DCAD – (Dili, 05-09-2025) – Conferência Episcopal Timorense (CET) liu husi conferência imprensa neb’e hala’o iha edifício CET, Bidau-Dili convida sarani sira hotu atu participa iha missa ação de graça ba tinan ida visita Sua Santidade Papa Francisco nian iha Timor- Leste.
Padre Carlos Roben nudar Secretário executivo CET haktuir comunicado official ne’e hodi hateten katak Ho fuan nebé nakonu ho ksolok no gratidão, Conferência Episcopal Timorense convida sarani sira hotu atu mai participa iha Santa Missa Ação de Graças nian, ba ocasião primeiro aniversário visita Sua Santidade Papa Francisco nian mai rai doben Timor-Leste.
“Ita nia fuan no neon sei manas hela hodi hanoin presença histórica Maktoban Papa Francisco nian iha ita rain, iha loron 9 to’o loron 11 fulan Setembro tinan 2024. Papa nia visita sai nudar bênção ida ba ita nia nação no liu husi nia encontro sira ho ukun nain sira, ho katuas no ferik sira, ho foinsa’e sira, ho labarik sira no ho ema moras sira, hatudu duni katak Papa nia domin boot povo Timor nebe simples no fiar nain. Nia presença iha ita nia le’et, hametin liu tan ita nia fiar, hafoun fila fali ita nia esperança no nia husik hela marca ida nebe labele hasai hosi ita hotu nia fuan.
Iha data especial ida ne’e, mai ba ita hotu tau hamutuk ita nia oração atu agradece ba Maromak ba graça hosi presença Santo Padre nian iha ita le’et, ba nia liafuan sira nebe fo coragem mai ita no ba gesto concreto sira nebe hatudu nia domin paterno, proximidade no atenção nebe nia fo mai ita Timor oan hotu. Molok nia fila hikas ba Roma, iha encontro ho foinsa’e sira nia husik hela menon ida ne’e: “Obrigado ba imi nia presença. Ha’u sei husik hela rai ida ne’e, nebe nakonu ho hamnasa, ho imi nia oin midar sira no ho esperança katak imi hotu iha ha’u nia fuan. Maromak haraik bênção ba imi hotu”. No Papa declara iha nia viagem fila ba Roma, ho liafuan murak ida ne’e: Hau nia laran monu tiha ona ba Timor-Leste”. Tan Papa nia domin ida bo’ot nune’e, ita fiar katak oras ne’e Maktoban Papa Francisco, harohan hamutuk ho Santo no Santa sira iha Lalehan mai rai no povo doben Timor-Leste.
Ba ida ne’e, imi hotu nia participação iha Missa Ação de graças ne’e mak sai nudar sinal domin, unidade no sasin moris ita nia fiar nian”. Alem de Iha conferência imprensa ne mos hato’o mos programa husi celebração husi diretor executivo Comissão Nacional Juventude Católica Timor-Leste no Coordenador geral equipa Sinodal Padre Francisco Indra do Nascimento Tey Seran “Comissão Nacional Juventude Católica Timor-Leste (CNJCTL) maka orgão oficial ida husi Conferência Episcopal Timorense (CET) nebé hakna’ar nu’udar responsável ba assunto pastoral foinsa’e católica nian iha Kreda Timor”.
Relaciona ho informação nebe hato’o ona, Tinan ne’e Conferência Episcopal Timorense (CET) fo confiança ba Comissão Nacional Juventude Católica Timor-Leste (CNJCTL) liu husi Equipa Sinodal nebe envolve foinsa’e sira husi Comissão Diocesana tolu, Movimento Juvenil Católica no Universitário sira hodi sai nu’udar responsavel maximo ba programa celebração tinan ida vizita Sua Santidade iha Timor Leste. Nune’e programa sira nebe sei hala’o iha dia 10 de Setembro de 2025 mak hanesan tuir mai ne’e: Missa Agradecimento: ho Hóras, 18:00 Lokraik, Preside husi Sua Eminência Dom Virgílio Cardeal do Carmo da Silva, SDB: Depois de Missa, sei iha Sasin ka Partilha konaba Santo Padre nia Visita ho Hóras: 20:00-21:00: Concerto “Jovem Barulho”, ho Hóras: 21:30 até Remata nebe sei anima husi Banda Nacional, Banda Comissão Diocesana, Movimento Juvenil Católica no Associação Juventude Independente.
