus (loron 9) ba Santo António
Comunidade Franciscano Dili, 12 de Junho de 2025
Ita agradece ba Maromak ba nebé oferece ba mundo tomak presente furak ida iha pessoa Santo António. Husi ninia moris Na’i Maromak hafutar ho buat furak oi-oin. Hahu kedas husi labarik sai ba foinsae to’o Na’i Maromak bolu nia husi rai ida ne’e, ita bele dehan nia mos percorre moris hanesan ema bai-bain, masque iha buat hirak ne’e hotu nia iha desejo boot ida ba Maromak hodi sacrifica nia an iha momentos barak. No nia halo buat hirak ne’e hotu la sura kole no la sukat distância nebé nia tem que percorre tanba de’it nia domin.
Tan ne’e mai ita agradece ba Maromak nebé fó mai ita pessoa Santo António e ita agradece mos tanba liu husi nia Nai Maromak haraik mai iha mundo rahun diak nebé mai husi leten halo ema barak laran metin, tau ita nia confiança ba iha Santo António nia moris. Hau fiar katak ita boot sira mai halo Novena começa kedas loron primeiro to’o mai ohin nian tanba iha confiança ida hodi lori ita persevera iha loron 9 nia laran halo ita nia oração hamutuk hodi harohan ba Santo António no buka harohan daet Santo António ninian.
Ita mai laos tanba laran metin de’it, maibe tanba ita hamrok ba buat ida nebé dalaruma ita la sente. Ohin loron iha buat oi-oin nebe ita koko atu experiência maibe iha mamuk ida ne’e nebé lori ita ida-idak buka atu bele hamate ita nia hamrok. Ou karik sai hanesan momento ida atu ita bele recupera fila fali harmok ida ne’e. ita husu karik ba ita nia an oinsa mak ita bele recupera no oinsa mak ita bele hetan bé nebé bele hamate ita nia hamrok, we matan ida nebé bele fornece be ida nebé ha’u precisa iha ha’u nia moris.
Se ita rona didiak Leitura sira ohin ninian; “imi nia justiça la boot liu fariseu no escriba sira nian imi sei la tama iha reino Lalehan”. Então ita husu imi ne’e se los! Los duni refere ba escolante 12, refere ba discípulo 72, refere ba comunidade sarani tempo neba ninian, maibe ohin la refere ba uluk ninian deit ona, maibe ohin refere mai ha’u, refere ba ita ida-idak atu halo tuir Maromak nia vontade ho didiak no lolos. Ne’e duni Jesus nia liafuan ne’e mai ita atu oinsa atu cumpre lolos ita nia obrigação nudar sarani. Jesus continua koalia mai oinsa mak atu exerce ita nia obrigação nudar sarani ida iha comunidade, iha família.
Tan ne’e ohin Jesus bolu ita nia atenção hodi convida ita hodi hare ba ita ida-idak nia hahalok moris, ódio no laran moras, nebé dala barak halo ema hadok-an husi ita. Dala barak iha ita nia família, colegas la besik mai ita tanba ita harí hela muro ba ita nia an. Koalia kona ba ida ne’e halo ha’u hanoin fila fali 20 de maio foin lalais ne’e acontecimento iha cailaco no foin liu de’it loron balu acontecimento ida tan iha gruta Golgota
Oras ne’e daudaun gruta laos ona sai fatin oração ninian maibe sai fali fatin ita hakiak violência, laos tan ona fatin bênção ninian maibe sai fatin malisan ninian tanba ita mak la respeita tan ona fatin hirak ne’e.
Maluk doben sira hotu, hahalok hirak hotu tuda malu, tolok malu, ta malu no sona malu hirak ne’e hotu ha’u hanoin ida ne’e laos dalan ba paz karik. Papa Francisco matebian sempre dehan ‘ho violência ita nunca bele hetan paz”. Buat hirak ne’e hotu laos atu hetan solução ba probelma, laos dalan ba paz nian, maibe dalan atu aumenta tan conflito, dalan atu aumenta tan problema mak iha e dala barak aumenta tan estres iha sociedade. Ne’e duni atu Evita acontecimento hirak ne’e hotu ita hotu precisa harohan atu liu husi intercessão Santo António ninian convida ita hahu husi família sira, educador sira atu ita hotu labele lakon Esperança atu kuda no hakiak iha ita nia oan sira nia fuan Espírito diálogo nian. Diálogo hirak ne’e tem que hahu iha família. Tanba ne’e ita harohan ba Santo António atu hanourin ita atu hatene halo diálogo no hatene rona no hatene mos reconhece ita nia fraqueza no miséria sira no falhanço sira. Ida ne’e mak ha’u hanoin dalan nebé ita timor nian nebé dehan “Nahe Biti Boot”. Ida ne’e hanesan lisan ida nebé ita nia beiala sira husik mai ita no dala barak lao nafatin to’o ohin loron. Ita nia lisan hirak ne’e fó hanoin nafatin mai ita katak haburas nafatin toman hirak ne’e hodi buka dalan hodi promove paz.
Los duni, ita ema ne’e hanesan iha Evangelho dehan ita família ida tanba ita pertence ba família boot Maromak nian. Iha Maromak mak ita nia Aman no ita hotu mesak maun-alin. Então saida maki ta precisa halo! Hanoin se ita hotu hakarak atu ita nia rain nee sai fuan ida laran ida. Ida ne’e esforço ida nebé ita hotu temque halo ho maneira oi-oin hodi hakribit hahalok sira nebé violência nian nebé ita lakohi atu acontece iha ita nia família, comunidade no sociedade. Ida ne’e mak hanesan Evangelho fó hanoin mai ita atu ita la sai hanesan fareseu no escriba nebé iha oin hatudu buat nebé furak, maibe ita hakoi hela buat sabraut barak iha ita nia laran. Hau hanoin exemplo boot ida Santo António nian nebé hatudu hela mai ita atu ita nafatin husu ba Santo ida ne’e graça ida atu ita iha duni coragem hodi reconhece ita nia limitação sira. Ne’e duni milagre nebé ohin loron ita precisa mak paz no harmonia. São Paulo dehan; hena nebé uluk taka metin ho Jesus nia moris hias hene ne’e hasai tiha ona. Ita ohin loron ho Jesus nia moris hias ita nakloke ho nia Espírito nebé ita simu iha loron Pentacoste halo ita foun sai ema libre atu lori naroman ne’e ba ema hotu.
Ida ne’e mak ita precisa husu husi Santo António atu ho naroman boot ida ne’e ita ida-idak depois de Novena durante loron 9 nia laran atu lori ita sai husi ita nia nakukun sira, lori ita hatene descobre buat nebé ha’u buka, hau hamrok ba we matan moris ida ne’e, atu hetan tiha, koko tiha we ksolok moris ninian, naroman no dame domin ninian, ita mos lakohi lakon no hakarak de’it atu conserva nafatin we moris ida ne’e atu ita la hamrook tan. Tanba ne’e ita husu ba Santo António iha ita nia Novena loron ikus ninian atu tulun ita hotu hodi hola parte iha Maromak nia reino
